Mathia bữn ramứh Lê-vi hỡ. Án la manoaq tễ tỗp muoi chít la bar náq ca rien tễ Yê-su. Tễ nhũang, án la cũai parỗm ĩt práq thễq. Án chĩc saráq nâi sám 50 toâq 60 cumo ntun Yê-su canỡt. Mathia chĩc atỡng parnai o tễ Yê-su, án ca Yiang Sursĩ khoiq ữq tâng Parnai Par‑ữq Tiaq. Tam Mathia chĩc parnai o nâi yỗn tỗp I-sarel dáng raloaih, parnai nâi tỡ cỡn yỗn ống cũai I-sarel sâng, ma yỗn nheq tữh cũai.
 Mathia chĩc atỡng tễ nheq dỡi tamoong Yê-su. Án atỡng tễ Yê-su canỡt, roap batễm, ramóh yiang Satan chim, cớp pỡq atỡng parnai Yiang Sursĩ. Yê-su táq ranáq salễh sa‑ữi ramứh. Án palai satoaq máh cũai a‑ĩ ỡt tâng máh vil cruang Cali-lê. Chơ, tễ ki án chỗn chu vil Yaru-salem. Ỡt tâng ntốq ki án chĩuq noau táq án, noau téh án tâng aluang sangcáng. Chơ án cuchĩt cớp tamoong loah.
 Mathia chĩc atỡng yỗn hái dáng Yê-su la thâi bữn chớc lứq. Cớp án bữn ŏ́c roan rangoaiq, dŏq aloŏh ngê tễ phễp rit Yiang Sursĩ, cớp atỡng nheq tữh cũai dáng tễ Yiang Sursĩ cỡt sốt.