11

Kev Ntseeg

¹Kev ntseeg yog qhov uas peb paub tseeb hais tias peb yuav tau tej uas peb cia siab rau thiab yog qhov uas peb cia siab ntsoov rau tej uas peb qhovmuag tsis pom. ²Twb yog vim cov neeg txheej thaum ub ntseeg lawv thiaj ua tau haum Vajtswv siab.
³Twb yog vim peb ntseeg peb thiaj totaub hais tias thaum Vajtswv tsim ntuj tsim teb Vajtswv hais kom muaj, txawm cia li muaj tiag. Yog li ntawd tej uas peb qhovmuag pom yeej los ntawm tej uas peb qhovmuag tsis pom los.
⁴Twb yog vim Anpees ntseeg, nws thiaj muab tej uas zoo dua Ka-ees li fij rau Vajtswv. Vim Anpees ntseeg, Vajtswv thiaj suav hais tias Anpees yog tus ncaj ncees, rau qhov tej uas Anpees muab fij rau Vajtswv ntawd haum Vajtswv siab. Txawm yog Anpees twb tuag lawm los nimno nws kev ntseeg tseem niaj hnub qhia peb.
⁵Twb yog vim Enauj ntseeg, Enauj thiaj tsis tuag. Vajtswv coj nws mus thiaj tsis muaj leejtwg nrhiav tau nws, rau qhov Vajtswv twb coj nws mus lawm. Vajtswv txojlus hais tias, “Thaum Vajtswv tseem tsis tau coj Enauj mus, Enauj yeej ua haum Vajtswv siab.” ⁶Tus uas tsis ntseeg yeej ua tsis tau haum Vajtswv siab, rau qhov tus uas xav los cuag Vajtswv, tus ntawd yuav tsum ntseeg hais tias yeej muaj Vajtswv tiag, thiab Vajtswv yuav muab nqi zog rau tus uas los cuag Vajtswv.
⁷Twb yog vim Nau-es ntseeg, Nau-es thiaj mloog Vajtswv lus. Vajtswv qhia rau Nau-es txog tej xwm txheej uas yav tom ntej yuav muaj los uas Nau-es qhovmuag tsis pom. Nau-es thiaj txua ib lub nkoj, Nau-es thiab nws tsevneeg thiaj dim kev ploj kev tuag. Vajtswv ua li ntawd twb yog nws rau txim rau tej neeg uas tsis ntseeg. Vim Nau-es ntseeg, Vajtswv thiaj suav hais tias Nau-es yog tus uas ncaj ncees.
⁸Twb yog vim Anplahas ntseeg, thaum Vajtswv kom Anplahas tawm mus nyob lub tebchaws uas Vajtswv coglus tseg hais tias Vajtswv yuav muab pub rau nws, nws thiaj mloog Vajtswv lus. Anplahas tawm hauv nws lub tebchaws mus, tiamsis nws tsis paub hais tias xyov nws yuav mus qhov twg. ⁹Twb yog vim Anplahas ntseeg, Anplahas thiaj tau mus nyob lub tebchaws uas Vajtswv coglus tseg hais tias Vajtswv yuav muab pub rau nws nyob. Anplahas nyob hauv tsevntaub ib yam li nws yog tus neeg uas tsis muaj tebchaws nyob. Tom qab ntawd Ixaj thiab Yakhauj nyob hauv tsevntaub ib yam li nkawd yawg Anplahas. Vajtswv coglus tseg rau nkawd ib yam li coglus rau Anplahas. ¹⁰Anplahas nyob li ntawd, rau qhov nws tabtom tos hnub uas Vajtswv coj nws mus hauv lub nroog uas nyob mus ibtxhis, lub nroog ntawd Vajtswv yog tus uas muab qauv thiab ua lub nroog ntawd.
¹¹Twb yog vim Anplahas ntseeg, Anplahas thiaj muaj tub muaj ki. Txawm yog nws laus heev thiab Xalas ibtxwm xeeb tsis taus tub los nws cia siab hais tias Vajtswv yeej yuav ua raws li Vajtswv tej lus cog tseg. ¹²Txawm yog Anplahas laus laus lawm twb yuav tuag los nws tseem muaj xeebntxwv coob npaum li cov hnubqub uas nyob saum nruab ntug thiab npaum li cov suabzeb nram ntug hiavtxwv uas tsis muaj neeg suav txheeb.
