76

Singx Nzung 76

Yaakopv Nyei Tin-Hungh Hingh Jiex Nyei Qaqv

Jiu bun dorh nzung nyei mienh. Oix zuqc longc patv nyei jaa-sic. Aasaapc zoc nyei singx nzung. Yietc diuh nzung.
  1Yiem Yu^ndaa Deic mienh hiuv duqv Tin-Hungh.
   Yiem I^saa^laa^en ninh nyei mengh hlo haic.
  2Yiem Saalem ninh liepc ninh nyei ndopv-liuh,
   ninh yiem nyei dorngx se ⟨Si^on.⟩
  3Yiem wuov ninh wuotv nauv maaih douz nyei forng-cang,
   torngv-baaih, nzuqc ndaauv caux yietc zungv mborqv jaax nyei wuoqc ginc. Selaa
  4O Tin-Hungh aac, meih za'gengh njang-laangc haic.
   Meih gauh hlo gauh njang-laangc jiex yietc liuz yiem nyei mbong.
  5Ninh mbuo hnyouv henv nyei mienh nyei ga'naaiv zungv zuqc caangv nzengc.
   Ninh mbuo daic nzengc mi'aqv.
  Mborqv jaax nyei zuangx mienh,
   maiv maaih haaix dauh haih cau duqv buoz jiez aqv.
  6O Yaakopv nyei Tin-Hungh aac, meih hatc ninh mbuo wuov zanc
   ninh mbuo nyei maaz caux geh maaz mienh ziouc daic mi'aqv.
  7Mv baac mienh gamh nziex nyei se kungx meih ganh hnangv.
   Meih qiex jiez nyei ziangh hoc haaix dauh haih yiem meih nyei nza'hmien?
  8Meih yiem gu'nguaaic lungh gorngv siemv zuiz nyei waac,
   lungh ndiev gamh nziex, yaac sekv nzieqc nyei,
  9dongh Tin-Hungh daaih dingc zuiz,
   oix njoux yietc zungv yiem baamh gen zuqc zeix nyei mienh. Selaa
  10Baamh mienh qiex jiez, haih bun mienh gauh oix ceng meih.
   Zuqc meih nouz zengc njiec nyei mienh,
   oix yiem nitv fatv meih.
  11Meih mbuo oix zuqc ⟨laengz ngaengc waac⟩ bun Ziouv, meih mbuo nyei Tin-Hungh, yaac ei jienv naaiv deix laengz nyei waac zoux.
   Oix zuqc bun weih gormx nyei mienh dorh zingh nyeic daaih
   bun mienh oix zuqc taaih nyei Ziouv.
  12Ninh zatv jienv zoux hlo wuov deix nyei hnyouv,
   bun lungh ndiev nyei hungh diex gamh nziex ninh.