49

Cóq Sa‑âm Ống Yiang Sursĩ Sâng

  1Cóq dũ náq anhia tamứng santoiq nâi!
   Dũ náq anhia ca ỡt tâng cốc cutễq nâi,
  2dếh cũai toâr cớp cũai cớt, dếh cũai sốc cớp cũai cadĩt,
   cóq tamứng santoiq nâi.
  3Bỗq cứq loai santoiq ca têq yỗn anhia cỡt rangoaiq,
   cớp máh ŏ́c cứq atỡng têq táq yỗn anhia dáng raloaih.
  4Sanua cứq chanchớm tễ ŏ́c rangoaiq achúc achiac hái,
   cớp atỡng anhia tễ ramứh ŏ́c ki bo cứq tapáih achúng.

  5Cứq tỡ bữn sâng ngcŏh ntrớu bo tangái túh arức toâq,
   la tangái máh cũai ễ táq cứq ỡt lavíng mpễr cứq.
  6Alới ưo tễ crơng alới bữn,
   cớp alới achỗn tỗ bữm tâng sanốc ntữn.
  7Ma tỡ bữn cũai aléq rơi pláih dỡi tamoong án chuai cũai canŏ́h,
   tỡ la culáh kia tễ dỡi tamoong cũai yỗn Yiang Sursĩ,
  8yuaq kia dỡi tamoong la ntâng lứq,
   cớp tỡ bữn noau bữn dũ
  9dŏq pláih yỗn cũai tỡ bữn cuchĩt,
   ma yỗn bữn tamoong mantái níc.

  10Dũ náq cũai la dáng tễ máh cũai rangoaiq,
   ma alới cuchĩt machớng cũai tỡ bữn rangoaiq tê;
   cớp cũai sacũl la cuchĩt machớng ki tê.
  Chơ nheq máh mun alới bữn cũai canŏ́h ễn ndỡm.
  11Lứq pai alới bữn cutễq ndỡm,
   mŏ ping cumuiq cỡt dống alới ỡt mantái níc.
   Lứq alới ỡt tâng ntốq ki tái-mantái.
  12Ngkíq ŏ́c sốt toâr ki tỡ têq chuai yỗn alới bữn tamoong.
   Ma alới cóq cuchĩt samoât riang charán tê.

  13Ngkíq, rana alới pỡq, ki pỡq puai rangứh alới bữm,
   cớp alới sâng bũi níc cớp sanốc ntữn alới.
  14Alới la samoât charán cữu noau anoat tangái cóq cuchĩt.
   Ŏ́c cuchĩt dững asuoi alới samoât riang cũai mantán cữu dững asuoi cữu tê.
  Cớp toâq tarưp, cũai tanoang o bữn riap alới,
   bo tỗ alới cỡt abuoiq nheq tâng ntốq cũai cuchĩt ỡt, yơng tễ dống alới bữm.
  15Ma Yiang Sursĩ thái loah raviei cứq tễ ntốq cũai cuchĩt ỡt.
   Lứq samoât án dững cứq toâq pỡ ntốq án ỡt.

  16Chỗi sarốh sarnớm ntrớu bo noau cỡt sốc bữn,
   bo cũai ki bữn sanốc ntữn sa‑ữi lứq ễn.
  17Toâq alới cuchĩt, alới tỡ têq dững muoi ramứh ntrớu tễ mun ki.
   Sanốc ntữn alới tỡ bữn puai alới.
  18Lứq pai alới chanchớm dỡi tamoong alới la o lứq,
   cớp noau khễn alới yuaq tễ sốc bữn ki;
  19ma nheq náq alới cóq cuchĩt machớng achúc achiac alới tê,
   cớp ỡt tâng ntốq canám mantái níc.

  20Ngkíq, ŏ́c sốt toâr tỡ têq chuai ntrớu yỗn alới bữn tamoong níc.
   Ma alới cóq cuchĩt samoât riang charán tê.