46
Vaajtswv yog lub chaw cawm sav
Khaula caaj ceg sau rua tug thawj coj hu nkauj lawv le lub suab Alamau. Yog zaaj nkauj hu.
1Vaajtswv yog peb lub chaw cawm sav
hab yog peb tug zug,
yog tug kws paab rua txhua lub swjhawm
kws raug ceblaaj.
2Vem le hov peb txhad tsw ntshai
txawm yog lub nplajteb yuav ntxeev,
hab tej roob yuav nphau rua huv havtxwv,
3txawm yog dej havtxwv nphau pis nthwv
hab nrov tseeg quas nkawg,
hab tej roob ua zug quas kais
vem tej nam nthwv dej ntsawj kuj xwj.
4Muaj ib tug nam dej ndwg
ua rua Vaajtswv lub nroog zoo sab,
yog tug kws Luj Dua Ndais lub chaw nyob
kws dawb huv.
5Vaajtswv nyob huv plawv lub nroog
mas lub nroog yuav tsw ua zug,
thaus kaaj ntug Vaajtswv yuav paab nwg.
6Ib tsoom tuabneeg kuj ntxhuv quas nyo
hab ib tsoom tebchaws
tseeg quas nkawg qaug taag.
Vaajtswv tsaa suab hlo
mas lub nplajteb yaaj ntshws.
7Yawmsaub kws muaj fwjchim luj kawg nkaus
nrug nraim peb,
Yakhauj tug Vaajtswv
yog peb lub chaw cawm sav.
8Ca le lug, lug saib Yawmsaub tej num,
saib nwg ua rua lub nplajteb
nyob do cuas le caag.
9Nwg ua rua kev ua rog taj tug
moog thoob qaab ntuj kawg.
Nwg luv raab neev hab tsoo tej muv tawg
hab hlawv tej daim phaj thaiv.⚓
10“Ca le nyob tuabywv
hab paub tas kuv yog Vaajtswv.
Ib tsoom tebchaws txhawb nqaa kuv,
thoob nplajteb qhuas kuv.”
11Yawmsaub kws muaj fwjchim luj kawg nkaus
nrug nraim peb,
Yakhauj tug Vaajtswv
yog peb lub chaw cawm sav.