Matv^taai Fiev Nyei Kuv Fienx
 Matv^taai Fiev Nyei Kuv Fienx Matv^taai fiev bun mbuo hiuv duqv Yesu se dongh Tin-Hungh laengz paaiv daaih wuov dauh Njoux Ziouv. Zinh ndaangc yiem Loz-Ngaengc Waac Sou, Tin-Hungh laengz paaiv dauh Njoux Ziouv daaih njoux ninh nyei mienh, se dongh Yesu Giduc. Yesu cuotv seix daaih benx dauh Yiutai Mienh mv baac naaiv kuv fienx se maiv zeiz weic Yiutai Mienh hnangv. Se weic lungh ndiev maanc mienh.
 Matv^taai gorngv muonc Yesu nyei douh zong caux Yesu cuotv seix nyei jauv-louc. Ninh yaac gorngv Yesu ⟨jiex wuom nyei leiz,⟩ nqa'haav yiem wuov deic-bung-huaang zuqc Saadaan seix. Matv^taai aengx gorngv Yesu yiem Gaa^li^li Saengv zunh doz, njaaux mienh, zorc mienh nyei baengc. Setv mueiz fiev Yesu yiem Gaa^li^li njiec taux Ye^lu^saa^lem Zingh, yaac gorngv Yesu maiv gaengh daic wuov norm leiz-baaix gu'nyuoz cuotv daaih nyei sic. Ninh yaac gorngv muonc Yesu yiem ziepc nzaangc jaax daic, nqa'haav aengx nangh daaih nyei jauv.
 Naaiv buonv Matv^taai Fiev Nyei Kuv Fienx bun mbuo hiuv duqv Yesu zoux Domh Fin-Saeng. Ninh maaih Tin-Hungh nyei hatc maaz porv mengh Tin-Hungh nyei leiz-latc yaac njaaux mienh hiuv duqv Tin-Hungh zoux Ziouv gunv mienh hnangv haaix nor. Yesu njaaux nyei waac bun nqoi zoux biaa ginc. Da'yietv, ninh yiem mbong zunh doz njaaux mienh, dongh duqv Tin-Hungh zoux Ziouv gunv nyei mienh hnangv haaix nor (5-7 zaang). Da'nyeic, Yesu paaiv ninh nyei ziepc nyeic dauh sai-gorx mingh zunh kuv fienx (10 zaang). Da'faam, Yesu gorngv Tin-Hungh daaih zoux Ziouv gunv mienh nyei waac-beiv (13 zaang). Da'feix, Yesu gorngv haaix dauh oix zoux ninh nyei sai-gorx oix zuqc hnangv haaix nor (18 zaang). Da'hmz, naaiv norm lungh ndiev nyei hnoi-nyieqc oix jiex, Tin-Hungh daaih zoux Ziouv gunv mienh nyei ziangh hoc oix taux (24-25 zaang).

1:1-2:23 Yesu Giduc nyei douh zong caux Yesu cuotv seix nyei jauv

3:1-12 Tengx mienh jiex wuom nyei leiz wuov dauh Yo^han zoux nyei gong

3:13-4:11 Yesu jiex wuom nyei leiz yaac zuqc Saadaan seix

4:12-18:35 Yesu yiem Gaa^li^li Saengv zoux gong

19:1-20:34 Yesu yiem Gaa^li^li Saengv njiec taux Ye^lu^saa^lem Zingh

21:1-27:66 Yesu maiv gaengh daic wuov norm leiz-baaix

28:1-20 Yesu nangh daaih yaac hinc cuotv bun mienh buatc