95

Nau Tâm Rnê Ma Yêhôva Jêh Ri

 Nau ăn njrăng ma nau mâu chroh
1Văch hom, ăn he tâm rnê ma Yêhôva.
 Ăn he nter maak ma lŭ nau tâm rklaih he.
2Ăn he hăn ta năp Păng ma nau tâm rnê;
 Ăn he nter hâk ma Păng ma nau mprơ ơm.
3Yorlah Yêhôva jêng Brah Ndu toyh.
 Păng jêng hađăch toyh ta kalơ lơn ma lĕ rngôch brah.
4Ntŭk jru tâm neh ntu gŭ tâm ti Păng;
 Jêh ri kô yôk jêng ndơ Păng;
5Dak rlai jêng ndơ Păng jêh ri Păng njêng;
 Neh sơh tâm ban lĕ, ti păng yơh nkra.
6Văch hom, ăn he chon mon jêh ri yơk;
 Ăn he chon kômâk ta năp Yêhôva, nơm rhăk njêng he.
7Yorlah Păng jêng Brah Ndu he,
 He jêng phung ƀon lan tâm ndrâch gơ̆ nse Păng. Jêh ri phung biăp ti Păng njŭn,
 Nar aơ tơ lah khân ay may tăng bâr Păng.
8Lơi ƀư dăng ôh nuih n'hâm khân may nâm bu ta Mêriba.
 Nâm bu ta nar Masa, tâm ndrêch rdah;
9Ta nây phung mbơ̆ khân may rlong uănh jêh Gâp,
 Khân păng rlong uănh Gâp, jêh ri saơ jêh kan Gâp.
10Dôl tâm puăn jât năm gâp rngot yor phung mpôl băl nây,
 Pô ri Gâp lah, khân păng jêng du phung ƀon lan teng trong mâu gĭt năl ôh trong Gâp;
11Yor nây Gâp sân săk jêh tâm nau gâp ji nuih.
 Khân păng mâu mra lăp tâm nau Gâp rlu ôh.