65

Teem txim rau cov uas fav xeeb

¹“Kuv yeejlos tos rawv
cov uas tsis tau thov kuv, los cuag kuv,
kuv tos rawv cov uas tsis nrhiav kuv
ntsib tau kuv.
Kuv hais rau haiv neeg
uas tsis thov hu kuv lub npe hais tias,
‘Kuv nyob ntawm no, kuv nyob ntawm no.’
²Kuv cev kuv txhais tes tas hnub tas hmo
rau haiv neeg uas pheej fav xeeb,
yog cov uas taug txojkev tsis zoo,
thiab ua raws li lawv tej tswvyim phem.
³Lawv pheej zes kuv tim ntsej tim muag
tsis tu ncua.
Lawv xyeem qhov txhia chaw
hauv lawv tej vaj thiab hlawv hmoov xyab
xyeem rau saum tej thwv cib.
⁴Lawv mus zaum rau hauv tej qhov ntxa,
thiab pw ib hmos nraim cev rau hauv.
Lawv noj nqaij npua,
thiab hauv lawv tej laujkaub
muaj tej zaub xyaw tej nqaij qias vuab tsuab.
⁵Lawv hais tias, ‘Koj khiav mus deb deb,
tsis txhob txav los ze kuv,
vim kuv dawb huv dua koj.’
Cov no yog tej pa hauv kuv qhov ntswg
thiab yog tej hluavtaws uas kub
ib hnub tsaus ntuj.
⁶Saib maj, twb sau tab meeg ntawm kuv
hais tias, kuv yuav tsis nyob twjywm,
kuv yuav ua pauj,
kuv yeej yuav ua pauj
rau hauv lawv xubntiag,
⁷yog pauj rau tej kev txhaum uas nej
thiab nej tej poj koob yawm txwv tau ua huvsi.”
Yawmsaub hais li no ntag.
“Vim lawv hlawv xyab saum tej roob
thiab rhuav kuv ntsej muag
rau saum tej pov roob,
kuv yuav them tus nqe txwm nkaus
rau hauv lawv xubntiag
ua pauj tej uas lawv ua thaum ub los lawd.”

⁸Yawmsaub hais li no tias, “Kua txiv
tseem tshuav nyob hauv tauv txiv hmab li cas
mas lawv hais tias, ‘Tsis txhob
muab pov tseg vim tias tseem tshuav
yam uas zoo nyob hauv,’
ib yam li ntawd, vim yog saib rau kuv tus qhev,
kuv yuav tsis muab lawv
ua kom puam tsuaj tag huvsi.
⁹Kuv yuav pub Yakhauj muaj caj ces,
thiab pub Yuda muaj
cov uas tau kuv tej roob ua lawv tug.
Cov uas kuv xaiv cia lawd
yuav tau tej ntawd ua qub txeeg qub teg,
thiab kuv cov tub qhe
yuav tau nyob qhov ntawd.
¹⁰Kuv haiv neeg uas nrhiav kuv
yuav muaj lub nras tiaj Saloo
ua tshav zaub yug yaj yug tshis,
thiab yuav muaj lub hav Akhauj
ua tshav rau tej nyuj pw.
¹¹Tiamsis nej cov uas tso Yawmsaub tseg
thiab tsis nco qab kuv lub roob dawb huv,
nej tau npaj rooj mov
teev tus dab saib hmoov,
thiab muab cawv tov ntim khob xyeem
rau tus dab uas npaj lub khuab rau nej.
¹²Kuv yuav muab nej lub khuab
cob rau hniav ntaj,
mas nej sawvdaws yuav khoov ntshis
pe txojkev tua neeg,
rau qhov thaum kuv hu, nej tsis teb,
thaum kuv hais nej tsis mloog,
tiamsis nej tau ua tej uas kuv pom tias
phem kawg thiab xaiv yuav yam
uas kuv tsis zoo siab.”
¹³Vim li no Yawmsaub thiaj hais li no tias,
“Saib maj, kuv cov tub qhe yuav tau noj
tiamsis nej yuav tshaib,
kuv cov tub qhe yuav tau haus,
tiamsis nej yuav nqhis,
kuv cov tub qhe yuav zoo siab xyiv fab
tiamsis nej yuav raug txaj muag.
¹⁴Saib maj, kuv cov tub qhe yuav hu nkauj
vim yog zoo siab
tiamsis nej yuav quaj qw vim yog tu siab
thiab yuav quaj nyiav vim yog lwj siab.
¹⁵Nej yuav tso nej lub npe tseg cia
rau cov uas kuv xaiv cia lawd siv
ua lo lus tsawm foom.
Thiab Vajtswv Yawmsaub yuav muab nej
tua pov tseg,
tiamsis nws yuav tis dua lub npe tshiab
rau nws cov tub qhe.
¹⁶Leejtwg thov koob hmoov rau nws tus kheej
hauv lub tebchaws yuav tuav nws tus Vajtswv
uas muaj tseeb lub npe thov xwb.
Thiab leejtwg hais lus twv dabtsi
hauv lub tebchaws yuav tuav Vajtswv
uas muaj tseeb lub npe twv,
rau qhov tej kev txom nyem ceeblaj
yav thaum ub kuj tsis nco qab tag lawm
thiab ploj tag ntawm kuv lub qhov muag.”

