2

Yexus Khetos tus Tubrog uas Ncaj Ncees

¹Kuv tus tub, koj yuav tsum cia siab rau Vajtswv txoj koob hmoov uas Vajtswv pub rau peb cov uas nrog Yexus Khetos sib raug zoo. ²Koj yuav tsum muab tej lus uas koj thiab muaj ntau leej hnov kuv qhia lawm qhia rau cov neeg uas koj cia siab tau hais tias lawv yuav txawj qhia tej ntawd rau lwm tus.
³Koj yuav tsum nyiaj kev txomnyem, rau qhov koj yog Yexus Khetos tus tubrog uas ncaj ncees. ⁴Rau qhov tus tubrog uas tabtom mus ntaus rog, nws yeej ua raws li nws tus thawj tubrog lub siab nyiam xwb, nws yuav tsis mus ua liaj ua teb thiab ua lag ua luam ib zaug li. ⁵Tus uas sib tw khiav yog nws tsis ua raws li kevcai khiav, nws yuav tsis tau nqi zog. ⁶Tus ua teb uas rau siab ntso ua, nws yuav xub tau noj tej qoobloo uas nws sau tau. ⁷Tej lus uas kuv hais no koj yuav tsum muab ua tib zoo xav, Vajtswv yuav pab kom koj totaub txhua lo huv tibsi.
⁸Koj yuav tsum nco ntsoov Yexus Khetos tus uas yog Daviv tus xeebntxwv uas Vajtswv tsa sawv hauv qhov tuag rov qab los lawm raws li Txojmoo Zoo uas kuv qhia. ⁹Twb yog vim kuv qhia Txojmoo Zoo, kuv thiaj raug kev tsimtxom thiab raug luag muab saw hlau khi ib yam li kuv yog tus neeg ua phem. Txawm yog luag khi tau kuv lawm los xij, yeej tsis muaj leejtwg yuav khi tau Vajtswv Txojlus. ¹⁰Twb yog vim li ntawd, kuv thiaj ua siab ntev nyiaj ib puas tsav yam kev txomnyem, rau qhov kuv hlub cov neeg uas Vajtswv tau xaiv cia lawm, thiab xav kom lawv los ntseeg Yexus Khetos, lawv thiaj dim lawv lub txim ib yam li peb thiab lawv thiaj tau Vajtswv txoj koob hmoov thiab lub tshwjchim uas ci ntsa iab mus ibtxhis. ¹¹Muaj ib lo lus tseeb uas hais tias,
“Yog peb nrog nws tuag lawm, peb
yuav tau nrog nws sawv hauv qhov tuag rov qab los.
¹²Yog peb ua taus siab ntev, peb yuav tau nrog nws kav.
Yog peb tso nws tseg, nws yeej yuav tso peb tseg thiab.”
¹³Txawm yog peb tsis ua ncaj los nws tseem ua ncaj,
rau qhov nws tsis rov dag nws ib zaug li.

