1Kuv tub 'e, tsw xob nov qaab kuv tej lug qha, koj lub sab yim meem ncu ntsoov kuv tej lug nkaw, 2tsua qhov tej nuav yuav pub koj nyob ntev naj ntau xyoo, hab pub koj vaam meej nyob kaaj sab quas lug. 3Koj tsw xob muab txujkev hlub hab txujkev ua ncaaj tso tseg. Ca le muab khi rua ntawm koj cej daab hab muab sau ca rua huv koj lub sab. 4Luas txhad le saib taug koj hab koj yuav tau koob meej zoo ntawm Vaajtswv hab tuabneeg.
5Koj ca le tso sab plhuav rua Yawmsaub kawg sab kawg ntsws, koj tsw xob vaam khom koj le kev txawj ntse. 6Ca le leeg yuav nwg rua txhua txujkev kws koj moog, mas nwg yuav pub koj taug txujkev ncaaj. 7Tsw xob xaav has tas koj txawj ntse. Ca le fwm hab paub ntshai Yawmsaub hab tig hlo ntawm txujkev phem. 8Qhov kws koj ua le nuav yuav ua rua koj lub cev nyob zoo hab ua koj tej pob txhaa swb quas laag. 9Ca le fwm Yawmsaub hab muab koj tej hov txhua chaw xyeem rua nwg, hab muab thawj phaum qoob loos txhua yaam pub rua nwg, 10mas koj lub txhaab yuav puv nkaus, hab kua txwv maab yuav puv koj lub rhawv phwj yog. 11Kuv tub 'e, tsw xob saib tsw taug Yawmsaub tej lug qhuab qha, hab tsw xob dhuav nwg tej lug ntuag, 12tsua qhov Yawmsaub qhuab ntuag tug kws nwg hlub, ib yaam le leej txwv qhuab ntuag tug tub kws nwg zoo sab rua.
13Tug kws nrhav tau tswvyim hab txawj nkaag sab mas kaaj sab lug, 14tsua qhov tswvyim muaj nqes dua nyaj txag hab muaj tshaaj thawj dua kub. 15Tswvyim tswm txaj dua npauj nyaj npauj kub, hab txhua yaam kws koj ntshaw tsw muaj ib yaam zoo cuag le tswvyim. 16Tswvyim saab teg xws tuav txujsa ntev, saab teg phem tuav kev muaj txag hab koob meej. 17Tswvyim txujkev yog txuj kws tshaav ntuj quas lug, hab nwg txhua txujkev yog kev sws hum xeeb. 18Tswvyim yog tsob ntoo kws pub txujsa rua cov kws tuav rawv nwg, cov kws tuav rawv tswvyim ca ruaj, luas yuav hu tas kaaj sab lug. 19Yawmsaub swv tswvyim tswm nplajteb, hab swv kev nkaag sab nthuav lub ntuj. 20Nwg swv nwg kev txawj ntse ua kuas dej txhawv huv nruab tiv txwv lug, hab ua kuas fuab tso dej lwg lug.
21Kuv tub 'e, koj ca le ceev tug tswvyim hab kev txawj ntse, tsw xob ca ob yaam nuav tswv dhau ntawm koj lub qhov muag moog. 22Ob yaam nuav yuav ua txujsa rua koj hab yuav yog tej saw kub ntawm koj cej daab. 23Tes koj yuav ua koj lub neej tso sab plhuav hab tsw dawm teg dawm taw. 24Yog koj nyob tsawg,⚓ los koj tsw ntshai daabtsw, thaus koj pw los yuav tsaug zug zoo sab tug quas yeeg. 25Koj tsw xob ntshai tej kws ua rua koj ceeb kws tshwm plawg lug taamswm, hab tsw xob ntshai tej kev puam tsuaj⚓ kws tej tuabneeg limham raug, 26tsua qhov Yawmsaub yuav yog koj lub chaw vaam khom, nwg yuav tiv thaiv tsw kheev koj txhais kwtaw maag rooj hlua. 27Koj ca le ua zoo rua cov kws tswm nyog tau qhov zoo rua txhua lub swjhawm kws koj ua tau. 28Yog kwvtij zej zog cheem tsum ib yaam daabtsw kws koj muaj, mas tsw xob has tas, “Koj rov qaab moog pigkig rov tuaj es kuv le muab.” 29Tsw xob ntaus tswvyim ua phem rua tej kwvtij zej zog kws nyob ze koj hab tso sab rua koj. 30Yog luas tsw tau ua phem rua koj mas tsw xob laam nrug luas sws caav sws tshe. 31Tsw xob khib tug tuabneeg ua limham ndais ntuj, hab tsw xaiv taug nwg tej kev txuj twg hlo le, 32tsua qhov Yawmsaub ntxub tug tuabneeg sab nkhaus, tassws nwg nrug tug kws ua ncaaj nceeg sws raug zoo. 33Lu lug kws Yawmsaub foom tsw zoo yuav poob rua sau tej tuabneeg limham lub tsev, tassws nwg yuav foom koob moov rua tej tuabneeg ncaaj nceeg lub chaw nyob. 34Nwg yuav luag tej tuabneeg kws luag lwm tug, tassws nwg yuav hlub tej kws txu fwjchim. 35Tug tuabneeg txawj ntse yuav tau koob meej, tassws tug tuabneeg ruag yuav poob ntsej muag.