9

Tus Timthawj Txoj Cai thiab Nws Tes Haujlwm

¹Kuv tsis muaj cai los? Kuv tsis yog timthawj los? Kuv tsis tau pom Yexus uas yog peb tus Tswv los? Qhov ua nej tau los ntseeg tus Tswv, twb yog vim kuv qhia nej ntag. ²Txawm yog lwm tus tsis lees hais tias, kuv yog ib tug timthawj los tsimnyog nej lees kuv! Qhov uas nej nrog tus Tswv koom ib txojsia, qhov ntawd ua timkhawv hais tias kuv yog ib tug timthawj tiag.
³Thaum muaj neeg thuam kuv, kuv hais daws kuv zaj li no: ⁴Kuv txawm tsis muaj cai noj thiab haus vim tes haujlwm uas kuv ua li los? ⁵Petus thiab txhua tus timthawj, lawv puavleej muaj cuabkav coj pojniam menyuam nrog lawv mus rau ub rau no. Kuv yeej yog ib tug tubtxib thiab, kuv txawm tsis muaj cai li lawv los? ⁶Tsuas yog Npananpas thiab kuv wb thiaj yuav tsum nrhiav rau wb noj wb haus xwb los? ⁷Tus uas mus ua tubrog nws tseem nrhiav rau nws noj nws haus thiab los? Tus uas cog txiv hmab, nws txawm tsis de nws cov txiv hmab noj los? Tus uas yug yaj nws txawm tsis tso nws cov yaj tej kua mis haus los?
⁸Puas yog kuv hais raws li neeg ibtxwm hais? Puas yog Vajtswv txoj kevcai hais ib yam li no thiab? ⁹Muaj lus sau tseg rau hauv Mauxes txoj Kevcai lawm hais tias, “Thaum nej tabtom muab nyuj tsuj nplej, nej tsis txhob muab hnab looj nyuj qhovncauj.” Puas yog Vajtswv txhawj nyob tsam nyuj tsis tau noj? ¹⁰Vajtswv hais li ntawd tsis yog Vajtswv hais txog peb los? twb yog Vajtswv hais txog peb ntag. Tus uas laij teb thiab tus uas ntaus nplej, nkawd yeej cia siab hais tias nkawd yuav tau qoobloo sib npaug. ¹¹Yog peb twb tseb Vajtswv txojlus rau hauv nej lub siab lawm, yog li ntawd peb sau nej tej zaub tej mov los yug peb, nej tseem hais tias peb sau ntau dhau lawm los? ¹²Yog lwm tus twb muaj cai kom nej yug lawv, yog li ntawd, peb hajyam muaj cai kom nej yug peb thiab?
Txawm yog li los peb yeej txhob txwm tsis sau nej tug. Peb ua siab ntev nyiaj txhua yam kev txomnyem thiaj yuav tsis muaj ib yam dabtsi tabkaum Txojmoo Zoo uas hais txog Yexus Khetos zaj. ¹³Nej yeej paub hais tias cov uas ua haujlwm hauv lub Tuamtsev, lawv yeej tau tej zaub mov hauv lub Tuamtsev noj, thiab cov uas hlawv khoom fij ntawm lub thaj, lawv yeej tau tej ntawd noj. ¹⁴Ib yam nkaus li ntawd, tus Tswv qhia hais tias tsimnyog cov neeg uas ntseeg txojmoo zoo yuav tsum yug cov uas tuaj qhia txojmoo zoo.
