26

Singx Nzung 26

Kuv Mienh Daux Gaux Nyei Waac

Ndaawitv zoc nyei singx nzung.
  1Ziouv aac, tov meih siemv bun cing yie maiv zoux dorngc,
   weic zuqc yie kungx zoux zingx nyei sic hnangv.
   Yie kaux Ziouv, hnyouv yaac maiv mbungh mbienv.
  2O Ziouv aac, tov meih zaah mangc yie yaac seix yie,
   tov kauv yie nyei hnyouv caux yie hnamv nyei sic.
  3Weic zuqc meih ziepc zuoqv nyei hnamv yie yaac dorh yie,
   yie yaac zanc-zanc ei jienv meih nyei zien leiz yangh.
  4Yie yaac maiv caux nduov mienh nyei mienh juangc jauv yangh,
   yaac maiv caux beih zaqc hnyouv njuotv nyei mienh zoux doic.
  5Yie nzorng haic gapv zunv nyei orqv mienh,
   yaac simv nqoi mienh waaic mienh.
  6O Ziouv aac, yie nzaaux yie nyei buoz bun cing yie maiv zoux dorngc.
   Yie yaac yangh huing meih nyei ziec-dorngh.
  7Yie baaux nzung dor-ziec meih,
   nzamc jienv gorngv meih zoux nyei yietc zungv mbuoqc horngh nyei sic.
  8O Ziouv aac, yie hnamv meih yiem nyei biauv,
   dongh meih nyei njang-laangc yiem nyei dorngx.
  9Tov meih maiv dungx zorqv yie caux zuiz-mienh yietc njiec guaatv mingh.
   Yaac maiv dungx zorqv yie nyei maengc caux daix mienh nyei mienh zuqc daic.
  10Ninh mbuo nyei buoz zanc-zanc zoux orqv sic.
   Ninh mbuo nyei mbiaauc jieqv buoz kungx nzuiz nyaanh hmuangx hnangv.
  11Mv baac yie ganh kungx zoux hnyouv zingx.
   Tov meih njoux yie, korv-lienh yie.
  12Yie nyei zaux souv jienv ndau-baengh nyei dorngx,
   yiem zuangx mienh gapv zunv nyei dorngx yie oix ceng Ziouv.