64

Singx Nzung 64

Daux Gaux Tov Tin-Hungh Beu Jienv

Jiu bun dorh nzung nyei mienh. Ndaawitv zoc nyei singx nzung.
  1Tin-Hungh aah! Yie tauv domh qiex nyei ziangh hoc tov muangx yie nyei qiex.
  Tov meih beu jienv yie nyei maengc, maiv zuqc win-wangv hoic.
  2Tov meih tengx yie bingx jienv beic ndiev daav za'eix wuov deix orqv mienh,
   caux wuov guanh ceux lunc nyei mienh.
  3Ninh mbuo nzioux ganh nyei mbietc hnangv nzuqc ndaauv nor laic,
   ninh mbuo gorngv cuotv im haic nyei waac hnangv ziangx haic nyei forng.
  4Ninh mbuo bingx jienv buonv maiv zoux dorngc nyei mienh,
   liemh zeih buonv ninh, ninh mbuo yaac maiv gamh nziex.
  5Ninh mbuo laanh kuinx laanh ei ninh mbuo waaic nyei za'eix zoux.
   Ninh mbuo beic ndiev caangh laangh zaeng hlaang hlopv mienh.
   Ninh mbuo hnamv daaih, “Haaix dauh haih mangc duqv buatc yie mbuo?”
  6Haaix dauh haih wetv cuotv yie mbuo zoux nyei waaic sic?
   Yie mbuo hnamv cuotv guaix haic nyei za'eix.”
   Mienh nyei hnyouv caux eix za'gengh ndo haic.
  7Mv baac Tin-Hungh oix longc forng-cang buonv ninh mbuo,
   ninh mbuo ziouc liemh zeih zuqc mun.
  8Weic zuqc ninh mbuo ganh nyei mbietc oix hoic ninh mbuo zuqc baaic.
   Da'faanh buatc ninh mbuo nyei mienh ziouc huangx m'nqorngv.
  9Zuangx mienh ziouc gamh nziex haic,
   oix zunh yaangh Tin-Hungh zoux nyei gong,
   yaac hnamv taux ninh zoux nyei sic.
  10Kuv mienh ziouc kaux Ziouv njien-youh
   yaac oix ndaauh kaux ninh.
   Hnyouv zingx nyei mienh yaac oix ceng ninh.