49

Singx Nzung 49

Kaux Zinh Zoih Nyei Jauv Se Hngongx Nyei

Jiu bun dorh nzung nyei mienh. Kolaa nyei Zeiv-Fun zoc nyei singx nzung.
  1Maanc mienh aah!
   Muangx naaiv deix waac oc.
  Lungh ndiev mienh aah!
   Oix zuqc baeng m'normh muangx,
  2maiv gunv zoux hlo zoux faix,
   butv zoih fai mienh jomc mienh.
  3Yie nyei nzuih oix gorngv cong-mengh nyei waac.
   Yie nyei hnyouv hnamv duqv tong,
   oix gorngv cuotv mengh nyei.
  4Yie oix bungx m'normh muangx waac-beiv,
   yie oix patv daanh baah porv mengh eix leiz.
  5Buangh zuqc kouv naanc nyei ziangh hoc
   yie maiv gamh nziex,
  dongh zoux doqc hoic yie
   wuov deix win-wangv, weih gormx yie.
  6Se kaux ninh mbuo nyei zinh zoih
   yaac bungx waac-maux gorngv
   zinh zoih camv nyei mienh.
  7Maiv maaih haaix dauh haih zuoqc ninh nyei gorx-youz nzuonx,
   fai tengx ninh cuotv zuoqc nyei jaax-zinh bun Tin-Hungh,
  8weic zuqc yietc diuh maengc se jaaix haic.
   Bun mbu'ziex yaac maiv haih gaux,
  9weic bun ninh yietc liuz ziangh jienv,
   maiv zuqc mingh yiem yiemh gen.
  10Ninh buatc cong-mengh mienh fih hnangv nyei daic,
   hngongx caux maiv hiuv nyei mienh yaac daic,
   guangc ninh mbuo nyei zinh zoih bun ganh dauh.
  11Ninh mbuo nyei zouv benx ninh mbuo yietc liuz yiem nyei biauv,
   dongh ninh mbuo yiem nyei dorngx taux maanc gouv maanc doic.
   Maiv gunv ninh mbuo longc ninh mbuo ganh nyei mbuox cuotv bun ninh mbuo nyei ndau.
  12Mienh butv zoih mv baac maiv tengx ninh mbuo maiv zuqc daic.
   Ninh ziouc hnangv saeng-kuv zuqc mietc mi'aqv.
  13Naaiv se kaux ganh hngongx nyei jauv nyei mienh,
   caux gan jienv ninh mbuo, a'hneiv ninh mbuo gorngv nyei waac wuov deix oix zuqc buangh nyei sic. Selaa
  14Ninh mbuo hnangv dingc ziangx daix nyei ba'gi yungh.
   Zuqc daic nyei qaqv yaac oix zoux ninh mbuo goux yungh nyei mienh.
  Taux lungh ndorm kuv mienh oix gunv jienv ninh mbuo.
   Ninh mbuo nyei sin oix huv jienv njiec.
   Yiemh gen yaac oix zoux ninh mbuo nyei biauv.
  15Mv baac Tin-Hungh oix njoux yie nyei maengc leih ndutv yiemh gen nyei qaqv,
   weic zuqc ninh oix zipv yie. Selaa
  16Meih buatc mienh butv zoih, benx jienv faaux,
   maiv dungx gamh nziex,
  17weic zuqc ninh daic nyei ziangh hoc ninh maiv haih dorh haaix nyungc mingh,
   ninh nyei njang-laangc maiv haih gan ninh njiec mingh.
  18Maiv gunv ninh ziangh jienv nyei ziangh hoc, ninh funx ninh maaih orn-lorqc,
   yaac maiv gunv maaih mienh ceng weic zuqc ninh butv zoih jienv faaux,
  19ninh oix zuqc guei seix hnangv ninh nyei ong-taaix mbuo nor,
   yietc liuz maiv duqv buatc njang.
  20Mienh butv zoih mv baac maiv tengx ninh maiv zuqc daic.
   Ninh m'daaih caux saeng-kuv fih hnangv nyei zuqc mietc mi'aqv.