48

Cóh Si-ôn La Ntốq Yiang Sursĩ

  1Yiang Sursĩ la sốt toâr lứq.
   Ngkíq cóq hái yám noap án,
   cớp ũat khễn án tâng cóh Si-ôn la ntốq noau dŏq sang toam Yiang Sursĩ.
  2Cóh Si-ôn la khong Yiang Sursĩ.
   Cóh ki sarỡih cớp nêuq o lứq.
  Cớp vil tâng cóh ki la vil khong Puo ca sốt toâr lứq.
   Vil ki táq yỗn dũ náq cũai tâng cốc cutễq nâi sâng bũi hỡr.
  3Tâng vil ki bữn sa‑ữi ntốq catáng curiaq.
  Yiang Sursĩ khoiq yỗn cũai dáng chơ ntốq án ỡt;
   ntốq ki la ntốq dŏq catáng ra‑óq.

  4Máh cũai puo tâng dỡi nâi cớp máh tahan alới
   khoiq rôm sarhống parnơi ễ pỡq talốh cóh Si-ôn.
  5Toâq alới hữm cóh ki, alới santar cớp ngcŏh lứq.
   Chơ alới lúh chái lứq tễ ki.
  6Tỗp alới cangcoaih cớp sâng a‑ĩ lứq,
   samoât mansễm cheq ễ sễt con.
  7Alới cỡt samoât tuoc Ncháu khoiq talốh tâng dỡq mưt
   bo cuyal phát rêng lứq tễ angia mandang loŏh.

  8Tỗp hái khoiq sâng chơ tễ ranáq Yiang Sursĩ táq.
   Cớp sanua, hái hữm ranáq ki lứq cỡt tâng vil Yiang Sursĩ.
  Nâi la vil Yiang Sursĩ Sốt Toâr Lứq.
   Án dŏq vil ki la ntốq curiaq cudar yỗn têq ien khễ mantái níc.

  9Ơ Yiang Sursĩ ơi! Tâng clống Dống Sang Toâr anhia,
   hếq chanchớm níc tễ ŏ́c ayooq anhia.
   Ŏ́c ayooq ki ỡt níc cớp hếq.
  10Ơ Yiang Sursĩ ơi! Ramứh anhia pỡq pláh dũ ntốq,
   ngkíq yuaq dũ ntốq noau bữn khễn ramứh anhia.
   Anhia bữn chớc la pĩeiq níc.
  11Cũai proai tâng Si-ôn sâng bũi lứq;
   cớp alới ca ỡt tâng máh vil tâng cruang Yuda, sâng bũi tê,
   yuaq anhia rablớh pĩeiq lứq.

  12Anhia ca sa‑âm Yiang Sursĩ ơi!
   Sễq anhia pỡq lavíng clống Si-ôn cớp ngih salĩq ngôl toâr bữn sa‑ữi máh léq.
  13Cớp sễq anhia nhêng máh ntốq parnoâng.
   Cớp ngih salĩq ntốq dŏq bán curiaq cớp kĩaq cudar.
   Ngkíq nŏ́q anhia têq nsũar loah yỗn tŏ́ng toiq anhia toâq dỡi ntun dáng tê.
  14Yiang Sursĩ la lứq Yiang Sursĩ hái mantái níc.
   Cớp lứq án toâp ayông hái yỗn toau toâq tangái hái cuchĩt.