76
Vaajtswv yog tug kov yeej hab teem txem
Sau rua tug thawj coj hu nkauj, yuav swv nkauj nog ncaas. Yog Axas zaaj nkauj. Yog zaaj nkauj hu.
1Huv Yuta puavleej paub Vaajtswv,
Vaajtswv lub npe nrov nchaa
thoob huv Yixayee.
2Vaajtswv lub chaw nyob yog huv Xalee,⚓
nwg lub tsev nyob yog huv Xi‑oo.
3Nwg nyob qhov ntawd
muab raab xub kws ci nplaag
hab tej daim phaj hlau hab tej ntaaj
hab tej cuab yeej ua rog
luv pis ntho pov tseg.
4Koj tug fwjchim ci ntsaa quas ab,
koj tug fwjchim meej mom
sab dua tej roob kws nyob moog ib txhws.
5Tej tuabneeg sab luj sab tuab
raug muab lws lawm,
puab tsaug zug moog ib txhws.
Cov tub rog suavdawg swv tsw tau
puab txais teg lawm.
6Au Yakhauj tug Vaajtswv,
thaus koj tshev puab
mas cov neeg hab cov kws caij neeg
feeb tuag taag.
7Koj yog tug kws txaus ntshai kawg.
Thaus koj chim leejtwg yuav sawv tau
ntawm koj xubndag?
8Koj nyob sau ntuj
muab kev txav txem tshaaj tawm,
mas lub nplajteb ntshai hab nyob tuabywv,
9rua thaus Vaajtswv sawv tseeg teem txem
cawm cov tuabneeg suavdawg
kws raug quab yuam huv nplajteb kuas dim.
10Tuabneeg tej kev chim
ua rua luas qhuas koj ntau dua,
cov kws dim tej kev chim hov,
koj yuav muab sa hlo rua ntawm duav.
11Ca le yeem lug rua Yawmsaub
kws yog mej tug Vaajtswv
hab ua lawv le tej lug yeem tseg hov.
Ca cov kws nyob vej puag ncig nwg
coj hov txhua chaw tuaj pub rua nwg,
yog tug kws tswm nyog ntshai hab fwm,
12hab yog tug kws txu cov thawj tej fwjchim,
yog tug kws tej vaajntxwv huv nplajteb
ntshai kawg.