49
Tso sab rua nyaj txag mas ruag kawg le
Sau rua tug thawj coj hu nkauj. Zaaj nkauj kws Khaula caaj ceg sau.
1Ib tsoom tuabneeg 'e, ca le noog tej lug nuav.
Txhua tug kws nyob huv qaab ntuj,
ca le tig ntsej noog,
2tsw has cov yau cov hlub
cov muaj cov pluag huvsw.
3Kuv lub qhov ncauj yuav has
tej lug kws muaj tswvyim,
hab kuv lub sab yuav xaav txug kev txawj ntse.
4Kuv yuav tig ntsej noog tej paaj lug,
kuv yuav ntaus nkauj nog ncaas
txhais tej txhaj mim txwv.
5Ua caag kuv yuav ntshai
rua thaus raug kev ceblaaj txom nyem,
hab thaus cov tuabneeg txhum
kws tswm txom kuv nyob vej kuv,
6yog cov tuabneeg kws tso sab
rua puab tej nyaj txag,
hab khaav txug qhov kws puab muaj txag
nplua quas mag?
7Tsw muaj leejtwg txhwv tau nwg tug kheej,⚓
hab them taug nwg txujsa le nqe rua Vaajtswv.
8Tsua qhov tas tug nqe
kws txhwv tau txujsa hov kim heev,
npaum twg los kuj tsw txaus
9kws yuav ca nwg muaj txujsa nyob
moog ib txhws, hab tsw pum qhov tuag.
10Nwg yuav pum tas tug kws txawj ntse
los kuj yuav tuag,
tug tuabneeg ruag hab tug tsw paub qaabhau
los kuj yuav puam tsuaj ib yaam nkaus,
yuav tseg puab tej nyaj txag ca rua lwm tug.
11Txawm yog puab txeev hu puab thaaj aav
lawv le puab tej npe,
los puab lub qhov ntxaa
yeej yog puab lub vaaj tse moog ib txhws,
yog puab le chaw nyob
moog taag txhua tam.
12Tuabneeg lub meej mom
paab tsw tau nwg caj sa nyob,
puab kuj zoo yaam nkaus le tej tsaj txhu
kws yuav puam tsuaj xwb.
13Nuav yog txujkev kws
cov kws tso sab rua puab tug kheej yuav taug,
nuav yog cov kws txaus sab rua puab tej lug
lub khuab thaus kawg.
14Puab raug teem moog
rua huv tub tuag teb yaam le tej yaaj.
Tug yug yaaj kws coj puab yog txujkev tuag,
puab nqeg ncaaj nraim rua huv qhov ntxaa,⚓
puab lub cev yuav lwj taag.
Tub tuag teb yog puab lub tsev nyob.
15Tassws Vaajtswv yuav txhwv kuv tug ntsuj plig
dim huv tub tuag teb qaab fwjchim,
tsua qhov Vaajtswv yuav txais kuv.
16Mej tsw xob ntshai
rua thaus leejtwg nplua nuj tuaj,
hab thaus nwg vaaj tse
muaj koob meej⚓ quas zug tuaj,
17tsua qhov thaus nwg tuag
nwg tsw coj daabtsw moog,
nwg tej koob meejg
tsw nrug nwg nqeg moog.
18Txawm yog thaus nwg tseed
muaj txujsa nyob nwg suav tas nwg tau zoo,
hab txawm yog luas qhuas nwg
thaus nwg vaam meej,
19los nwg tseed yuav moog
nrug nwg tej laug nyob
kws yuav tsw rov pum dua qhov kaaj hlo le.
20Tuabneeg lub meej mom
paab tsw tau nwg caj sa nyob,
puab kuj zoo yaam nkaus le tej tsaj txhu
kws yuav puam tsuaj.