140

Singx Nzung 140

Daux Gaux Tov Ziouv Beu Jienv Maiv Bun Zuqc Mienh Hoic

Jiu bun dorh nzung nyei mienh. Ndaawitv zoc nyei singx nzung.
  1O Ziouv aac, tov njoux yie biaux ndutv orqv mienh.
   Tov beu jienv yie, maiv bun mienh doqc mienh hoic.
  2Ninh mbuo yiem hnyouv daav cuotv waaic nyei za'eix,
   yaac zanc-zanc coqv-huv mborqv jaax.
  3Ninh mbuo bun ninh mbuo nyei mbietc laic hnangv naang nyei mbietc laic nor.
   Ninh mbuo nyei nzuih meix maaih naang-jieqv nyei ndie-doqc.⟨Selaa
  4O Ziouv aac, tov njoux yie biaux ndutv orqv mienh nyei buoz-ndiev,
   beu yie maiv zuqc doqc nyei mienh hoic,
   ninh mbuo daav za'eix bun yie nyei zaux ndiqv zuqc ndorpc.
  5Zoux maux nyei mienh bingx jienv zaeng koux zorqv yie,
   ninh mbuo longc hlaang corng mungz,
   yiem jauv-hlen zaeng koux hlopv yie. Selaa
  6Yie gorngv mbuox Ziouv, “Meih zoux yie nyei Tin-Hungh.
   O Ziouv aac, tov baeng m'normh muangx yie jouh nyei sing-qiex.
  7O Ziouv, yie nyei Ziouv, dongh maaih qaqv henv njoux yie wuov dauh aac,
   mborqv domh jaax nyei hnoi-nyieqc meih torngv jienv yie nyei m'nqorngv.
  8O Ziouv aac, tov maiv dungx ei jienv orqv mienh nyei eix zoux,
   maiv dungx bun ninh mbuo orqv nyei za'eix cuotv,
   nziex ninh mbuo haih ceng-hlo. Selaa
  9Tov maiv dungx bun weih jienv yie wuov deix mienh hingh jiex.
   Tov bun ninh mbuo nyei nzuih gorngv nyei waac nzuonx daaih hoic ninh mbuo ganh.
  10Tov bun zieqc jienv douz nyei taanx ndortv njiec ninh mbuo.
   Tov bun ninh mbuo zuqc zoi njiec ndo nyei kuotv,
   yietc liuz maiv haih cuotv.
  11Tov maiv dungx bun gorngv waac-huv nyei mienh liepc nguaaz-gorn yiem deic-bung.
   Tov bun orqv nyei sic siepv-siepv zorqv jienv zoux doqc nyei mienh.
  12Yie hiuv duqv Ziouv baav jienv ndortv naanc nyei mienh,
   yaac baengh fim nyei dunx weic mienh jomc mienh.
  13Kuv mienh zungv oix ceng meih nyei mengh,
   hnyouv zingx nyei mienh yaac oix yiem meih nyei nza'hmien.