17

Yehausafas ua Vajntxwv

¹Yehausafas ua vajntxwv hloov nwg txiv Axas chaw, thiab nws hajyam ua rog hnyav rau cov Yixalayees. ²Nws tso tubrog mus nyob rau hauv cov Yudas tej nroog uas muaj ntsa yeej thaiv, tej nroog hauv tebchaws Yudas, thiab tej nroog hauv xeev Efalayees uas nws txiv Axas txeeb tau los. ³Vim Yehausafas ua raws li nws txiv lub neej thaum xub thawj, nws tsis pe Npa-as, tus TSWV thiaj foom koob hmoov rau nws. ⁴Nws pehawm nws txiv tus Vajtswv, thiab nws ua raws li Vajtswv tej lus samhwm, nws tsis ua li cov Yixalayees tej vajntxwv ua. ⁵Tus TSWV thiaj pub Yehausafas tswj tau lub tebchaws Yudas nyob ruaj khov, thiab cov pejxeem coj khoom tuaj pub rau nws. Yog li ntawd, nws thiaj muaj txiag npluanuj thiab muaj koob meej nto moo lug. ⁶Nws kub siab lug ua raws li tus TSWV txoj kevcai, thiab nws rhuav tej chaw teev dab thiab tus mlom pojniam Aselas hauv tebchaws Yudas povtseg.
⁷Thaum Yehausafas kav tebchaws tau peb xyoos, nws tsa Npeehais, Aunpadiyas, Xakhaliyas, Nethanees thiab Mikayas uas yog nws cov nomtswv mus cob qhia cov Yudas nyob txhua lub nroog. ⁸Muaj cuaj tug Levis thiab ob tug povthawj nrog cov nomtswv ntawd mus. Cov Levis yog Semayas, Nethaniyas, Xenpadiyas, Axahees, Semilamaus, Yehaunathas, Adauniyas, Taunpiyas thiab Taunpadauniyas; thiab ob tug povthawj yog Elisamas thiab Yehaulas. ⁹Lawv coj tus TSWV phau ntawv Kevcai mus cob qhia cov pejxeem sawvdaws uas nyob txhua lub nroog hauv tebchaws Yudas.

Yehausafas Lub Koob Meej

¹⁰Tus TSWV ua rau tej tebchaws uas nyob ibncig ntshai thiab tsis tuaj tua Vajntxwv Yehausafas lawm. ¹¹Cov Filitees qee leej coj nyiaj thiab khoom ntau heev tuaj pub rau Yehausafas, thiab cov Alav coj xya txhiab xya pua tus yaj thiab xya txhiab xya pua tus tshis tuaj pub rau nws. ¹²Yog li ntawd, Yehausafas thiaj muaj hwjchim heev zuj zus. Nws ua ntau lub chaw fajxwm thiab ntau lub tsev rau hauv tej nroog thoob tebchaws Yudas, ¹³thiab nws coj khoom ntau heev mus cia rau hauv.
Yehausafas tso cov tubrog uas txawj tua rog heev nyob hauv lub nroog Yeluxalees, ¹⁴raws li lawv tej cuab kwvtij. Adinas yog tus thawj saib cov tubrog uas yog xeem Yudas thiab nws muaj peb puas txhiab leej. ¹⁵Yehauhanas yog ob, nws saib ob puas yim caum txhiab leej tubrog, ¹⁶thiab tus peb yog Xikhalis uas yog Amaxiyas tus tub, nws saib ob puas txhiab leej tubrog, (Amaxiyas yog ib tug uas txaus siab ua tus TSWV tes haujlwm heev.) ¹⁷Eli-adas yog tus thawj saib cov tubrog uas yog xeem Npeenyamees, nws yog ib tug tubrog uas ua tau heev, nws saib ob puas txhiab leej tubrog uas muaj daim thaiv hniav ntaj thiab muaj hneevnti. ¹⁸Yehauxanpas yog tus ob, nws saib ib puas yim caum txhiab leej tubrog thiab nws muaj tej cuab yeej ua rog zoo heev. ¹⁹Cov tubrog no ua haujlwm rau vajntxwv nyob hauv lub nroog Yeluxalees, thiab vajntxwv tseem tso dua lwm pab tubrog mus nyob rau hauv cov Yudas tej nroog uas muaj ntsa yeej thaiv.