Lub ntuj tshiab thiab lub ntiajteb tshiab

¹⁷“Saib maj, kuv yuav tsim lub ntuj tshiab
thiab lub ntiajteb tshiab,
rau qhov tej uas muaj nyob yav thaum ub los
yuav tsis nco thiab tsis xav txog dua li lawm.
¹⁸Cia li zoo siab thiab xyiv fab mus ib txhis
rau yam uas kuv tsim los,
rau qhov kuv tsim Yeluxalees
ua lub chaw xyiv fab
thiab tsim nws cov neeg
kom zoo siab xyiv fab.
¹⁹Kuv yuav zoo siab xyiv fab rau Yeluxalees
thiab zoo siab rau kuv haiv neeg.
Yuav tsis hnov lub suab quaj
thiab lub suab quaj txom nyem nyuaj siab
rau hauv lub nroog ntawd dua li lawm.
²⁰Hauv lub nroog ntawd yuav tsis muaj
ib tug menyuam mos uas muaj txojsia
nyob ob peb hnub xwb dua li lawm,
thiab yuav tsis muaj ib tug laus
nyob tsis puv sijhawm.
Tus uas hnub nyoog muaj ib puas xyoo li tuag
yuav suav tias tseem hluas,
tus neeg uas nyob tsis puv ib puas xyoo⚓
yuav suav tias raug tsawm foom.
²¹Lawv yuav ua vaj tse
thiab tau nyob rau hauv,
lawv yuav cog vaj txiv hmab
thiab tau noj tej txiv ntawd.
²²Lawv yuav tsis ua vaj tse
rau lwm tus los nyob,
lawv yuav tsis cog rau lwm tus noj,
rau qhov kuv haiv neeg li hnub nyoog
yuav zoo yam li tej ntoo,
thiab cov uas kuv xaiv cia lawd
yuav tau siv tej uas
lawv txhais tes ua ntev kawg li.
²³Lawv yuav tsis khwv do do xwb,
lossis yug menyuam los raug vij sub vij sw,
rau qhov lawv yuav ua cov uas tau
Yawmsaub koob hmoov li tub ki,
tsis hais lawv thiab lawv tej menyuam.
²⁴Ua ntej uas lawv tsis tau thov, kuv yuav teb,
thaum lawv tseem tabtom hais,
kuv yuav mloog.
²⁵Hma thiab menyuam yaj
yuav noj zaub ua ke,
tsov ntxhuav yuav noj quav nyab
ib yam li nyuj,
thiab nab yuav noj hmoov av.
Tej tsiaj ntawd yuav tsis ua kom mob
thiab tsis ua kom puam tsuaj
thoob plaws hauv kuv lub roob uas dawb huv.”
Yawmsaub hais li no ntag.

