1

Paj lug muaj nqes

¹Cov lus no yog Davi tus tub Xalaumoo uas yog cov Yixayee tus vajntxwv li paj lug
²ua kom tau tswvyim thiab paub kevcai ua neej,
thiab to taub tej lus txawj ntse,
³khaws tej lus qhuab qhia uas qhia
kev thoob tsib to nrog
thiab kev txiav txim ncaj thiab kev ua ncaj
thiab qhov uas ua ncaj nruab nrab,
⁴muab txojkev thoob tsib to nrog
rau tus uas tsis paub qabhau,
muab kev txawj ntse thiab kev paub txhij
paub txhua rau tus hluas.
⁵Tus txawj ntse tau hnov
thiab tsav kev paub rau nws,
thiab tus uas thoob tsib to nrog
yuav tau peevxwm ua haujlwm,
⁶kom thiaj nkag siab paj lug piv lus,
thiab nkag siab cov txawj ntse tej lus
thiab tej txhiaj txhais.
⁷Qhov uas hwm thiab paub ntshai Yawmsaub
yog lub hauv paus txawj ntse,
tus ruam yeej saib tsis taus tswvyim
thiab tej lus qhuab qhia.

Ntuas cov hluas

⁸Kuv tub 'e, cia li mloog koj txiv tej lus qhuab qhia,
thiab tsis txhob muab koj niam tej lus qhia tso tseg,
⁹rau qhov tej lus ntawd yog lub mom paj ntoos
zoo nkauj saum koj taubhau
thiab yog tej saw nyiaj ntawm koj caj dab.
¹⁰Kuv tub 'e, yog tej neeg muaj txim ntxias koj,
tsis txhob yeem mus.
¹¹Yog lawv hais tias, “Nrog peb mus,
cia peb mus zov kev tos tua neeg,
cia peb mus zov kev
tos tus uas tsis ua txhaum muab ntaus ua si.
¹²Cia peb muab nws nqos ciaj yam li tub tuag teb,
thiab nqos kheej ib yam li lawv cov
uas nqes rau hauv qhov tuag.
¹³Peb yuav tau tej qhov txhia chaw
tsim txiaj txhua yam,
peb yuav muab tej uas peb txeeb tau los
ntim puv nkaus hauv peb tej tsev.
¹⁴Koj cia li nrog peb koom,
peb sawvdaws yuav koom ib lub hnab nyiaj.”
¹⁵Kuv tub 'e, tsis txhob nrog lawv mus,
yuav tsum tswj koj txhais kotaw
ntawm lawv txojkev,
¹⁶rau qhov lawv txhais kotaw dhia mus ua phem,
thiab lawv maj nroos mus txov luag los ntshav.
¹⁷Cuab vas rau noog pom
yeej tsis tau qabhau.
¹⁸Tiamsis cov neeg no nyas zov tos
lawv tus kheej li ntshav,
thiab zov kev txov lawv txojsia.
¹⁹Txhua tus uas ua nruj ua tsiv
es tau nyiaj txiag yeej yuav zoo li no,
tej nyiaj txiag ntawd yuav rov txov lawv txojsia.

Tswvyim nqua hu

²⁰Tswvyim hu nrov nrov ntawm tej kev,
nws tsa suab hu ntawm tshav puam.
²¹Nws tuaj saum tej ntsa loog hu
thiab piav ntawm rooj loog
uas nkag rau hauv lub nroog, hais tias
²²“Nej cov uas tsis thoob tsib 'e,
nej yuav nyiam txojkev tsis thoob tsib
mus ntev li cas?
Thiab cov uas thuam luag
yuav zoo siab thuam mus ntev li cas?
Thiab cov uas ruam
yuav ntxub kev txawj ntse ntev li cas?
²³Nej cia li tig pob ntseg mloog
kuv tej lus qhuab ntuas.
Saib maj, kuv yuav nchuav
tej uas kuv xav hauv lub siab rau nej,
kuv yuav muab kuv tej lus qhia tseeb rau nej.
²⁴Kuv twb hu los nej tsis yeem mloog,
kuv twb cev tes los tsis muaj leejtwg quav ntsej,
²⁵thiab nej tsis yeem txais yuav
kuv tej lus taw qhia,
thiab tsis yeem yuav
kuv tej lus qhuab ntuas kiag li.
²⁶Vim li no kuv yuav luag qhov uas
nej raug kev puam tsuaj,
thiab kuv yuav luag rau thaum uas
nej ntshai ras zom zaws,
²⁷thiab thaum kev ntshai ras los raug nej
zoo yam nkaus li cua daj cua dub,
thiab kev puam tsuaj los raug nej
yam li khaub zeeg cua,
thiab thaum kev txom nyem kev nyuaj siab
los raug nej.
²⁸Mas lawv yuav thov kuv los kuv yuav tsis teb.
Lawv yuav siv zog nrhiav kuv
tiamsis nrhiav tsis tau.
²⁹Vim lawv ntxub kev txawj ntse
thiab tsis xaiv yuav qhov uas hwm
thiab paub ntshai Yawmsaub,
³⁰thiab lawv tsis yuav kuv tej lus taw qhia kiag li
thiab saib tsis taus kuv tej lus qhuab ntuas huvsi,
³¹vim li no lawv yuav saws raws li tej uas lawv ua,
thiab lawv tej tswvyim ua phem rau luag
yuav rov raug lawv pov khawv nkaus.
³²Cov neeg tsis thoob tsib raug tua
vim yog lawv tsis quav ntsej tej lus qhia,
thiab cov neeg ruam raug puam tsuaj
vim yog ua lag ua ta.
³³Tiamsis tus uas mloog kuv
yuav nyob tso siab plhuav,
thiab yuav nyob kaj siab lug
tsis txhawj tsis ntshai ib yam kev phem kiag li.”