17

Yehausafa ua vajntxwv kav Yuda

¹Axa tus tub Yehausafa sawv nws chaw ua vajntxwv kav Yuda thiab cuab zog npaj tawm tsam cov Yixayee. ²Nws xa tub rog nyob rau hauv Yuda txhua lub moos uas muaj ntsa loog thiab tsa tub rog mus zov thoob plaws Yuda tebchaws thiab hauv Efa‑i tej moos uas nws txiv Axa twb txeeb tau lawd. ³Yawmsaub nrog nraim Yehausafa nyob rau qhov Yehausafa taug nraim nws txiv⚓ txojkev uas thaum nws txiv pib ua vajntxwv, nws tsis nrhiav teev tej dab Npa‑as, ⁴nws nrhiav Vajtswv uas yog nws txiv tus Vajtswv thiab ua lub neej raws li Vajtswv tej lus nkaw, nws tsis ua raws li cov Yixayee ua. ⁵Vim li no Yawmsaub thiaj pub nws kav tau lub tebchaws nyob ruaj khov. Mas tag nrho cov Yuda coj tshav ntuj tuaj pub rau Yehausafa, nws thiaj nplua nuj heev thiab muaj koob meej. ⁶Nws muaj siab loj siab tuab ua raws li Yawmsaub txojkev. Thiab nws rhuav tshem tej chaw siab uas teev dab thiab tej ncej dab Asela hauv Yuda tebchaws mus.
⁷Xyoo peb uas nws ua vajntxwv kav, nws txib nws cov thawj uas yog Npeeha‑i, Aunpadiya, Xekhaliya, Nethanee thiab Mikhaya mus qhia rau hauv Yuda tej moos. ⁸Thiab cov Levi no kuj nrog lawv mus, yog Semaya, Nethaniya, Xenpadiya, Axahee, Semilamau, Yehaunathas, Adauniya, Thaunpiya thiab Thau‑adauniya thiab nrog cov Levi no ua ke yog Elisama thiab Yehaulas uas ua pov thawj. ⁹Lawv coj Yawmsaub phau ntawv kevcai mus qhuab qhia thoob plaws Yuda tebchaws. Lawv mus txhua nrho Yuda tej moos thiab qhia cov pejxeem.
¹⁰Yawmsaub ua rau txhua lub tebchaws uas nyob ib ncig Yuda ntshai heev, lawv thiaj tsis tuaj ua rog rau Yehausafa. ¹¹Cov Filixatee qee leej coj tshav ntuj tuaj pub rau Yehausafa thiab coj nyiaj tuaj them se rau nws. Cov Alam kuj coj xya txhiab xya pua tus txiv yaj thiab xya txhiab xya pua tus txiv tshis tuaj pub rau nws. ¹²Yehausafa thiaj vam meej heev zuj zus tuaj. Nws tsim tej chaw ruaj khov thiab tej moos khaws qhov txhia chaw hauv Yuda tebchaws, ¹³thiab nws khaws qhov txhia chaw ntau kawg cia rau hauv Yuda tej moos. Nws muaj cov tub rog uas siab loj siab tuab nyob hauv Yeluxalees. ¹⁴Ntawm no mus yog txheeb cov tub rog raws li lawv xeem. Xeem Yuda cov thawj uas kav ib txhiab leej ib tug yog Anas uas ua thawj kav 300,000 leej tub rog uas siab loj siab tuab, ¹⁵tus ob yog Yehauhanas uas ua tus thawj kav 280,000 leej, ¹⁶tus peb yog Xikhi tus tub Amasiya uas yeem ua koom tu Yawmsaub, nws kav 200,000 leej tub rog uas siab loj siab tuab. ¹⁷Xeem Npeeyamee muaj Eliyada uas yog tub rog siab loj siab tuab kav 200,000 leej tub rog uas muaj hneev thiab daim phiaj hlau thaiv. ¹⁸Tus ob yog Yehauxanpa uas kav 180,000 leej uas muaj cuab yeej ua rog. ¹⁹Cov no tu vajntxwv tsis suav rau cov tub rog uas vajntxwv txib mus nyob rau hauv tej moos uas muaj ntsa loog thoob Yuda tebchaws lawd.