Tus Tubtxib uas Ua Haum Vajtswv Siab

¹⁴Koj yuav tsum qhia zaj no rau cov ntseeg thiab ntuas lawv kom lawv tsis txhob sib cav sib ceg txog tej nyuag lus uas sawvdaws hais; tej ntawd tsis muaj qabhau dabtsi. Tej lus sib cav sib ceg ntawd yuav ua rau cov neeg uas mloog yuam kev xwb. ¹⁵Koj yuav tsum xyaum ua koj lub neej kom haum Vajtswv siab thiab muab siab rau ua koj tes haujlwm tiag tiag, koj thiaj yuav tsis txajmuag. Thiab koj yuav tsum qhia raws li Vajtswv Txojlus. ¹⁶Koj tsis txhob ua li cov neeg uas niaj hnub hais ua dog ua dig, tej ntawd tsis muaj qabhau dabtsi, tsuas muaj yuav ua rau sawvdaws tso Vajtswv tseg zuj zus xwb. ¹⁷Tej lus uas lawv hais ntawd yuav huam loj ib yam li lub qhov txhab uas qawj tob zuj zus. Cov xibhwb uas hais tej lus ntawd yog Himena-us thiab yog Filetus nkawd. ¹⁸Nkawd qhia tsis raws li Vajtswv Txojlus. Nkawd qhia hais tias cov ntseeg twb sawv hauv qhov tuag rov qab los lawm. Nkawd qhia li ntawd ua rau cov ntseeg qee leej tsis muab siab rau ntseeg lawm. ¹⁹Tiamsis tus ncej uas Vajtswv muab txhos cia lawm yeej nyob khov kho. Muaj lus sau cia rau ntawm tus ncej ntawd hais tias, “Vajtswv yeej paub txhua tus uas yog Vajtswv menyuam,” thiab hais tias, “Tus uas hais tias nws yog Vajtswv menyuam, tus ntawd yuav tsum tso nws tej kev txhaum tseg.”
²⁰Nyob hauv cov neeg uas npluanuj tej tsev muaj tais nyiaj tais kub thiab tais zeb tais av. Tej tais nyiaj tais kub, lawv muab los siv thaum muaj qhua tuaj, tiamsis thaum tsis muaj qhua tuaj lawv siv tej tais zeb tais av xwb. ²¹Yog leejtwg tso nws tej kev phem kev qias huv tibsi tseg, Vajtswv yuav muab ib txoj haujlwm tseemceeb rau nws ua, rau qhov nws zoo siab muab nws lub siab thiab lub cev huv tibsi rau Vajtswv kav thiab tos ntsoov saib Vajtswv yuav txib nws mus ua txoj haujlwm twg. ²²Koj tsis txhob ua siab heev ib yam li cov hluas ibtxwm ua. Koj yuav tsum ua neeg ncaj ncees thiab muab siab rau ntseeg, hlub lwm tus thiab nrog sawvdaws sib raug zoo. Koj yuav tsum ua zoo li cov neeg uas ua haum Vajtswv siab ua. Lawv yog cov uas niaj hnub thov Vajtswv pab lawv. ²³Koj tsis txhob ua li cov neeg uas niaj hnub hais tej zaj uas tsis muaj hauvpaus hauvntsis, rau qhov koj twb paub lawm hais tias tej ntawd yuav ua rau sawvdaws muaj lus sib cav sib ceg xwb. ²⁴Tus uas ua Vajtswv tus tubtxib yuav tsum tsis txhob nrog luag sib cav sib ceg, nws yuav tsum hlub txhua tus, muab siab rau qhia, ua siab ntev, ²⁵thiab ua tib zoo ntuas cov uas thuam nws. Yog nws ua li ntawd, tej zaum Vajtswv yuav pub kom cov neeg ntawd muaj sijhawm tso lawv tej kev txhaum tseg thiab ua raws li Vajtswv Txojlus. ²⁶Thiab lawv yuav nco dheev hais tias lawv twb mag dab Ntxwgnyoog lub vojhlua lawm, thiab dab Ntxwgnyoog pheej yuam kom lawv ua raws li dab Ntxwgnyoog lub siab. Thaum lawv nco li ntawd, lawv yuav khiav dim.

2

Yexus tus tub rog uas zoo

¹Vim li no, kuv tus tub, cia li muaj zog hauv txojkev hlub uas muaj hauv Yexus Khetos, ²thiab cia li muab tej lus uas koj tau hnov kuv qhia tab meeg ntau tus timkhawv cob rau cov neeg ncaj ncees uas muaj peevxwm qhia tau lwm tus qhia mus. ³Cia li koom nrog peb raug txom nyem yam li Yexus Khetos tus tub rog uas zoo. ⁴Tsis muaj ib tug uas ua tub rog yuav ntsig txog tej pejxeem li haujlwm vim nws yeej xav ua kom hum tus thawj rog lub siab. ⁵Thiab tus uas sib tw dhia yog nws tsis dhia raws li kevcai nws yeej yuav tsis tau tshav ntuj.⚓ ⁶Tus uas siv zog ua teb tsim nyog yog thawj tug uas tau qoob loo. ⁷Cia li tshuaj saib tej uas kuv hais vim tus Tswv yuav pub koj nkag siab txhua yam.
⁸Cia li nco txog Yexus Khetos. Nws raug tsa ciaj sawv hauv qhov tuag rov los, thiab nws yog Davi caj ces, raws li txoj xov zoo uas kuv qhia. ⁹Vim txoj xov zoo no kuv thiaj raug txom nyem thiab raug saw hlau khi yam li tus neeg phem. Tiamsis muab saw hlau khi Vajtswv txojlus tsis tau. ¹⁰Vim li no kuv thiaj tiv thev txhua yam vim yog saib rau cov uas xaiv cia lawd, kom lawv thiaj tau txais txojkev dim hauv Yexus Khetos thiab tau koob meej ci ntsa iab mus ib txhis. ¹¹Tej lus no tso siab tau, hais tias,
Yog peb nrog nws tuag lawm,
peb kuj yuav nrog nws muaj txojsia.
¹²Yog peb tiv thev,
peb kuj yuav tau nrog nws kav,
yog peb tsis lees yuav nws,
nws yeej yuav tsis lees yuav peb thiab.
¹³Yog peb tsis muaj siab xib rau nws,
nws tseem ua ncaj rau peb,
rau qhov nws yuav tso
qhov uas nws yog Vajtswv tseg tsis tau li.

