14

Singx Nzung 14

Baamh Mienh Hngongx, Kungx Zoux Waaic Sic

(Beiv mangc Singx Nzung 53:1-6)

Jiu bun dorh nzung nyei mienh. Ndaawitv zoc nyei nzung.
  1Mienh hngongx mienh yiem hnyouv gorngv,
   “Maiv maaih Tin-Hungh lorqc.”
  Ninh mbuo yietc zungv waaic nzengc,
   ninh mbuo zoux orqv haic, waaic haic nyei sic.
   Maiv maaih yietc dauh zoux longx.
  2Ziouv yiem tin-dorngh mangc njiec,
   mangc baamh mienh,
  oix mangc gaax, maaih haaix dauh maaih cong-mengh,
   maaih haaix dauh lorz Tin-Hungh.
  3Ninh mbuo yietc zungv yangh pien jauv,
   dauh dauh fih hnangv nyei waaic nzengc.
  Maiv maaih haaix dauh zoux longx,
   yietc dauh yaac maiv maaih.
  4Yietc zungv zoux orqv nyei mienh maiv hiuv haaix nyungc fai?
   Ninh mbuo naqv yie nyei baeqc fingx hnangv ninh mbuo nyanc hnaangx.
   Ninh mbuo yaac maiv tov Ziouv.
  5Mv baac ninh mbuo yiem wuov gengh! gamh nziex haic,
   weic zuqc Tin-Hungh caux kuv mienh yiem.
  6Meih mbuo zoux orqv nyei mienh oix bun mienh jomc mienh nyei za'eix ndortv,
   mv baac Ziouv zoux ninh mbuo ndaauh kaux nyei dorngx.
  7Tov bun I^saa^laa^en Mienh nyei njoux en yiem ⟨Si^on⟩ cuotv daaih.
  Ziouv bun ninh nyei baeqc fingx nzuonx daaih duqv longx hnangv zinh ndaangc wuov zanc,
   Yaakopv nyei zeiv-fun ziouc maaih orn-lorqc,
   I^saa^laa^en Mienh oix njien-youh.