4

Singx Nzung 4

Lungh Maanz-Hmuangx Daux Gaux Jouh Ziouv

Jiu bun dorh nzung nyei mienh. Oix zuqc longc patv nyei jaa-sic. Ndaawitv zoc nyei singx nzung.
  1O yie nyei baengh fim nyei Tin-Hungh aah!
   Yie heuc nyei ziangh hoc tov meih dau yie.
  Yie buangh zuqc kuonx naanh nyei ziangh hoc,
   meih bun yie maaih jauv cuotv.
   Tov korv-lienh yie, muangx yie daux gaux nyei waac.
  2O meih mbuo naaiv deix mienh aah!
   Meih mbuo oix mangc piex bun yie zuqc nyaiv taux haaix zanc?
  Meih mbuo oix longc maiv lamh longc nyei waac
   yaac lorz gorngv-baeqc nyei jauv taux haaix zanc? Selaa
  3Oix zuqc hiuv duqv Ziouv ginv cuotv gan longx Tin-Hungh nyei mienh weic ninh ganh.
   Yie heuc Ziouv nyei ziangh hoc, ninh yaac muangx yie.
  4Qiex jiez nyei ziangh hoc maiv dungx baamz zuiz.
   Bueix jienv coux sekv nzieqc nyei, yiem hnyouv longx-longx nyei hnamv. Selaa
  5Oix zuqc fongc horc dongh horpc zuqc fongc horc ziec nyei ga'naaiv,
   yaac sienx kaux Ziouv.
  6Maaih mienh camv gorngv, “Haaix dauh haih bun yie mbuo buatc haaix nyungc longx?”
   O Ziouv, tov bun meih nyei hmien nyei njang ziux yie mbuo.
  7Meih bun yie nyei hnyouv orn-lorqc gauh camv
   duqv mbiauh caux siang-a'ngunc diuv camv nyei mienh.
  8Yie oix baengh orn nyei bueix njiec m'njormh
   weic zuqc Ziouv aac, kungx meih ganh bun yie duqv yiem longx.