¹³Cov neeg ntawd lawv muab siab rau ntseeg mus txog hnub uas lawv tuag. Lawv tseem tsis tau tau tej uas Vajtswv coglus tseg hais tias Vajtswv yuav muab pub rau lawv, tiamsis lawv cia siab hais tias yav tom ntej lawv yuav tau, lawv thiaj zoo siab tos. Lawv lees tabmeeg sawvdaws hais tias lawv tsis muaj teb tsis muaj chaw nyob hauv ntiajteb no, lawv taug kev tuaj ua qhua xwb. ¹⁴Peb paub hais tias cov neeg uas hais li ntawd lawv tabtom nrhiav teb nrhiav chaw nyob. ¹⁵Lawv yeej nco tsis txog lub tebchaws uas lawv tawm tuaj lawm. Yog lawv nco txog, nyaj lawv yuav tau rov qab mus nyob, ¹⁶tiamsis lawv xav mus nyob lub tebchaws uas zoo dua lub ntawd. Lub tebchaws uas lawv xav mus nyob yog saum ntuj ceebtsheej. Yog li ntawd, Vajtswv thiaj tsis txajmuag cia lawv hu nws hais tias nws yog lawv tus Vajtswv, rau qhov Vajtswv twb tu ib lub tebchaws cia rau lawv lawm.
¹⁷Twb yog vim Anplahas ntseeg, Anplahas thiaj coj nws tus tub Ixaj mus yuav muab tua fij rau Vajtswv. Thaum ntawd twb yog Vajtswv sim Anplahas siab. Txawm yog Vajtswv coglus tseg rau Anplahas lawm los Anplahas tseem zoo siab muab nws tib leeg tub coj mus tua fij rau Vajtswv thiab. ¹⁸Vajtswv twb hais rau Anplahas lawm hais tias, “Koj cov xeebntxwv yuav los ntawm Ixaj los.” ¹⁹Anplahas cia siab hais tias txawm yog Ixaj tuag lawm los Vajtswv yuav tsa Ixaj sawv hauv qhov tuag rov qab los. Qhov uas Vajtswv cheem tsis pub Anplahas tua Ixaj, qhov ntawd piv ib yam li Ixaj sawv hauv qhov tuag rov qab los ntag.
²⁰Twb yog vim Ixaj ntseeg, Ixaj thiaj foom koob hmoov rau Yakhauj thiab Exaus. Ixaj qhia tej xwm txheej uas yuav muaj los yav tom ntej rau nkawd.
²¹Twb yog vim Yakhauj ntseeg, thaum Yakhauj yuav tuag nws thiaj foom koob hmoov rau Yauxej ob tug tub. Thaum Yakhauj pehawm Vajtswv, Yakhauj muab nws tus pas nrig los txheem nws lub cev, rau qhov nws laus heev lawm.
²²Twb yog vim Yauxej ntseeg, thaum Yauxej yuav tuag nws thiaj hais txog zaj uas cov Yixalayees yuav tawm hauv tebchaws Iziv mus. Thiab nws qhia qhov chaw uas nws kom lawv coj nws lub cev mus faus cia.
²³Twb yog vim Mauxes niam thiab txiv ntseeg, thaum yug tau Mauxes, nkawd thiaj muab Mauxes zais tau peb lub hlis. Nkawd pom hais tias, nkawd tus metub ntawd zoo nraug heev, nkawd thiaj muaj lub siab tawv tsis ua raws li vajntxwv tej lus.
²⁴Twb yog vim Mauxes ntseeg, thaum nws hlob lawm nws tsis pub sawvdaws hu hais tias nws yog Falaus tus ntxhais tus tub. ²⁵Nws txaus siab nrog Vajtswv haivneeg raug kev txomnyem; nws hais tias nws ua li ntawd zoo dua li nws yuav mus ua tej kev phem kev qias uas nyob ib nyuag ntu xwb. ²⁶Nws ntseeg hais tias Vajtswv yuav txib tus Mexiyas los pab Vajtswv haivneeg. Txawm yog tej uas nws ntseeg li ntawd ua rau luag thuam nws los nws pom hais tias qhov ntawd muaj nqis heev dua txhua tsav yam zoo uas nyob hauv tebchaws Iziv, rau qhov nws saib ntsoov tej uas yav tom ntej Vajtswv yuav muab rau nws.
²⁷Twb yog vim Mauxes ntseeg, Mauxes thiaj tawm hauv tebchaws Iziv mus. Txawm yog vajntxwv chim rau nws los nws tsis ntshai. Nws tsis rov qab los, rau qhov nws ntseeg cuag li uas nws lub qhovmuag twb pom Vajtswv tus uas sawvdaws qhovmuag tsis pom ntag. ²⁸Twb yog vim Mauxes ntseeg, Mauxes thiaj ua kevcai Hla Dhau thiab kom sawvdaws muab ntshav pleev qhovrooj. Lawv ua li ntawd tus timtswv uas yog txojkev tuag thiaj tsis tua cov Yixalayees cov tub hlob.
