Phau-lô chĩc choâiq thỡ nâi cơiq sa‑óh tỗp sa‑âm tâng vil Cô-lusê, cruang Asia. Án chĩc sám 60 cumo ntun Yê-su canỡt. Án chĩc thỡ nâi cỗ tian án sâng han bữn máh cũai atỡng alới tỡ pĩeiq tễ parnai Yiang Sursĩ. Alới atỡng cũai sa‑âm cóq yám noap cớp sang ranễng Yiang Sursĩ tâng paloŏng, cớp cóq táq rit cứt puai phễp rit I-sarel. Cũai ki pai bữn sa‑ữi thữ crơng sana la tân, cớp alới atỡng sa‑ữi ŏ́c canŏ́h hỡ.
 Phau-lô chĩc máh ŏ́c pĩeiq lứq dŏq chíl loah máh ŏ́c ki. Án pai Yê-su Crĩt bữn chớc yỗn hái bữn roap ŏ́c tamoong tễ án. Máh santoiq ca noau atỡng tỡ pĩeiq, táq yỗn tỗp sa‑âm cỡt caryoah, chơ ỡt yơng tễ Yiang Sursĩ. Cỗ nhơ tễ Yê-su, Yiang Sursĩ tễng paloŏng cutễq; cớp cỗ nhơ tễ Yê-su, Yiang Sursĩ parỗm pachứm dũ náq cũai yỗn píh loah chu án. Ống Yê-su toâp têq yỗn cũai bữn tamoong mantái. Phau-lô atỡng sa‑ữi ŏ́c dŏq hái ĩt tâc tâng dỡi tamoong hái.