6

Da'betv Nyungc Laauc Yaangh Nyei Sic

Biei Norm Mborqv Jaax Nyei Maaz-Cie

1Yie aengx cau hmien mangc, buatc biei norm mborqv jaax nyei maaz-cie yangh i norm mbong mbu'ndongx-qangx cuotv daaih. Wuov deix mbong benx dongh siqv mbong. 2Da'yietv jaax cie nyei maaz siqv nyei, da'nyeic jaax nyei maaz jieqv nyei, 3da'faam jaax nyei maaz baeqc nyei, da'feix jaax nyei maaz jieqv-baeqc ben nyei, yietc diemv yietc diemv. 4Yie ziouc naaic caux yie gorngv waac wuov dauh fin-mienh, “Yie nyei Domh Gorx aac, naaiv deix se haaix nyungc?”
5Fin-mienh dau yie, “Naaiv se lungh nyei biei bung nziaaux. Ninh mbuo coqv hoqc yiem lungh ndiev nyei Ziouv nyei nza'hmien cuotv daaih. 6Maaz-jieqv wuov jaax maaz-cie mingh baqv bung. Maaz-baeqc wuov jaax mingh fai bung, maaz jieqv-baeqc ben nyei yietc diemv yietc diemv wuov jaax mingh naamh bung.”
7Naaiv deix maaz cuotv daaih beqv jienv oix mingh zaah baamh gen. Fin-mienh ziouc gorngv, “Gunv mingh aqv, mingh zaah lungh ndiev.” Ninh mbuo ziouc cuotv mingh zaah gormx lungh ndiev.
8Fin-mienh aengx heuc jienv gorngv mbuox yie, “Mingh baqv bung nyei maaz bun Ziouv yiem baqv bung nyei deic-bung ga'qiex fiu.”

Tengx Yo^su^waa Ndongx Jienv Jiem-Ningv Zoux Jangx-Hoc

9Yie aengx duqv zipv Ziouv nyei waac gorngv, 10“Meih oix zuqc mingh zuqc guaatv mingh Mbaa^mbi^lon nzuonx daaih nyei mienh Hen^ndai, To^mbi^yaa, caux Ye^ndaa^yaa wuov, zorqv jiem nyaanh. Dongh wuov hnoi yaac oix zuqc mingh Se^fan^yaa nyei dorn, Yo^si^yaa, nyei biauv. 11Dorh naaiv deix jiem nyaanh zoux norm ningv yaac tengx Yo^saa^ndatc nyei dorn, Yo^su^waa domh sai mienh, ndongx jienv m'nqorngv. 12Oix zuqc mbuox ninh, ‘Mangc maah! Maaih dauh mienh, mbuox heuc Nquaah, weic zuqc ninh oix yiem ninh nyei dorngx hiaangx jiez daaih. Ninh yaac oix ceix Ziouv nyei biauv. 13Dongh naaiv dauh oix ceix zaangc Ziouv nyei biauv, yaac oix duqv hungh nyei njang-laangc. Ninh oix zueiz jienv ninh nyei weic gunv aengx zueiz ninh nyei weic zoux sai mienh. I nyungc jauv yaac horpc fim dongh eix nyei zoux.’ 14Wuov norm ningv oix zuqc an jienv zaangc Ziouv nyei biauv weic jangx Hen^ndai, To^mbi^yaa, Ye^ndaa^yaa caux Se^fan^yaa nyei dorn, Yo^si^yaa. 15Yiem go nyei mienh oix daaih tengx jienv ceix zaangc Ziouv nyei biauv. Meih mbuo ziouc hiuv duqv Nernh Jiex nyei Ziouv paaiv yie daaih meih mbuo naaiv. Se gorngv meih mbuo longc hnyouv muangx Ziouv, meih mbuo nyei Tin-Hungh, nyei waac, naaiv deix sic ziouc cuotv daaih.”