65

Teem txem rua cov kws faav xeeb

¹“Kuv yeejlos tog rawv cov kws tsw tau thov kuv, lug cuag kuv,
kuv tog rawv cov kws tsw nrhav kuv ntswb tau kuv.
Kuv has rua haiv tuabneeg kws tsw thov hu kuv lub npe has tas,
‘Kuv nyob ntawm nuav, kuv nyob ntawm nuav.’
²Kuv cev kuv txhais teg taag naj taag nub
rua haiv tuabneeg kws pheej faav xeeb,
yog cov kws taug txujkev tsw zoo,
hab ua lawv le puab tej tswvyim phem.
³Puab pheej zwg kuv tim ntsej tim muag tsw tu ncua.
Puab xyeem hov txhua chaw huv puab tej vaaj
hab hlawv moov xyaab xyeem rua sau tej thwv cib.
⁴Puab moog nyob quas tsawg rua huv tej qhov ntxaa,
hab pw ib mos nraim cev rua huv.
Puab noj nqaj npua, hab huv puab tej laujkaub
muaj tej zaub xyaw tej nqaj qas vuab tsuab.
⁵Puab has tas, ‘Koj tswv moog deb deb,
tsw xob txaav lug ze kuv,
vem kuv dawb huv dua koj.’
Cov nuav yog tej paa huv kuv qhov ntswg
hab yog tej suavtawg kws kub ib nub tsaus ntuj.
⁶Saib maj, tub sau taab meeg ntawm kuv has tas,
kuv yuav tsw nyob tuabywv, kuv yuav ua pauj,
kuv yeej yuav ua pauj rua huv puab xubndag,
⁷yog pauj rua tej kev txhum kws mej
hab mej tej laug tau ua huvsw.”
Yawmsaub has le nuav ntaag.
“Vem puab hlawv xyaab sau tej roob
hab rhuav kuv ntsej muag rua sau tej pov roob,
kuv yuav them tug nqe txwm nkaus rua huv puab xubndag
ua pauj tej kws puab ua thau u lug lawd.”

⁸Yawmsaub has le nuav tas,
“Kua txwv tseed tshuav nyob huv tauv txwv maab le caag
mas puab has tas, ‘Tsw xob muab pov tseg
vem tas tseed tshuav yaam kws zoo nyob huv,’
ib yaam le ntawd, vem yog saib rua kuv tug qhev,
kuv yuav tsw muab puab ua kuas puam tsuaj taag huvsw.
⁹Kuv yuav pub Yakhauj muaj caaj ceg,
hab pub Yuta muaj cov kws tau kuv tej roob ua puab tug.
Cov kws kuv xaiv ca lawd yuav tau tej ntawd
ua qub txeeg qub teg,
hab kuv cov tub qhe yuav tau nyob hov ntawd.
¹⁰Kuv haiv tuabneeg kws nrhav kuv yuav muaj lub nraag taj Saloo
ua tshaav zaub yug yaaj yug tshws,
hab yuav muaj lub haav Akhauj
ua tshaav rua tej nyuj pw.
¹¹Tassws mej cov kws tso Yawmsaub tseg
hab nov qaab kuv lub roob dawb huv,
mej tau npaaj rooj mov teev tug daab saib moov,
hab muab cawv tov ntim khob
xyeem rua tug daab kws npaaj lub khuab rua mej.
¹²Kuv yuav muab mej lub khuab cob rua nav ntaaj,
mas mej suavdawg yuav khoov ntshws pe txujkev tua tuabneeg,
tsua qhov thaus kuv hu, mej tsw teb,
thaus kuv has mej tsw noog,
tassws mej tau ua tej kws kuv pum tas phem kawg
hab xaiv yuav yaam kws kuv tsw zoo sab.”
¹³Vem le nuav Yawmsaub txhad has le nuav tas,
“Saib maj, kuv cov tub qhe yuav tau noj
tassws mej yuav tshaib,
kuv cov tub qhe yuav tau haus,
tassws mej yuav nqhes,
kuv cov tub qhe yuav zoo sab xyiv faab
tassws mej yuav raug txaaj muag.
¹⁴Saib maj, kuv cov tub qhe yuav hu nkauj vem yog zoo sab
tassws mej yuav quaj qw vem yog tu sab
hab yuav quaj nyav vem yog lwj sab.
¹⁵Mej yuav tso mej lub npe tseg ca
rua cov kws kuv xaiv ca lawd swv ua lu lug tsawm foom.
Hab Vaajtswv Yawmsaub yuav muab mej tua pov tseg,
tassws nwg yuav tis dua lub npe tshab rua nwg cov tub qhe.
¹⁶Leejtwg thov koob moov rua nwg tug kheej huv lub tebchaws
yuav tuav nwg tug Vaajtswv kws muaj tseeb lub npe thov xwb.
Hab leejtwg has lug twv daabtsw huv lub tebchaws
yuav tuav Vaajtswv kws muaj tseeb lub npe twv,
tsua qhov tej kev txom nyem ceblaaj yaav thau u
kuj nov qaab taag lawm hab pluj taag ntawm kuv lub qhov muag.”

