4

Ziouv Bun Mose Zoux Mbuoqc Horngh Haic Nyei Jangx-Hoc

1Mose dau, “Se gorngv I^saa^laa^en Mienh maiv sienx yie yaac maiv muangx yie gorngv nyei waac, ninh mbuo gorngv, ‘Ziouv maiv hinc cuotv bun meih buatc,’ wuov nyungc hnangv haaix nor zoux?”
2Ziouv naaic gaax ninh, “Ih zanc meih nyei buoz nanv haaix nyungc?”
 Mose dau, “Yie nanv biaav-mbiaac.”
3Ziouv gorngv, “Guaengx njiec ndau maah!”
 Mose ziouc guaengx biaav-mbiaac njiec ndau. Biaav-mbiaac ziouc benx diuh naang daaih, haeqv ninh biaux nqoi mi'aqv.
4Ziouv gorngv mbuox Mose, “Sung buoz nanv jienv naang-dueiv maah!” Mose ziouc sung buoz nanv jienv naang-dueiv. Naang ziouc aengx benx biaav-mbiaac mi'aqv. 5Ziouv gorngv, “Hnangv naaiv zoux weic bun I^saa^laa^en Mienh hiuv duqv Ziouv, ninh mbuo nyei ong-taaix nyei Tin-Hungh, se Apc^laa^ham nyei Tin-Hungh, I^sakc nyei Tin-Hungh caux Yaakopv nyei Tin-Hungh, hinc cuotv bun meih buatc.”
6Ziouv aengx mbuox Mose, “Zorqv meih nyei buoz lom bieqc meih nyei lui-gem maah!” Mose ziouc lom bieqc lui-gem. Hluotv buoz cuotv daaih buatc benx ⟨gomh huv baengc,⟩ mbopv baeqc nyei, hnangv sorng nor.
7Tin-Hungh gorngv, “Aengx lom nzunc lui-gem maah!” Mose ziouc aengx lom bieqc lui-gem. Hluotv buoz cuotv daaih buatc longx mi'aqv, hnangv loz wuov nor, caux sin zaangc nyei ndopv fih hnangv nzengc.
8Tin-Hungh aengx gorngv, “Se gorngv I^saa^laa^en Mienh maiv sienx meih nyei waac fai maiv sienx daauh nzunc mbuoqc horngh nyei jangx-hoc, nziex ninh mbuo sienx da'nyeic nzunc nyei jangx-hoc. 9Mv baac se gorngv ninh mbuo maiv sienx naaiv deix i nyungc jangx-hoc yaac maiv muangx meih nyei waac nor, meih oix zuqc ndamv deix Nai^aa Ndaaih nyei wuom dox njiec ndau-nqaai. Meih ndamv nyei wuom ziouc yiem wuov ndau-nqaai benx nziaamv mi'aqv.”
10Mose aengx gorngv mbuox Ziouv “O Ziouv aac, yie m'daaih maiv haih gorngv waac mbiaangc nyei mienh. Jiex daaih nyei ziangh hoc maiv haih. Meih caux yie, meih nyei bou, gorngv waac taux ih zanc yie corc maiv haih gorngv waac mbiaangc. Yie gorngv waac donc, ngamh ngamh ngutv-ngutv nyei.”
11Ziouv gorngv mbuox ninh, “Haaix dauh zeix mienh nyei nzuih? Haaix dauh bun mienh m'normh ndung, maiv haih gorngv waac? Haaix dauh bun mienh mangc duqv buatc fai bun mienh m'zing maengh? Se yie, Ziouv ganh hnangv, maiv zeiz? 12Meih gunv mingh aqv. Yie ganh oix tengx meih gorngv. Horpc zuqc hnangv haaix nor gorngv yie yaac njaaux meih.”
13Mv baac Mose dau, “Ziouv aah! Tov meih paaiv ganh dauh mingh maah!”
14Ziouv qiex jiez haic Mose. Ninh gorngv, “Wuov nyungc, meih nyei gorx, Lewi Mienh, ⟨Aalon,⟩ ni? Yie hiuv duqv ninh gorngv waac mbiaangc nyei. Ninh zungv cuotv jauv daaih lorz meih aqv. Ninh duqv buatc meih, ninh za'gengh a'hneiv haic. 15Meih caux ninh gorngv maah! Oix zuqc mbuox ninh horpc zuqc hnangv haaix nor gorngv. Yie oix tengx meih mbuo i dauh gorngv waac yaac njaaux meih mbuo oix zuqc hnangv haaix nor zoux. 16Aalon oix tengx meih doix baeqc fingx gorngv waac div meih, hnangv meih ganh nyei nzuih gorngv nor. Meih yaac oix zoux hnangv ninh nyei Tin-Hungh. 17Ninh yaac oix zuqc dorh jienv meih nyei buoz nanv jienv naaiv diuh biaav-mbiaac mingh longc zoux mbuoqc horngh nyei sic.”

