Ndaa^ni^en Sou fiev daaih nyei ziangh hoc, I^saa^laa^en Mienh zuqc dauh maiv sienx Tin-Hungh nyei hungh diex zeix ninh mbuo, hoic ninh mbuo kouv. Fiev sou nyei mienh fiev ziex diuh jauv-louc caux laauc yaangh nyei sic weic tengx wuov doic mienh zungx qaqv. Ninh mbuo ziouc maaih lamh hnamv Tin-Hungh oix bun hoic ninh mbuo wuov dauh hungh zuqc suei, bun Tin-Hungh ganh nyei baeqc fingx aengx duqv gunv.
 Sou bun nqoi zoux i ginc. 1) Da'yietv ginc gorngv Ndaa^ni^en aengx caux ninh zuqc guaatv mingh nyei doic buangh nyei jauv-louc. Ninh mbuo sienx longx Tin-Hungh yaac muangx ninh nyei waac ziouc hingh jiex ninh mbuo nyei win-wangv. Naaiv deix jauv-louc cuotv daaih doix Mbaa^mbi^lon caux Besie yiem lungh ndiev zoux hlo jiex, henv jiex nyei deic-bung.
 2) Da'nyeic ginc gorngv Ndaa^ni^en buatc ziex nyungc laauc yaangh nyei sic. Naaiv deix laauc yaangh nyei sic maaih ziex nyungc jangx-hoc biux mengh zinh hoz nyei jauv. Maaih ziex norm guoqv oix henv jienv faaux aengx ndortv jienv njiec. Daauh dangh gorngv zuqc Mbaa^mbi^lon Deic-Bung, dongh maiv sienx Tin-Hungh nyei hungh diex, zeix Tin-Hungh nyei mienh, mv baac ninh oix zuqc suei. Tin-Hungh nyei baeqc fingx oix hingh jiex.

1:1-6:28 Ndaa^ni^en caux ninh nyei loz-gaeng doic

7:1-12:13 Ndaa^ni^en buatc laauc yaangh nyei sic

  7:1-28 Biei dauh hieh ga'naaiv

  8:1-9:27 Yungh gouv caux yungh

  10:1-11:45 Fin-mienh douc waac

12:1-13 Setv mueiz nyei nyutc zeiv