69
Quaj vem yog lwj sab
Sau rua tug thawj coj hu nkauj, lawv le lub suab Paaj Lilij. Tavi sau.
1Au Vaajtswv, thov cawm kuv dim,
tsua qhov dej nyaab nto kuv cej daab lawm.
2Kuv zum rua huv lub paag haav av tub tub
tsw muaj daabtsw tag taw.
Kuv lug rua huv qhov kws dej tub
mas dej ndwg lug nyaab hlo kuv.
3Kuv quaj quaj qaug zug taag,
kuv roj paas qhuav taag,
kuv qhov muag tsaus muag taag
vem kuv tog rawv kuv tug Vaajtswv.
4Cov tuabneeg kws laam ntxub kuv do do
mas muaj ntau dua
kuv cov plaubhau sau taubhau.
Cov tuabneeg kws xaav txuv kuv
muaj fwjchim heev,
puab laam ua yeeb ncuab rua kuv do do le.
Nwgnuav kuv yuav tsum thim
tej kws kuv tsw tau nyag moog hab lov?
5Au Vaajtswv, koj yeej paub tas kuv yuam kev,
tej kev txhum kws kuv ua
zais tsw tau ntawm koj.
6Au Vaajtswv Yawmsaub
kws muaj fwjchim luj kawg nkaus,
thov tsw xob ca cov kws vaam khom koj
raug txaaj muag vem tim kuv.
Au Yixayee tug Vaajtswv,
thov tsw xob ca cov kws nrhav koj
poob ntsej muag vem tim kuv.
7Vem saib rua koj mas kuv txhad raug thuaj
hab kev txaaj muag npug nkaus kuv lub plhu.
8Kuv raug ua ib tug qhua txawv ntsej muag
rua kuv cov kwvtij,
hab ua lwm haiv tuabneeg
rua kuv nam cov tub.
9Kuv kub sab quas lug rua koj lub tuam tsev
kawg daag kawg zug
mas tej lug kws luas thuaj koj
txhad poob rua sau kuv.
10Thaus kuv txu lub sab yoo mov⚓
mas kuv txhad raug luas thuaj luag.
11Thaus kuv muab khaub seev tsaaj lug naav
kuv tag luas ncauj luas lu.
12Cov kws nyob ntawm rooj loog
kuj has txug kuv,
cov kws quav dej quav cawv
phim nkauj hu txug kuv.
13Au Yawmsaub, kuv tug kheej
mas kuv thov koj.
Au Vaajtswv, lub swjhawm kws txaus koj sab,
thov koj teb kuv vem koj txujkev hlub
ruaj khov muaj nplua quas mag.
hab muab koj txujkev cawm dim
kws tso sab tau paab kuv.
14Thov cawm kuv dim
huv lub paag av kws zum,
thov tso kuv dim ntawm kuv cov yeeb ncuab
hab dim huv tej dej tub tub.
15Thov tsw xob ca dej ndwg nyaab hlo kuv,
thov tsw xob ca qhov dej tub nqog kuv,
tsw xob ca kev tuag tuab kaug kuv.
16Au Yawmsaub, thov koj teb kuv
tsua qhov koj txujkev hlub
kws ruaj khov zoo kawg.
Vem koj txujkev khuvleej muaj nplua quas mag
thov tig lug rua kuv.
17Koj tsw xob fee plhu ntawm koj tug qhev.
Kuv raug txom nyem lwj sab,
thov kawgkag teb kuv.
18Thov lug ze kuv, thov txhwv kuv dim,
thov tso kuv dim vem kuv muaj yeeb ncuab.
19Koj yeej paub tej kws luas thuaj kuv,
hab paub kuv kev txaaj muag
hab kev poob ntsej muag.
Koj yeej paub kuv cov tshawj chim
huvsw lawm.
20Kuv raug luas thuaj
ua rua kuv lub sab lwj taag
kuv txhad poob sab nthaav.
Kuv nrhav ib tug khuvleej tassws tsw muaj le,
kuv nrhav ib tug nplig kuv
tassws nrhav tsw ntswb.
21Puab muab tshuaj ab ua mov rua kuv noj,
thaus kuv nqhes dej
puab muab kua qaub rua kuv haus.
22Thov ca puab lub rooj noj
ua yej ua ntxab cuab puab,
ca puab tej kev noj haus xyeem rua Vaajtswv
ua qhov taub cuab puab.
23Thov kuas puab lub qhov muag tsaus,
puab txhad tsw pum kev,
hab ua kuas puab lub duav saav moog le.
24Thov nchuav koj txujkev npau tawg
rua sau puab
hab muab koj txujkev chim kws kub kawg
lawv kuas cuag puab.
25Ca puab lub yeej nyob do cuas,
tsw xob tseg leejtwg nyob
huv puab tej tsev ntaub.
26Puab tswm txom tug kws raug koj nplawm,
puab pheej pav txug tug kws koj
ua kuas mob lawd tej kev txom nyem.
27Thov koj rau txem rua puab
rau taag los rau thab,
thov koj tsw xob zaam puab lub txem le.
28Thov muab puab npe thuam huv phoo ntawv
kws sau cov tuabneeg caj tej npe moog,
tsw xob muab puab nce npe
rua huv cov tuabneeg ncaaj nceeg.
29Kuv raug kev txom nyem hab raug mob.
Au Vaajtswv, thov koj cawm kuv
hab muab kuv txawb rua lub chaw sab.
30Kuv yuav hu nkauj qhuas Vaajtswv lub npe,
kuv yuav ua nwg tsaug
qhuas nwg lub koob meej.
31Tej nuav yuav txaus Yawmsaub lub sab
heev dua le tua nyuj lossws xyeem
taag nrho txwv nyuj kub hab rau huvsw.
32Ca cov kws raug quab yuam
pum hab zoo sab.
Mej cov kws nrhav Vaajtswv,
ca mej lub sab rov muaj zug,
33tsua qhov Yawmsaub
noog cov tuabneeg txom nyem,
hab tsw nov qaab
nwg cov tuabneeg kws raug kaw.
34Lub ntuj lub teb hab dej havtxwv
hab txhua yaam kws moog moog lug lug rua huv
ca le qhuas nwg.
35Tsua qhov Vaajtswv yuav
cawm Xi‑oo kuas dim,
hab yuav tswm Yuta tej moos dua tshab,
mas nwg cov tuabneeg yuav tau nyob rua huv
ua puab teej puab tug,
36nwg cov qhev tej tub ki
yuav tau ua qub txeeg qub teg,
hab cov kws nyam Vaajtswv lub npe
yuav nyob rua huv.