34

Singx Nzung 34

Ceng Ziouv Weic Ninh Zoux Kuv Sic

Ndaawitv dorng jienv Aa^mbi^me^lekv zoux hnangv butv ndin mienh ziouc zuqc zunc biaux wuov zanc, zoc nyei singx nzung.
  1Yie maiv dingh liouh nyei oix ceng Ziouv.
   Ceng ninh nyei waac zanc-zanc yiem yie nyei nzuih.
  2Yie nyei hnyouv oix weic Ziouv bungx waac-maux,
   bun zuqc zeix nyei mienh muangx haiz ziouc a'hneiv.
  3Tov caux yie ceng Ziouv weih hlo.
   Tov bun mbuo lomh nzoih taaih ninh nyei mengh.
  4Yie daux gaux tov Ziouv, ninh ziouc dau yie.
   Yaac njoux yie biaux ndutv yietc zungv gamh nziex nyei sic.
  5Zuqc zeix nyei mienh mangc jienv ninh, hmien ziouc njang-laangc aqv.
   Ninh mbuo maiv zuqc buang hmien diev nyaiv.
  6Naaiv dauh mienh jomc mienh heuc jienv tov,
   Ziouv yaac haiz mi'aqv,
   yaac njoux ninh biaux ndutv ninh nyei yietc zungv kouv naanc.
  7Ziouv nyei fin-mienh beu jienv taaih Ziouv nyei mienh
   yaac njoux ninh mbuo.
  8Gunv seix mueix ziouc hiuv duqv Ziouv se longx haic.
   Ndaauh kaux ninh nyei mienh maaih orn-lorqc.
  9Ziouv nyei cing-nzengc baeqc fingx aah! Oix zuqc taaih ninh,
   weic zuqc taaih ninh wuov deix maiv caa haaix nyungc.
  10Liemh sienh lunx haih dangx haih ngorc nyanc nyei ga'naaiv,
   mv baac lorz Ziouv nyei mienh maiv caa haaix nyungc longx nyei ga'naaiv.
  11Yie nyei naamh nyouz aac, daaih muangx yie nyei waac maah!
   Yie oix njaaux meih mbuo taaih Ziouv.
  12Haaix dauh baamh mienh oix ziangh jienv,
   oix duqv siouc nyuonh ndaauv yaac duqv longx?
  13Oix zuqc faix fim, maiv dungx bun mbietc gorngv orqv nyei waac.
   Nzuih meix yaac maiv dungx gorngv-baeqc nduov mienh.
  14Orqv nyei oix zuqc simv nqoi, kungx zoux longx nyei jauv.
   Oix zuqc longc hnyouv zimh lorz baengh orn nyei jauv.
  15Ziouv nyei m'zing mangc jienv kuv mienh.
   Ninh nyei m'normh yaac muangx ninh mbuo heuc jienv tov nyei waac.
  16Ziouv ngaengc jienv zoux orqv nyei mienh,
   bun yiem naaiv lungh ndiev maiv maaih haaix dauh jangx duqv ninh mbuo.
  17Kuv mienh heuc jienv tov, Ziouv muangx haiz mi'aqv,
   bun ninh mbuo biaux ndutv yietc zungv kuonx naanh.
  18Ziouv yiem nitv fatv hnyouv mun nyei mienh,
   yaac njoux hnyouv mun, mba'nziu yuqc nyei mienh.
  19Kuv mienh buangh kuonx naanh camv nyei,
   mv baac Ziouv njoux ninh biaux ndutv nzengc.
  20Ninh beu jienv kuv mienh nyei sin,
   maiv bun yietc diuh mbungv nauv.
  21Orqv mienh oix zuqc orqv nyei sic daic,
   hanc kuv mienh nyei mienh oix zuqc dingc zuiz.
  22Ziouv yaac njoux ninh nyei bou nyei maengc.
   Ndaauh kaux ninh wuov deix, maiv maaih haaix dauh zuqc dingc zuiz.