¹⁵Tiamsis kuv yeej ibtxwm tsis sau nej tug. Txawm yog kuv sau tsab ntawv no tuaj rau nej los kuv tsis tau kom nej yug kuv. Yog kuv yuav thov nej yug kuv yeem cia kuv tuag zoo dua. Yeej tsis muaj leejtwg yuav muaj cuabkav thuam tej lus uas kuv khav hais tias kuv tsis thov nej yug kuv. ¹⁶Kuv yog tus qhia txojmoo zoo los kuv yeej tsis muaj cai khav hlo li. Rau qhov Vajtswv kom kuv qhia. Yog kuv tsis qhia txojmoo zoo kuv yeej yuav raug kev puastsuaj. ¹⁷Yog kuv yeem ua tes haujlwm ntawd, kuv yeej yuav tau nqi zog. Txawm yog kuv tsis yeem ua los tes haujlwm ntawd yeej yog kuv tes. ¹⁸Yog li ntawd kuv tau nqi zog dabtsi? Kuv tej nqi zog yog qhov uas kuv qhia txojmoo zoo, kuv tsis thov leejtwg ib yam dabtsi li. Thaum kuv mus qhia txojmoo zoo, kuv yeej muaj cai thov sawvdaws yug kuv tiamsis kuv tsis thov.
¹⁹Kuv yeej tsis ua leejtwg qhev; tiamsis kuv zoo siab ua sawvdaws qhev, kuv thiaj yuav coj tau neeg coob leej los ntseeg Yexus Khetos. ²⁰Thaum kuv nrog cov neeg Yudais nyob ua ke, kuv ua ib yam li lawv, rau qhov kuv xav coj lawv los ntseeg. Txawm yog Mauxes txoj kevcai tsis muaj cuabkav yuam kuv lawm los thaum kuv nrog cov neeg uas xyaum coj Mauxes txoj kevcai nyob ua ke, kuv ua ib yam li lawv, rau qhov kuv xav coj lawv los ntseeg. ²¹Thaum kuv nrog lwm Haivneeg nyob ua ke, kuv ua ib yam li tus uas tsis coj cov Yudais txoj kevcai, rau qhov kuv xav coj lwm Haivneeg los ntseeg. Kuv hais li no, tsis yog kuv hais tias kuv tsis coj Vajtswv txoj kevcai, tiamsis qhov tseemceeb kuv yeej coj Yexus Khetos txoj kevcai. ²²Thaum kuv nrog cov neeg uas tsis tshua paub Vajtswv pestsawg nyob ua ke, kuv ua ib yam li lawv, kuv thiaj coj tau lawv los ntseeg. Kuv xyaum ua li txhua haivneeg ua. Kuv ua li ntawd saib puas yuav pab tau qee leej rov los ua neeg tshiab.
²³Kuv ua txhua yam no kom txojmoo zoo nrov ncha mus thoob txhua qhov, kuv thiaj tau koob hmoov. ²⁴Nej yeej paub hais tias cov neeg uas sib tw khiav yeej tib txhij khiav, tiamsis tsuas muaj tib tug thiaj khiav yeej thiab tau nqi zog xwb. Nej cia li khiav tiag kom yeej, nej thiaj tau nqi zog. ²⁵Txhua tus uas sib tw khiav, nws niaj hnub xyaum khiav raws li txoj kevcai, nws ua li ntawd los nws tsuas tau lub kausmom uas nyob tsis ntev xwb; tiamsis peb sib tw khiav kom peb tau lub kausmom uas nyob mus ibtxhis. ²⁶Twb yog vim li no kuv thiaj khiav ncaj nraim mus kom txog tus ciam tom kawg; twb yog vim li no kuv thiaj ua li tug uas txawj ntaus nrig uas nws tsis lam ntau qhuav xwb. ²⁷Kuv niaj hnub tswj rawv kuv lub cev rau qhov kuv yeej yog tus uas qhia lwm tus. Yog kuv tsis tswj kuv lub cev ntshai nyob tsam kuv tsis tau nrog luag sib tw khiav.

