75

Singx Nzung 75

Tin-Hungh Zatv Orqv Mienh Njiec, Bouh Kuv Mienh Faaux

Jiu bun dorh nzung nyei mienh. Longc “Maiv Dungx Mietc” nyei pou. Aasaapc zoc nyei singx nzung. Yietc diuh nzung.
  1O Tin-Hungh aac, yie mbuo dor-ziec meih aqv.
   Yie mbuo dor-ziec meih, weic zuqc meih yiem nitv fatv.
   Yie mbuo zunh yaangh meih zoux mbuoqc horngh nyei sic.
  2Tin-Hungh gorngv, “Ziux yie dingc daaih nyei ziangh hoc
   yie oix baengh fim nyei siemv zuiz.
  3Baamh gen caux yiem baamh gen nyei yietc zungv mienh lungh lungh laih laih wuov zanc,
   se yie ganh baav jienv baamh gen nyei ndiouh. Selaa
  4Yie gorngv mbuox ceng-hlo nyei mienh, “Maiv dungx ceng-hlo.”
   Yaac gorngv mbuox orqv mienh, “Maiv dungx bungx waac-maux.
  5Maiv dungx taaih ganh hlo, bungx waac-maux,
   fai ngorngz jienv jaang gorngv waac.”
  6Bouh mienh faaux hlang maiv zeiz yiem dong bung fai bung daaih,
   yaac maiv zeiz yiem deic-bung-huaang daaih.
  7Se Tin-Hungh dunx sic.
   Ninh zatv yietc dauh njiec aiv, bouh yietc dauh faaux hlang.
  8Weic zuqc yiem Ziouv nyei buoz maaih norm zaanv,
   dapv buangv maaih mbiaauz nyei diuv, peux duqv longx nyei.
  Ninh oix dox cuotv daaih,
   baamh gen nyei yietc zungv orqv mienh oix hopv nqaai nzengc.
  9Mv baac yie nor, yie oix yietc liuz zunh yaangh naaiv deix sic.
   Yie oix baaux nzung ceng Yaakopv nyei Tin-Hungh.
  10Yie oix zoux waaic orqv mienh nyei qaqv,
   mv baac bun kuv mienh nyei qaqv henv jienv faaux.