1

1Cansái ũat nâi puo Sa-lamôn chĩc languat laham clữi tễ canŏ́h.

Cumũr Pai

  2Yỗn ai hũn hĩt níc cứq a‑ễm;
   yuaq ŏ́c ayooq ai ngiam hỡn tễ blŏ́ng nho.
  3Hỡi phuom chanchức tễ tỗ ai;
   ramứh ai phuom ariang noau atia dỡq phuom.
  Lứq tỡ bữn liaq ntrớu máh cumũr ma ayooq ai.
  4Cóq ai dững cứq a‑ễm pỡq nứng ai;
   hái lúh parnơi.
  Sễq ai cỡt puo cứq a‑ễm, cớp dững cứq a‑ễm mut tâng clống ai bếq,
   dŏq ai cớp cứq a‑ễm bữn ŏ́c bũi parnơi.
  Toâq hái ayooq saryóq parnơi,
   lứq hái bũi clữi tễ nguaiq blŏ́ng nho ễn.
   Ngkíq cứq a‑ễm tỡ bữn dớt ntrớu máh cumũr ma ayooq ai.
  5Máh cumũr tễ vil Yaru-salem ơi! Cứq la cũai cũm, ma cũm nêuq nơ,
   ariang dống aroâiq pỡ ntốq aiq Kê-da;
   cớp o ariang aroâiq noau tíng tâng dống puo Sa-lamôn.
  6Chỗi nhêng cloân chu cứq cỗ cứq cũm;
   cứq cũm cỗ moat mandang claq.
  Máh ai ca muoi mpiq cớp cứq,
   alới nhôp cớp ễp cứq kĩaq dếh táq níc ranáq tâng nưong nho.
   Ngkíq yuaq cứq bĩq bữn rlu dŏq pasang tỗ chác.
  7Ơ ai cứq a‑ễm ayooq ơi! Sễq ai atỡng cứq a‑ễm dáng,
   ntốq léq ai ễ dững bán máh cữu ai yỗn chuaq cha?
  Toâq mandang toâng ai ễ dững máh cữu ỡt rlu pỡ ntốq léq?
  Cỗ nŏ́q ai ma táq yỗn cứq a‑ễm cóq chi-chuaq níc ai tâng mpứng dĩ máh tỗp charán cũai canŏ́h?

Tatoam Pai

  8Ơ mansễm la‑ĩat o lứq ơi! Nŏ́q a‑ễm tỡ bữn dáng ntốq ki tỡ?
   Khân a‑ễm tỡ bữn dáng,
   ki yỗn a‑ễm boi máh lứm cữu.
  Cóq a‑ễm chuaq ruang bát dŏq bán máh mbễq lơ-lơ
   khong a‑ễm ca ỡt cheq máh dống aroâiq tỗp mantán dốq ỡt rlu.
  9A‑ễm cứq ai ayooq ơi!
   Thán riang a‑ễm payoc mứt pahỡm máh cũai samiang.
   A‑ễm la samoât aséh cán ca payoc aséh tôl puo Ê-yip-tô.
  10Mieiq a‑ễm nêuq lứq rapóc cớp latai;
   tacong a‑ễm cỡt nêuq yỗn ngcuac sanoâc tamáu moat.
  11Cứq ễ táq yỗn a‑ễm sanoâc yễng,
   cớp atớt dếh práq.

Cumũr Pai

  12Bo puo cứq a‑ễm ntôm bếq muoi rarêng tâng cachơng,
   hỡi dỡq phuom cứq atia pláh chũop clống.
  13Ai cứq a‑ễm ayooq, la samoât tũi siet phuom
   cứq a‑ễm ngcuac tâng tacong cớp dŏq tâng apơm.
  14Ai cứq a‑ễm ayooq la samoât máh piar bỗn-rabỗn
   tâng nưong nho pỡ vil En Kê-di.

Tatoam Pai

  15A‑ễm cứq ai ayooq ơi! A‑ễm la mansễm thán riang o;
   moat a‑ễm la raloang nêuq o samoât chớm tariap.

Cumũr Pai

  16Ai cứq a‑ễm ayooq ơi! Roâp riang ai o lứq,
   táq yỗn cứq a‑ễm bũi pahỡm.
  Bát bai ramoong cỡt ntốq hái bếq;
  17abễng aluang sê-da cỡt samoât mpuol dống hái,
   aluang sango cỡt samoât chỗih dống hái.