9

Cov tubtxib muaj cai

¹Kuv tsis nyob ywj pheej lov? Kuv tsis yog tubtxib lov? Kuv tsis tau pom Yexus uas yog peb tus Tswv lov? Nej tsis yog tes haujlwm uas kuv ua rau tus Tswv lov? ²Yog lwm tus tsis pom tias kuv yog tubtxib los nej kuj pom, rau qhov nej yog lub hom thawj uas nias rau qhov uas kuv ua tus Tswv li tubtxib.
³Yog leejtwg tshuaj saib kuv, kuv yuav hais daws kuv zaj li no. ⁴Kuv tsis muaj cai noj thiab haus lov? ⁵Kuv tsis muaj cai coj pojniam uas ntseeg nrog kuv mus ib yam li lwm tus tubtxib thiab yam li tus Tswv cov kwv thiab Khefa lov? ⁶Lossis tsuas yog kuv thiab Npananpa xwb thiaj tsis muaj cai tso tej haujlwm uas yug wb lub ncauj tseg lov? ⁷Leejtwg ua tub rog es rov them nws tus nqe zog? Leejtwg cog vaj txiv hmab es tsis noj tej txiv hauv lub vaj ntawd? Leejtwg yug yaj es tsis haus tej kua mis? ⁸Kuv hais li no raws li neeg lub siab xav xwb lov? Phau kevcai kuj hais ib yam li no los tsis yog? ⁹Rau qhov twb muaj lus sau cia rau hauv Mauxe phau kevcai hais tias, “Thaum nyuj tabtom tsuj qeb tsuj mog nej tsis txhob muab tawb looj nyuj qhov ncauj.”⚓ Yog Vajtswv txhawj nyuj xwb lov? ¹⁰Vajtswv yeej hais rau peb los tsis yog? Tej lus ntawd sau cia rau peb rau qhov tus uas laij teb, laij muaj siab vam thiab tus uas ntaus qoob ntaus muaj vam tias yuav tau tej qoob ntawd. ¹¹Yog peb tseb sab ntsuj plig rau nej, peb sau sab nqaij tawv ntawm nej yog hnyav rau nej lov? ¹²Yog lwm tus muaj cai tau ntawm nej, peb yimhuab muaj cai los tsis yog?
Txawm li cas los peb tsis siv txoj cai no, tiamsis peb thev txhua yam kom peb thiaj tsis muab dabtsi los tav Khetos txoj xov zoo. ¹³Nej tsis paub lov? Cov uas ua haujlwm hauv lub tuam tsev kuj noj lub tuam tsev li zaub mov, thiab cov uas ua haujlwm ntawm lub thaj kuj tau tej uas faib ntawm lub thaj. ¹⁴Ib yam li ntawd, tus Tswv hais tias tsim nyog cov uas piav txoj xov zoo tau noj ntawm qhov uas piav txoj xov zoo ntawd. ¹⁵Tiamsis kuv tsis siv txoj cai no kiag li thiab qhov uas kuv sau tej no tsis yog hais kom luag pub li ntawd rau kuv, rau qhov kuv yeem tuag zoo dua cia luag rhuav qhov uas kuv khav. ¹⁶Yog kuv piav txoj xov zoo kuv yeej tsis muaj chaw khav kiag li, rau qhov kuv yeej yuav tsum ua. Yog kuv tsis piav txoj xov zoo kuv kuj raug txom nyem. ¹⁷Yog kuv zoo siab piav txoj xov zoo kuv yuav tau nqe zog. Yog kuv tsis zoo siab piav los kuv yeej yuav tsum ua tej uas muab cob rau kuv lawm. ¹⁸Tej nqe zog uas muab rau kuv yog dabtsi? Kuj yog qhov uas piav txoj xov zoo ntawd kuv piav tsis yuav nqe, kuv thiaj tsis siv txoj cai hauv txoj xov zoo kiag li.
¹⁹Txawm yog kuv tau nyob ywj pheej tsis ua leejtwg qhev los kuv tseem ua txhua tus li qhev kom thiaj coj tau neeg los ntseeg coob zuj zus. ²⁰Kuv ua yam li ib tug Yudai rau hauv cov Yudai xwv thiaj coj tau cov Yudai los ntseeg. Kuv ua yam li tus uas nyob hauv Mauxe txoj kevcai rau hauv cov uas nyob hauv txoj kevcai (tiamsis kuv tus kheej tsis yog nyob hauv txoj qab kevcai) xwv thiaj coj tau cov uas nyob hauv txoj kevcai ntawd los ntseeg. ²¹Kuv ua yam li tus uas tsis nyob hauv txoj kevcai rau hauv cov uas tsis nyob hauv txoj kevcai, (kuv tsis yog nyob dhau Vajtswv txoj kevcai tiamsis nyob hauv Khetos txoj qab kevcai) xwv thiaj coj tau cov uas tsis nyob hauv txoj kevcai los. ²²Kuv ua yam li tus uas qaug zog rau hauv cov uas qaug zog xwv thiaj coj tau cov uas qaug zog los. Kuv yeem ua txhua yam neeg rau txhua tus kom thiaj siv txhua txojkev pab tau qee leej dim. ²³Kuv ua txhua yam vim yog saib rau txoj xov zoo kuv thiaj li muaj feem tau tej uas txoj xov zoo pub.
²⁴Nej tsis paub lov? Cov uas sib tw dhia sawvdaws yeej dhia tiamsis tsuas yog tib tug thiaj tau tshav ntuj xwb. Nej yuav tsum dhia tiag kom tau tshav ntuj. ²⁵Txhua tus uas sib tw dhia yuav tsum tswj lawv lub cev rau txhua fab. Lawv ua kom tau lub mom paj ntoos uas txawj zeeg tiamsis peb ua kom tau lub mom paj ntoos uas tsis txawj zeeg. ²⁶Yog li ntawd kuv tsis yog lam dhia tsis muaj hom phiaj, kuv tsis yog ntaus nrig yam li tus uas ntaus cua xwb. ²⁷Tiamsis kuv ntaus kuv lub cev thiab tswj cia, ntshai tsam thaum kuv tshaj tawm txoj xov zoo rau lwm tus lawm kuv tus kheej tsis nrog luag tau tej tshav ntuj ntawd.