²⁹Twb yog vim cov Yixalayees ntseeg, lawv cia li mus hauv hiavtxwv liab ib yam li lawv mus saum nruab nqhuab. Tiamsis thaum cov Iziv uas raws lawv qab mus hauv, dej cia li nphau los npog cov neeg Iziv tuag tas huv tibsi.
³⁰Twb yog vim cov Yixalayees ntseeg, thaum lawv mus ncig lub nroog Yelikaus xya hnub lawm, lub nroog ntawd tej ntsayeej txawm vau tas huv tibsi. ³¹Twb yog vim tus niamntiav uas hu ua Lahaj ntseeg nws thiaj dim. Nws tsis nrog cov neeg uas tsis mloog Vajtswv lus raug kev puastsuaj, rau qhov nws hu ob tug soj tebchaws los hauv nws tsev thiab pab nkawd.
³²Kuv hais tso tseg txij no xwb, rau qhov kuv tsis muaj sijhawm txaus yuav hais txog Nkide-oos, Npalaj, Xaxoos, Yefethas, Daviv, Xamuyees thiab cov cev Vajtswv lus ntau leej. ³³Twb yog vim lawv ntseeg, lawv thiaj ntaus tau tebchaws tagnrho. Lawv ua neeg ncaj ncees thiab lawv tau tej uas Vajtswv coglus tseg hais tias Vajtswv yuav muab rau lawv. Lawv ua rau tsov ntxhuav rua tsis taus qhovncauj. ³⁴Lawv tua tau cov hluavtaws uas cig hlob hlob thiab khiav dim hniav ntaj hniav riam. Lawv qaug zog, tiamsis lawv ho rov qab muaj zog. Lawv muaj tswvyim ua tsov ua rog thiab lawv tawmtsam yeej lwm haivneeg cov tubrog. ³⁵Twb yog vim muaj qee leej pojniam ntseeg, lawv thiaj tau lawv tej neeg uas tuag lawm sawv rov qab los.
Muaj qee leej tsis kam tawm hauv tsev lojcuj, lawv zoo siab raug kev tsimtxom mus txog hnub tuag, rau qhov lawv cia siab hais tias Vajtswv yuav tsa lawv sawv hauv qhov tuag rov qab los thiab pub txojsia uas zoo dua lawv txoj rau lawv. ³⁶Muaj qee leej raug luag thuam thiab raug luag nplawm, thiab muaj qee leej raug luag muab saw hlau khi thiab cia luag muab kaw rau hauv tsev lojcuj; ³⁷muaj qee leej raug luag muab pobzeb ntaus, muaj qee leej raug luag muab kaw kaw ua ob ya, muaj qee leej raug luag muab ntaj tua, muaj qee leej hnav tawv yaj tawv tshis mus rau ub rau no, lawv tsis muaj noj tsis muaj haus, txomnyem thiab raug luag tsimtxom kawg li. ³⁸Lawv yog neeg zoo dhau lawm, lub ntiajteb no tsis phim rau lawv nyob. Lawv tsis muaj vaj tsis muaj tsev, lawv mus nyob tom tej roob mojsab qhua thiab pem tej roob. Lawv nyob hauv tej qhov zeb qhov tsua thiab khawb qhov av nyob.
³⁹Twb yog vim lawv ntseeg, lawv lub koob meej thiaj nrov ncha moo lug mus thoob plaws qhov txhia chaw. Tiamsis lawv tseem tsis tau tau tej uas Vajtswv coglus tseg hais tias Vajtswv yuav pub rau lawv, ⁴⁰rau qhov Vajtswv twb tu yam uas zoo dua tej uas lawv muaj rau peb lawm. Vajtswv yeej xav kom lawv thiab peb tib txhij ua tau neeg zoo kawg nkaus.

11

Kev ntseeg

¹Kev ntseeg yog qhov uas ruaj siab rau tej uas vam ntsoov, yog qhov uas cia siab tias tej uas qhov muag tsis tau pom muaj tseeb. ²Vim cov neeg yav thaum ub ntseeg lawv thiaj hum Vajtswv siab. ³Vim peb ntseeg peb thiaj nkag siab tias Vajtswv lo lus tsim ntuj tsim teb, mas yam uas qhov muag pom thiaj li tshwm ntawm yam uas qhov muag tsis pom los.
