8

  1Haaix dauh haih hnangv cong-mengh mienh?
   Haaix dauh haih porv mengh sic nyei eix leiz?
  Mienh nyei cong-mengh bun ninh nyei hmien njang,
   yaac bun ninh ciouv nyei hmien tiuv mingh.

Oix Zuqc Muangx Hungh Diex

2Oix zuqc muangx hungh diex nyei lingc yaac maiv dungx la'guaih dorng jienv Tin-Hungh ⟨laengz jiez ngaengc waac.⟩ 3maiv dungx huaang jienv leih hungh diex nyei nza'hmien. Maiv dungx tengx jienv baav orqv nyei jauv weic zuqc hungh diex m'daaih ei ganh nyei hnyouv zoux. 4Hungh diex nyei waac maaih hatc maaz. Maaih haaix dauh gaamv naaic ninh, “Meih zoux haaix nyungc?”
  5Haaix dauh ei jienv ninh nyei lingc zungv maiv zuqc hoic.
   Hnyouv maaih cong-mengh nyei mienh hiuv duqv horpc nyei ziangh hoc caux horpc nyei za'eix.
  6Weic zuqc nyungc-nyungc sic maaih horpc nyei ziangh hoc caux horpc nyei za'eix,
   maiv gunv mienh nyei kouv naanc ngatv jienv ninh mbuo.
  7Maiv maaih haaix dauh hiuv oix cuotv daaih nyei sic,
   weic zuqc maiv maaih haaix dauh haih gorngv mbuox ninh, sic oix hnangv haaix nor cuotv.
  8Maiv maaih mienh maaih hatc maaz gunv duqv ziangh maengc nyei qiex,
   fai maaih hatc maaz gunv daic nyei hnoi.
  Mborqv domh jaax nyei ziangh hoc, maiv maaih haaix dauh piatv duqv ndutv, maiv zuqc mborqv jaax.
   Orqv nyei jauv maiv haih njoux zoux orqv nyei mienh.
9Yie longc hnyouv mangc yiem seix zaangc nyei nyungc-nyungc sic, yie buatc naaiv deix yietc zungv. Maaih ziangh hoc naaiv dauh gunv wuov dauh ziouc hoic zuqc ninh ganh aqv. 10Yie aengx buatc orqv mienh daic mingh zangx jienv. Ninh zinh ndaangc yiem cing-nzengc dorngx bieqc bieqc cuotv-cuotv. Maaih yiem ninh zoux waaic sic wuov norm zingh nyei mienh ceng ninh. Naaiv yaac kungx-morngh.
11Dingc liuz zuiz mv baac maiv siepv-siepv nyei ei jienv dingc daaih nyei zoux, zuangx mienh ziouc maaih hnyouv zoux orqv sic. 12Maiv gunv orqv mienh zoux orqv yietc baeqv nzunc, corc duqv ziangh siouc nyuonh ndaauv, yie hiuv duqv gamh nziex Tin-Hungh nyei mienh, se yiem ninh nyei nza'hmien taaih ninh wuov deix, oix duqv longx. 13Mv baac orqv mienh maiv haih duqv longx. Ninh ziangh nyei hnoi-nyieqc hnangv dongh linh nor, maiv haih ndaauv, weic zuqc ninh maiv gamh nziex Tin-Hungh.
14Yiem naaiv lungh ndiev aengx maaih yietc nyungc sic kungx-morngh. Kuv mienh buangh nyei sic se puix orqv mienh oix zuqc buangh nyei. Orqv mienh yaac buangh puix kuv mienh oix zuqc buangh nyei. Yie gorngv naaiv se fih hnangv nyei kungx-morngh. 15Yie ziouc heuc mienh njien-youh orn-lorqc, weic zuqc yiem naaiv seix zaangc maiv maaih haaix nyungc gauh longx mienh duqv nyanc duqv hopv, bun ganh a'hneiv orn-lorqc. Weic zuqc Tin-Hungh bun mienh yiem seix zaangc ziangh nyei hnoi-nyieqc laauh luic nyei ziangh hoc maaih naaiv deix njien-youh nyei jauv caux jienv.
16Yie jiez hnyouv oix hiuv cong-mengh nyei jauv yaac oix mangc lungh ndiev zoux nyei sic wuov zanc, (maiv gunv mienh ziangh hnoi ziangh muonz maiv duqv bueix m'njormh), 17yie ziouc buatc Tin-Hungh zoux nyei yietc zungv sic. Mienh maiv haih mengh baeqc yiem naaiv seix zaangc cuotv daaih nyei sic. Maiv gunv ninh mbuo longc nzengc qaqv lorz, ninh mbuo maiv haih lorz maiv cuotv. Maiv gunv cong-mengh mienh hnamv daaih ninh hiuv nyei, mv baac ninh zungv maiv haih hiuv aqv.