Saráq nâi Ê-sai, la manoaq cũai tang bỗq Yiang Sursĩ, chĩc sám 700 cumo nhũang dỡi Yê-su. Án cỡt cũai atỡng parnai tễ Yiang Sursĩ muoi thrap cớp Amôt, Hô-sĩa, cớp Mi-ca, bo dỡi Hê-sakia cỡt puo tâng vil Yaru-salem.
 Tâng saráq nâi Ê-sai atỡng tễ tỗp Asi-ria toâq chíl cruang Yuda. Án atỡng yỗn máh cũai Yuda tỡ bữn trĩh Yiang Sursĩ, ngkíq Yiang Sursĩ lứq dững máh ŏ́c túh coat dŏq manrap tỗp alới. Yiang Sursĩ ớn alới ngin lôih cớp píh loah chu Yiang Sursĩ. Chơ Yiang Sursĩ parkhán cớp alới neq: Khân alới trĩh cớp táq puai Yiang Sursĩ samoât samơi, ngkíq Yiang Sursĩ lứq sâng sarũiq táq loah alới; chơ án yỗn alới bữn ỡt ien khễ tâng cruang alới bữm.
 Ê-sai chĩc sa‑ữi santoiq aliam máh cũai I-sarel. Án pai moâm Yiang Sursĩ manrap cũai I-sarel, Yiang Sursĩ ễ yỗn alới ỡt ien khễ loah, cớp án ễ dững tỗp alới píh chu loah pỡ vil Yaru-salem, la vil viang alới tễ mbŏ́q. Ê-sai atỡng sacoâiq tễ cruang Ba-bulôn cóq roap tôt, cớp án pai Yiang Sursĩ lứq yỗn dũ cruang cũai bữn roap ŏ́c bốn, la cỗ nhơ tễ manoaq puo tễ tŏ́ng toiq puo Davĩt. Cũai ki la án ca Yiang Sursĩ rưoh dŏq chuai amoong nheq tữh cũai.