⁴Vim Anpee ntseeg nws thiaj muab tej uas zoo dua Khayee li xyeem rau Vajtswv. Vim nws ntseeg, Vajtswv thiaj suav tias nws ncaj ncees, yog Vajtswv pom zoo tej uas nws muab xyeem ntawd. Txawm yog Anpee tuag lawm los nws txojkev ntseeg tseem qhia peb.⚓ ⁵Vim Enauj ntseeg nws thiaj raug coj mus saum ntuj, nws thiaj tsis ntsib txojkev tuag. Tsis muaj leejtwg nrhiav tau nws vim Vajtswv twb coj nws mus lawm. Ua ntej uas tsis tau coj nws mus muaj lus timkhawv tias nws ua hum Vajtswv siab. ⁶Yog tsis muaj kev ntseeg yeej ua tsis tau hum Vajtswv siab li. Rau qhov tus uas yuav los cuag Vajtswv yuav tsum ntseeg tias muaj Vajtswv tiag thiab nws pub nqe zog rau cov uas nrhiav nws. ⁷Vim Nau‑a ntseeg, thaum Vajtswv qhia tej xwm txheej uas qhov muag tsis tau pom, nws thiaj paub ntshai thiab ua ib lub nkoj txwg cawm nws tsev neeg dim. Vim txojkev ntseeg ntawd nws thiaj rau txim rau lub ntiajteb, thiab nws saws tau txojkev ncaj ncees uas yog los ntawm txojkev ntseeg.
⁸Vim Aplahas ntseeg, thaum nws raug hu kom tawm mus rau lub chaw uas yuav tau ua nws qub txeeg qub teg nws kuj mloog lus thiab taug kev mus tsis paub tias yuav mus rau qhovtwg. ⁹Vim nws ntseeg nws thiaj ua qhua nyob hauv lub tebchaws uas Vajtswv cog lus. Nws nyob hauv lub tsev ntaub ib yam li Yiha thiab Yakhauj uas nrog nws saws qub txeeg qub teg raws li tib lo lus cog tseg ntawd. ¹⁰Nws tos rawv lub nroog uas tsim tsa rau saum tej taw tiag uas Vajtswv tsim thiab Vajtswv ua. ¹¹Vim Aplahas ntseeg, txawm yog nws laus heev lawm thiab Xala kuj xeeb tsis taus menyuam⚓ los nws tau hwjchim uas yuav muaj tub vim nws suav tias Vajtswv uas cog lus tseg lawm yog tus uas tso siab tau. ¹²Yog li no tus txivneej uas zoo li twb tuag lawm kuj muaj caj ces yug los coob yam li tej hnub qub saum nruab ntug thiab yam li tej xuab zeb uas suav tsis txheeb ntawm ntug hiavtxwv.
¹³Cov neeg no huvsi tuag tag rau thaum tseem muaj txojkev ntseeg thiab tsis tau txais tej uas cog lus cia tiamsis lawv kuj pom tej ntawd deb deb thiab zoo siab tos txais. Lawv lees hais tias lawv tsis muaj teb tsis muaj chaw nyob hauv ntiajteb no, lawv tuaj ua qhua xwb. ¹⁴Vim tias cov neeg uas hais li no kuj ua kom pom tias lawv tabtom nrhiav lub tebchaws uas yog lawv teej lawv tug. ¹⁵Yog lawv xav txog lub tebchaws uas lawv tawm tuaj lawd lawv kuj yuav muaj sijhawm rov qab mus tau. ¹⁶Tiamsis lawv yeej xav tau lub tebchaws uas zoo dua ntawd, yog lub tebchaws saum ntuj ceeb tsheej. Vim li no, Vajtswv thiaj tsis txaj muag uas raug hu tias yog lawv tus Vajtswv rau qhov nws twb npaj ib lub nroog cia rau lawv lawm.
¹⁷Vim Aplahas ntseeg, thaum nws raug sim siab, nws kuj muab Yiha xyeem, thiab nws yog tus uas tau txais tej lus cog tseg los nws kuj npaj txhij yuav muab nws tib tug tub xyeem, ¹⁸yog tus tub uas muaj lus hais tias, “Koj caj ces yuav yog tshwm ntawm Yiha mus.”⚓ ¹⁹Aplahas ntseeg tias Vajtswv tsa tau cov neeg tuag ciaj sawv rov los. Piv ib yam li, Aplahas kuj tau nws tus tub rov qab los ntag. ²⁰Vim Yiha ntseeg, nws thiaj foom koob hmoov rau Yakhauj thiab Exau txog tej xwm txheej uas yuav tshwm los. ²¹Vim Yakhauj ntseeg, thaum nws yuav tuag nws thiaj foom koob hmoov rau Yauxej ob tug tub, thiab nws nyo hau rau saum nws tus hau pas nrig pe hawm Vajtswv. ²²Vim Yauxej ntseeg, thaum yuav tag nws sim neej, nws thiaj hais txog qhov uas cov Yixayee yuav khiav dim thiab hais tseg txog nws cov pob txha.
