141

Nau Mbơh Sơm Mhaơ Gay Ma Nau Ƀư Kloh Jêh Ri Nau N'gang An

 Nau mprơ ơm Y-David.
1Ơ Yêhôva, Gâp kuăl mbơh sơm jêh ma may;
 Văch gơnh dăch gâp;
 Rkêng hom tôr ma bâr gâp, tơlah gâp kuăl mbơh sơm ma may.
2Ăn nau gâp mbơh sơm jêng nâm bu ndơ ƀâu kah ta năp may;
 Jêh ri nau gâp yơr ti, jêng nâm bu ndơ nhhơr mhaơ.
3Ơ Yêhôva, chiă uănh trôm mbung gâp;
 Njrăng ma trô yoi gâp, tơ lah păng hă.
4Lơi ăn nuih n'hâm gâp rŏng ma nau mhĭk ôh, ŭch ƀư nau ƀai, ndrel ma phung bunuyh ƀư nau kue;
 Jêh ri lơi ăn gâp sa ndơ khlay khân păng.
5Ăn nơm sŏng dong gâp, nau nây mra jêng nau ueh ma gâp;
 Ăn păng nduyh gâp, nau nây mra jêng nâm bu dak ngi ta kalơ bôk gâp; Lơi ăn bôk gâp dun ma nau nây ôh.
 Yorlah, nđâp tơ lah khân păng ƀư nau ƀai, gâp ăt mbơh sơm.
6Bu mra klŭp Kôranh phat dôih khân păng ta keng lŭ;
 Jêh ri khân păng mra tăng nau gâp ngơi;
 Yor nau ngơi nây jêng maak.
7Tâm ban ma bu kai neh, jêh ri b lah neh ma kau kai;
 Nting hên nchah du ta mpông pêr Ƀon Phung Khĭt.
8Mpeh pa may yơh, Ơ Yêhôva Kôranh Brah, măt gâp uănh,
 Tâm may yơh gâp krap, lơi chalơi huêng gâp ôh.
9Rklaih gâp bơh dăk khân păng sân jêh ma gâp;
 Jêh ri ma nau phung ƀư mhĭk kâp gâp.
10Ăn phung ƀai prah tâm nhuăl khân păng nơm,
 Dôl nây gâp klaih yơh.