33

Nau Yơk Mbah Tâm Rnê Ma Nơm Rhăk Njêng Jêh Ri Nơm Blau Prăp

1Ơ Phung song, maak hom khân may tâm Yêhôva
 Nau mât ton tâm rnê di ma phung bunuyh song
2Mprơ tâm rnê hom ma Yêhôva ma nau mât ton
 Dong gong rêng jât rse mprơ tâm rnê hom ma Păng.
3Mprơ tâm rnê ma Păng du ntil nau mprơ mhe
 Ăn khân may kreh dĭng khân may ma nau
 Săr lah jêh ri ăn nteh huy
4Yorlah nau Yêhôva ngơi jêng song
 Lĕ kan Păng jêng nau nanê̆ ngăn
5Păng rong nau song jêh ri nau di
 Nau ueh Yêhôva lam neh ntu
6Yêhôva rhăk trôk ma nau Păng ngơi
 Lĕ gưl trôk dơi jêng tă luh bơh n'hâm mbung bâr Păng
7Păng rgum lĕ dak rlai jêng dak sial njach ryă
 Păng ăn dak jru nsun du ntuk.
8Ăn lĕ rngôch neh ntu klach ma Yêhôva.
 Ăn lĕ rngôch bunuyh ta neh ntu klach mbah yơk ma Yêhôva.
9Yorlah mâm nau Păng ngơi, jêng dadê ro.
 Mâm nau Păng ntăm mra jêng nâp rjăp ngăn.
10Yêhôva ƀư rai lĕ nau mhĭk neh ntu
 Păng ăn nau phung ƀon lan mĭn jêng dơm dam Nau mĭn,
 Yêhôva dơi nâp rjăp n'ho ro.
 Nuih n'hâm Păng mĭn gŭ n'ho ro ăp rnôk.
11Ƀiă lah nau Yêhôva chung gŭ nâp n'ho ro.
 Nau nuih n'hâm Păng mĭn gŭ tâm lĕ rngôch rnôk.
12Ueh maak yơh mpôl băl geh Yêhôva jêng Brah Ndu
 Ueh maak yơh ƀon lan Păng săch jêh, jêng drăp ndơ Păng krâm
13Yêhôva nchrâng uănh tă bơh kalơ trôk.
 Păng saơ lĕ rngôch kon bunuyh.
14Păng sek uănh tă bơh ntuk păng gŭ
 Lĕ rngôch phung gŭ ta neh ntu.
15Păng yơh njêng nuih n'hâm ăp nơm khân păng
 Jêh ri Păng sek uănh lĕ rngôch kan khân păng.
16Mâu geh ôh du huê hađăch geh nau tâm rklaih
 Yor Păng geh ka han âk.
 Du huê bunuyh katang mâu dơi geh nautâm rklaih yor nau katang păng ôh.
17Mbu nâm rnơm ma seh, nau nây jêng dơm dam, mâu dơi geh nau rnam ôh, mâu lĕ păng dơi tâm rklaih ma du huê yor nau katang păng.
18Aơ, Yêhôva uănh măt ma phung klach mbah yơk ma Păng
 Ma phung blau rnơm ma nau ueh Păng
19Gay ma tâm rklaih huêng khân păng bơh nau khĭt
 Prăp nau rêh khân păng dôl nau sa sât ji ngot
20Huêng he kâp gân ma Yêhôva
 Păng jêng nơm kơl he jêh ri jêng khêl he.
21Tâm Păng yơh nuih n'hâm he geh nau răm maak.
 Yorlah he rnơm jêh tâm amoh kloh ueh Păng
22Ơ Yêhôva, ăn nau ueh may gŭ tâm hên
 Tĭng nâm hên kâp gân jêh ma may.