1Vem le caag ib tsoom tebchaws tuav huv faav xeeb, hab tej tuabneeg yuav ntaus tswvyim phem qhuav qhuav? 2Tej vaajntxwv huv lub nplajteb npaaj sawv twv, cov kws ua thawj tuav tswvyim ua ke tawm tsaam Yawmsaub hab tug kws raug laub roj tsaa. 3“Ca peb ua kuas txuj saw hlau kws ob tug khi peb tu nrho, hab muab txuj hlua kws ob tug zawm peb laim pov tseg.”
4Tug kws nyob lub zwm txwv sau ntuj luag puab, Yawmsaub thuaj luag puab cov ntawd. 5Nwg has rua puab ua npau tawg quas vog, nwg chim heev ua rua puab ntshai hab has tas, 6“Kuv tub tsaa kuv tug vaajntxwv nyob rua sau Xi‑oo, kws yog kuv lub roob dawb huv.”
7Kuv yuav has txug Yawmsaub tej lug, nwg has rua kuv tas, “Koj yog kuv tug tub, nub nua kuv yug tau koj lawm. 8Ca le thov kuv mas kuv yuav muab ib tsoom tebchaws ua qub txeeg qub teg rua koj, hab muab taag nrho lub nplajteb ua koj teej koj tug. 9Koj yuav xuas qws hlau ntaus puab tawg, hab ntsawm puab tawg taag ua tej dwb daim yaam le tej laujkaub aav.”
10Vem le nuav tej vaajntxwv 'e, mej ca le ntse, tej thawj kws kaav nplajteb 'e, mej ca le noog lug qhuab ntuag. 11Ca le paub ntshai hab ua koom rua Yawmsaub, ca le ntshai tshee quas nyo. 12Ca le pe hawm nwg ntshai tsaam nwg chim tes mej puam tsuaj rua huv mej txujkev, tsua qhov nwg txujkev npau tawg tshwm plawg sai kawg. Txhua tug kws lug cawm sav rua huv nwg yuav tau nyob kaaj sab lug.