50
Vaajtswv yog tug kws txav txem
Axas zaaj nkauj
1Tug muaj fwjchim luj
kws yog Vaajtswv Yawmsaub has,
hab hu lub nplajteb txwj saab nub tuaj
moog txug saab nub poob.
2Vaajtswv ci huv lub nroog Xi‑oo tuaj,
yog lub nroog kws zoo nkauj kawg nkaus.
3Peb tug Vaajtswv tuaj,
nwg tsw tau nyob ntsag tu.
Muaj nplaim tawg kub ceev moog ua nwg ntej,
muaj cua daaj cua dub ntsawj hlub
vej puag ncig nwg.
4Nwg hu lub ntuj sau u hab lub nplajteb tuaj,
sub nwg txhad txav txem
rua nwg haiv tuabneeg has tas,
5“Ca le sau zog cov kws muab sab npuab kuv
lug cuag kuv,
yog cov kws muab tsaj xyeem
cog lug rua kuv.”
6Lub ntuj qha Vaajtswv txujkev ncaaj nceeg,
tsua qhov Vaajtswv yog tug kws txav txem ntaag.
7“Kuv haiv tuabneeg 'e,
ca le tig ntsej noog, kuv yuav has,
Yixayee 'e, kuv yuav ua timkhawv kom mej.
Kuv yog Vaajtswv, yog mej tug Vaajtswv.
8Kuv tsw ntuag mej txug qhov kws
mej muab tsaj xyeem.
Tej kws mej muab hlawv xyeem
nyob ntawm kuv lub xubndag tsw tu le.
9Kuv tsw cheem tsum ib tug txwv nyuj
ntawm mej lub tsev,
lossws ib tug txwv tshws
ntawm mej lub nkuaj hlo le.
10Tsua qhov txhua tug tsaj qus huv haav zoov,
hab tej tsaj txhu sau quas txheeb lub roob yog kuv le.
11Kuv paub txhua tug noog sau tej roob,
hab txhua tug tsaj kws nkaag huv tshaav zaub
yog kuv le.
12Yog kuv tshaib kuv yuav tsw has mej,
tsua qhov lub nplajteb
hab txhua yaam kws nyob huv yog kuv le.
13Kuv noj tej nqaj txwv nyuj
hab haus ntshaav tshws lov?
14Ca le coj tej lug ua tsaug
tuaj xyeem rua Vaajtswv,
hab pauj tej kws mej yeem lug r
ua tug kws Luj Dua Ndais.
15Ca le hu thov kuv rua nub kws raug ceblaaj,
kuv yuav cawm mej dim
hab mej yuav ua rua kuv tau koob meej.”
16Tassws Vaajtswv has rua
cov tuabneeg limham tas,
“Koj muaj feem daabtsw cim kuv tej kaab ke,
lossws koj daim tawv ncauj
has kuv tej lug cog tseg?
17Tsua qhov mej ntxub tej lug qhuab qha,
hab muab kuv tej lug
laim rua tom mej qub qaab.
18Yog mej pum tub saab
mej ca le nrug puab ua ke,
hab moog koom nrug cov tuabneeg
ua nkauj ua nraug ua ke.
19Mej qheb hlo mej lub ncauj has lug phem,
hab tej lug daag ntxag lu rawv mej tug nplaig.
20Mej nyob tsawg ab ham mej tej kwvtij,
mej tseed xyaav mej tej kwvtij kws koom nam.
21Mej tub ua tej nuav los kuv nyob tuabywv,
tes mej xaav tas kuv zoo ib yaam le mej.
Tassws nwgnuav kuv ntuag mej
hab has mej qhov txhum.
22“Mej cov kws nov qaab Vaajtswv,
ca le tshuaj saib zaaj nuav.
Yog tsw ua le nuav kuv yuav muab mej dua,
yuav tsw muaj ib tug twg paab tau mej dim.
23Tug kws coj tej lug ua tsaug tuaj xyeem
kuj yog ua rua kuv tau ntsej muag.
Kuv yuav ua Vaajtswv txujkev cawm dim
tshwm rua tug kws tu nwg lub neej raug cai.”