Nau Brah Ndu gŭ n'ho ro jêh ri nau bunuyh gŭ rêh ƀât lât nau Y-Môise bunuyh Brah Ndu, mbơh sơm.
 ¹Ơ Kôranh Brah, may jêng jêh ntŭk hên gŭ. Tâm lĕ rngôch rnôk.
 ²Lor ma bu deh ma phung yôk,
 Jêh ri lor may njêng neh jêh ri neh ntu.
 Bơh rnôk n'ho ro, ma rnôk n'ho ro may jêng Brah Ndu.
 ³May mplơ̆ lơi bunuyh ma ndruyh neh,
 Jêh ri may lah, Ơ phung kon bunuyh, plơ̆ sĭt hom.
 ⁴Yorlah du rbăn năm ta năp măt may;
 Jêng nâm bu nar nđaơ lăn jêh, jêh ri tâm ban ma du sruh gak dôl măng.
 ⁵May sŏk lơi khân păng nâm bu dak rdu; nâm bu lêt bêch;
 Khân păng jêng nâm bu gơ̆ hon ôi.
 ⁶Păng kao ơm ôi; jêh ri hon;
 Bu koh păng mhaơ, jêh ri kro.
 ⁷Yorlah nau may nuih su hên jêh,
 Jêh ri nau may nuih ƀư rŭng hên.
 ⁸May dơn jêh nau kue hên ta năp may;
 Jêh ri ta năp nau ang muh măt may nau tih hên ndâp.
 ⁹Lĕ rngôch nar hên roh ta năp nau may ji nuih;
 Hên saơ năm hên lôch nâm bu suh n'hâm.
 ¹⁰Nar năm hên gŭ rêh jêng pơh jât năm
 Mâu lah ma phung katang lơn jêng pham jât năm;
 Ăt nau sưr khân păng jêng nau ŏk jêh ri nau rngot;
 Yorlah Păng rgăn ngăch jêh ri hên mpăr du.
 ¹¹Mbu gĭt năl nau brah nau may ji nuih;
 Nđâp ma nau may nuih tĭng nâm nau klach yơk khư ma may?
 ¹²Pô ri sâm nti hom hên blau kơp nar hên.
 Gay ma nuih n'hâm hên pơk nau gĭt mĭn.
 ¹³Lŏ sĭt, Ơ Yêhôva; ndah nâm jŏ?
 Tâm rgâl lơi nau may ƀư di ma phung oh mon may.
 ¹⁴Ăp ôi n'hơm hên ma nau ueh may;
 Gay ma hên mra răm jêh ri maak lĕ nau rêh hên.
 ¹⁵Ƀư maak nuih n'hâm hên, ăn tâm ban đah nar may ƀư rêh ni jêh hên.
 Ăn tâm ban đah năm hên saơ jêh nau mhĭk.
 ¹⁶Ăn kan may tâm mpơl ma phung oh mon may.
 Jêh ri nau chrêk rmah may ma phung kon khân păng.
 ¹⁷Ăn nau yô̆ Kôranh Brah, Brah Ndu hên, gŭ ta kalơ hên; Ƀư nâp hom kan hên ƀư;
 Nanê̆, ƀư nâp hom kan ti hên ƀư.