Saráq Patâp Loah nâi, bữn noau pai Môi-se chĩc sám 1500 cumo nhũang dỡi Yê-su. Môi-se la cũai táq ranáq Yiang Sursĩ. Saráq nâi Môi-se catoaih atỡng loah máh cũai proai I-sarel bo alới noâng ỡt tâng cutễq cruang Mô-ap, nhũang alới mut pỡ cruang Yiang Sursĩ ữq ễ yỗn alới. Môi-se ruaih loah tễ máh ranáq túh coat, cớp máh ranáq salễh Yiang Sursĩ táq chuai alới tâng 40 cumo khoiq vớt. Cớp án patâp alới yỗn trĩh cớp táq tanoang tapứng lứq chóq Yiang Sursĩ.
 Môi-se atỡng tễ ranáq ayông cũai proai I-sarel pỡq chu cutễq Yiang Sursĩ khoiq par‑ữq ễ chiau yỗn tỗp alới. Cớp Môi-se patâp alới yống pacái máh ŏ́c Yiang Sursĩ khoiq parkhán cớp alới. Án atỡng alới neq: “Máh cũai I-sarel ơi! Cóq anhia tamứng yỗn samoât máh ramứh nâi! Lứq ống Yiang Sursĩ toâp cỡt Ncháu tỗp hái. Cóq anhia ayooq Yiang Sursĩ nheq tễ mứt pahỡm, nheq tễ sarnớm, cớp nheq tễ rangứh rahỡ anhia.” (Pún 6:5)
 Yiang Sursĩ yỗn Yô-sũa roap mpỗl nhêng salĩq cũai proai I-sarel pláih Môi-se. Môi-se pai ŏ́c bốn yỗn tỗp I-sarel. Vớt ki Môi-se cuchĩt.