Tus tub zog uas Vajtswv txaus siab

¹⁴Cia li qhia lawv nco txog tej no thiab nkaw lus rau lawv tab meeg tus Tswv kom lawv tsis txhob sib cam txog tej nyuag lo lus. Qhov ntawd tsis muaj qabhau thiab ua rau cov uas mloog puam tsuaj. ¹⁵Cia li siv zog ua kom Vajtswv pom tias koj yog ib tug uas hum nws siab, yog ib tug tub zog uas tsis txaj muag thiab qhia Vajtswv txojlus tseeb raug cai. ¹⁶Cia li zam tej lus tsis muaj qabhau uas saib tsis taus Vajtswv vim tej lus ntawd yuav ua rau neeg tso Vajtswv tseg zuj zus, ¹⁷thiab lawv tej lus yuav huam dav zuj zus yam li lub kiav txhab qawj. Hauv lawv cov ntawd muaj Himene‑a thiab Filetha ¹⁸uas twb yuam kev ntawm txojkev tseeb lawm vim ob tug qhia hais tias qhov uas ciaj sawv hauv qhov tuag rov los twb dhau tag lawm. Ob tug rhuav qee leej txojkev ntseeg lawm. ¹⁹Tiamsis tej taw uas Vajtswv tiag ruaj khov tseem nyob thiab nias hom thawj hais li no tias, “Tus Tswv paub cov uas yog nws li neeg,”⚓ thiab “Cia txhua tus uas tuav tus Tswv lub npe tso kev txhaum tseg.”
²⁰Ib lub tsev loj tsis yog muaj tej tais nyiaj tais kub xwb tseem muaj tais ntoo tais av thiab, qee yam yog siv rau qhov zoo qee yam yog siv rau qhov tsis zoo. ²¹Yog leejtwg ntxuav tej kev phem ntawm nws tus kheej lawm nws yuav yog tej twj taig uas siv rau qhov zoo, uas twb ntxuav kom dawb huv lawm thiab tus tswv tsev siv muaj qabhau, thiab npaj txhij rau txhua yam haujlwm zoo. ²²Vim li no cia li khiav ntawm tej kev phem uas cov hluas ntshaw thiab nrog cov uas muaj lub siab dawb paug tuav tus Tswv lub npe, cia li nrhiav txojkev ncaj ncees, kev ntseeg, kev hlub thiab kev sib hum xeeb. ²³Tsis txhob mus thab txog tej kev sib cam uas ruam thiab tsis muaj qabhau. Koj yeej paub tias tej ntawd ua kom muaj kev sib cav sib ceg xwb. ²⁴Tus Tswv tus tub qhe yuav tsum yog tus uas tsis nyiam sib cav sib ceg, muaj lub siab hlob txhua tus, mob siab qhuab qhia thiab ua lub siab ntev thev, ²⁵ua siab mos siab muag qhia cov uas tawm tsam nws. Tej zaum Vajtswv yuav pub lawv ntxeev dua siab los paub txojkev tseeb, ²⁶thiab dim Ntxwg Nyoog lub voj hlua, yog tus uas cuab ntes lawv kom ua raws li nws lub siab nyiam.