Saráq Sapáh Baih nâi Yang chĩc sám 90 cumo ntun Yê-su canỡt. Bo ki, Yang ỡt tũ tâng cỗn Bat-mô. Bữn muoi tangái rlu, Yiang Sursĩ toâq sapáh yỗn án hữm sa‑ữi ranáq salễh. Yiang Sursĩ ớn án chĩc dŏq máh ŏ́c ki tâng tâm saráq, chơ cơiq chu tapul tỗp sa‑âm tâng cruang Asia. Saráq nâi dŏq atỡng máh tỗp sa‑âm cóq chĩuq tanhĩr, cớp cóq sa‑âm samoât samơi, yuaq máh ranáq ễ toâq dŏq pupứt la ntâng lứq.
 Bữn máh ŏ́c cartooq tâng saráq sapáh baih nâi tễ máh ranáq ễ toâq to la‑ữt la‑ữi chumát. Ma noâng bữn ŏ́c sapáh sa‑ữi ramứh ễn. Máh cũai tễ dỡi mbŏ́q toau toâq dỡi sanua, alới doc saráq nâi ma tỡ bữn noau têq dáng raloaih tễ ŏ́c cartooq tâng saráq sapáh baih. Ma dũ náq cũai dáng raloaih la ống Yê-su Crĩt toâp la Yiang sốt. Yê-su khoiq chíl riap máh cũai par‑ũal, cớp án chíl riap dếh yiang Satan hỡ.
 Yiang Sursĩ sapáh yỗn Yang hữm vil Yaru-salem Tamái, la ntốq nêuq o cớp ang‑ữr lứq tễ Yiang Sursĩ. Yang hữm Cữu Con Yiang Sursĩ pớh pơ saráq bữn máh ramứh cũai têq tamoong mantái. Yiang Sursĩ ễ culáh cóng yỗn máh cũai ca sa‑âm samoât samơi, cớp yỗn alới bữn mut tâng Cruang Tamái cớp Cutễq Tamái. Ntốq ki lứq Yiang Sursĩ toâp aclaq ang‑ữr.