Mose Nzuonx I^yipv Deic-Bung

18Mose nzuonx mingh mbuox ninh nyei ong-daa, Yeto, “Tov bun yie nzuonx I^yipv Deic-Bung mangc gaax, yie nyei muoz-doic corc yiem nyei fai?”
 Yeto gorngv, “Gunv baengh orn nyei nzuonx oc.”
19Mose corc yiem Mi^ndien Deic-Bung wuov zanc Ziouv aengx mbuox ninh, “Meih gunv nzuonx I^yipv Deic-Bung aqv. Oix daix meih wuov deix mienh yietc zungv daic nzengc mi'aqv.” 20Mose ziouc bun ninh nyei auv caux i dauh dorn geh jienv lorh cuotv jauv nzuonx I^yipv Deic-Bung. Mose nanv jienv Tin-Hungh mbuox ninh dorh wuov diuh biaav-mbiaac mingh.
21Ziouv aengx gorngv mbuox Mose, “Meih nzuonx taux I^yipv Deic-Bung nyei ziangh hoc, oix zuqc dorng jienv Faalo Hungh zoux dongh yie bun meih maaih qaqv zoux wuov deix nyungc-nyungc mbuoqc horngh nyei sic. Mv baac yie oix bun Faalo nyei hnyouv ngaengc, ninh ziouc maiv kangv bun I^saa^laa^en Mienh mingh. 22Meih oix zuqc gorngv mbuox Faalo, ‘Naaiv se Ziouv ganh gorngv, “I^saa^laa^en Mienh se yie nyei dorn-hlo. 23Yie mbuox meih bun yie nyei dorn-hlo mingh zaangc yie.” Meih maiv kangv bun ninh mbuo mingh nor, yie oix daix meih nyei dorn-hlo.’ ”
24Yiem jauv zaangc ninh mbuo hitv jiex muonz nyei yietc norm dorngx, Ziouv aengx daaih buangh Mose, oix daix ninh. 25Sipc^bo^laa ziouc zorqv kuaaiv la'bieiv laic nyei, gaatv ninh nyei dorn nyei jaix-zueiv ndopv daaih guoqv Mose nyei zaux yaac gorngv, “Meih se yie longc nziaamv duqv daaih nyei siang-laangh.” 26Ziouv ziouc maiv zoux haaix nyungc bun Mose. (Sipc^bo^laa gorngv, “Meih se yie longc nziaamv duqv daaih nyei siang-laangh,” wuov deix waac gorngv zuqc ⟨jiex gaatv nyei leiz.⟩)
27Ziouv gorngv mbuox Aalon, “Mingh wuov deic-bung-huaang buangh Mose maah!” Aalon ziouc mingh buangh Mose yiem Tin-Hungh nyei mbong wuov, ziouc zom Mose. 28Mose ziang Ziouv paaiv ninh gorngv nyei yietc zungv waac mbuox Aalon, yaac mbuox ninh taux Ziouv heuc ninh zoux wuov deix mbuoqc horngh haic nyei jangx-hoc. 29Mose caux Aalon ziouc heuc I^saa^laa^en Mienh nyei zuangx ⟨mienh gox⟩ gapv zunv. 30Aalon ziouc ziang Ziouv mbuox Mose nyei yietc zungv waac mbuox ninh mbuo. Ninh yaac dorng jienv baeqc fingx zoux nzengc wuov deix mbuoqc horngh haic nyei jangx-hoc. 31Baeqc fingx ziouc sienx. Ninh mbuo haiz gorngv Ziouv daaih lorz ninh mbuo I^saa^laa^en Mienh yaac buatc ninh mbuo zuqc mienh hoic nyei kouv naanc, ninh mbuo ziouc ndoqv njiec baaix Ziouv