²³Vim Mauxe niam txiv ntseeg, thaum yug nws los ob tug thiaj muab nws zais tau peb lub hlis, vim pom tias nws zoo nraug heev thiab ob tug tsis ntshai vajntxwv tej lus kiag li.⚓ ²⁴Vim Mauxe ntseeg, thaum nws hlob lawd nws thiaj tsis yeem kom hu hais tias nws yog Falau tus ntxhais li tub, ²⁵tiamsis nws xaiv qhov uas nrog Vajtswv cov neeg raug txom nyem zoo dua li qhov uas nyob ua lomzem ib vuag dua hauv txojkev txhaum. ²⁶Nws suav tias qhov uas raug thuam vim saib rau Khetos muaj nqes dua tej cuab txhiaj cuab tam hauv Iyi tebchaws, vim nws xam pom tej nqe zog uas nws tseem yuav tau. ²⁷Vim nws ntseeg, nws thiaj tawm hauv Iyi tebchaws tsis ntshai qhov uas vajntxwv npau taws. Nws ua siab ntev thev cuag li nws pom tus uas neeg qhov muag tsis pom. ²⁸Vim nws ntseeg, nws thiaj ua kevcai Hla Dhau thiab muab cov ntshav nchos kom tus uas ua kom puam tsuaj thiaj tsis kov Yixayee tej tub hlob.
²⁹Vim cov Yixayee ntseeg, lawv thiaj hla tau Dej Hiavtxwv Liab ib yam li mus saum nruab nqhuab. Tiamsis thaum cov Iyi sim hla mus lawv kuj raug dej nphau los nyab tuag tag. ³⁰Vim muaj txojkev ntseeg tej ntsa loog Yelikhau thiaj pob tag rau thaum cov Yixayee ncig mus puv xya hnub. ³¹Vim tus poj muag cev Lahaj ntseeg, nws thiaj tsis nrog cov uas tsis mloog lus raug puam tsuaj, vim nws tos txais ob tug uas tshuaj tebchaws zoo heev.
³²Kuv yuav hais dabtsi ntxiv mus? Rau qhov tsis muaj sijhawm txaus uas yuav hais txog Kide‑oo, Npala, Xaxoo, Yetha, Davi thiab Xamuyee thiab cov xibhwb cev Vajtswv lus. ³³Vim lawv ntseeg lawv thiaj kov yeej tebchaws, txiav txim ncaj ncees, tau txais tej uas Vajtswv cog lus tseg, kaw tsov ntxhuav qhov ncauj, ³⁴tua tau tej hluavtaws uas kub heev, dim hniav ntaj hniav riam, cov uas tsaug leeg rov ua cov uas muaj zog, muaj zog ua rog thiab ntaus lwm lub tebchaws tej tub rog thim rov qab. ³⁵Cov pojniam kuj tau lawv tej neeg uas tuag lawd sawv rov los. Qee leej raug kev tsim txom thiab tsis yeem cia tso kom dim kom lawv thiaj tau ciaj sawv los tau txojsia uas zoo dua. ³⁶Qee leej raug thuam luag thiab raug nplawm thiab raug saw hlau khi kaw hauv tsev lojfaj. ³⁷Lawv raug xuas pob zeb ntaus, lawv raug muab kaw txiav ua ob ya, lawv raug tuag hniav ntaj, lawv hnav tawv yaj tawv tshis mus rau tom ub tom no, lawv tsis muaj ib yam dabtsi, raug txom nyem kawg, raug ua nruj ua tsiv. ³⁸Lub ntiajteb no tsis phim rau lawv nyob. Lawv mus mus los los hauv tebchaws moj sab qhua thiab saum tej roob, thiab nyob hauv tej qhov tsua thiab qhov av.
³⁹Txawm yog muaj timkhawv zoo rau cov neeg no txhua tus txojkev ntseeg, los lawv tseem tsis tau txais tej uas cog lus cia, ⁴⁰vim Vajtswv twb npaj tej uas zoo dua ntawd cia rau peb kom lawv tsuas yog nrog peb ua ke xwb thiaj ua tau neeg zoo kawg nkaus.