Lub ntuj tshab hab lub nplajteb tshab

¹⁷“Saib maj, kuv yuav tswm lub ntuj tshab
hab lub nplajteb tshab,
tsua qhov tej kws muaj nyob yaav thau u lug
yuav tsw ncu hab tsw xaav txug dua le lawm.
¹⁸Ca le zoo sab hab xyiv faab moog ib txhws
rua yaam kws kuv tswm lug,
tsua qhov kuv tswm Yeluxalee ua lub chaw xyiv faab
hab tswm nwg cov tuabneeg kuas zoo sab xyiv faab.
¹⁹Kuv yuav zoo sab xyiv faab rua Yeluxalee
hab zoo sab rua kuv haiv tuabneeg.
Yuav tsw nov lub suab quaj
hab lub suab quaj txom nyem nyuaj sab
rua huv lub nroog hov dua le lawm.
²⁰Huv lub nroog hov yuav tsw muaj ib tug mivnyuas mog
kws muaj txujsa nyob ob peb nub xwb dua le lawm,
hab yuav tsw muaj ib tug laug nyob tsw puv swjhawm.
Tug kws noob nyoog muaj ib puas xyoo le tuag
yuav suav tas tseed hluas,
tug tuabneeg kws nyob tsw puv ib puas xyoo⚓
yuav suav tas raug tsawm foom.
²¹Puab yuav ua vaaj tse hab tau nyob rua huv,
puab yuav cog vaaj txwv maab hab tau noj tej txwv ntawd.
²²Puab yuav tsw ua vaaj tse rua lwm tug lug nyob,
puab yuav tsw cog rua lwm tug noj,
tsua qhov kuv haiv tuabneeg le noob nyoog
yuav zoo yaam le tej ntoo,
hab cov kws kuv xaiv ca lawd
yuav tau swv tej kws puab txhais teg ua ntev kawg le.
²³Puab yuav tsw khwv do do xwb,
lossws yug mivnyuas lug raug vej sub vej sw,
tsua qhov puab yuav ua cov kws tau Yawmsaub koob moov le tub ki,
tsw has puab hab puab tej mivnyuas.
²⁴Ua ntej kws puab tsw tau thov, kuv yuav teb,
thaus puab tseed saamswm has, kuv yuav noog.
²⁵Maa hab mivnyuas yaaj yuav noj zaub ua ke,
tsuv ntxhuav yuav noj quav nyaab ib yaam le nyuj,
hab naab yuav noj moov aav.
Tej tsaj hov yuav tsw ua kuas mob hab tsw ua kuas puam tsuaj
thoob plawg huv kuv lub roob kws dawb huv.”
Yawmsaub has le nuav ntaag.