65

Teem txim rau cov uas fav xeeb

¹“Kuv yeejlos tos rawv
cov uas tsis tau thov kuv, los cuag kuv,
kuv tos rawv cov uas tsis nrhiav kuv
ntsib tau kuv.
Kuv hais rau haiv neeg
uas tsis thov hu kuv lub npe hais tias,
‘Kuv nyob ntawm no, kuv nyob ntawm no.’
²Kuv cev kuv txhais tes tas hnub tas hmo
rau haiv neeg uas pheej fav xeeb,
yog cov uas taug txojkev tsis zoo,
thiab ua raws li lawv tej tswvyim phem.
³Lawv pheej zes kuv tim ntsej tim muag
tsis tu ncua.
Lawv xyeem qhov txhia chaw
hauv lawv tej vaj thiab hlawv hmoov xyab
xyeem rau saum tej thwv cib.
⁴Lawv mus zaum rau hauv tej qhov ntxa,
thiab pw ib hmos nraim cev rau hauv.
Lawv noj nqaij npua,
thiab hauv lawv tej laujkaub
muaj tej zaub xyaw tej nqaij qias vuab tsuab.
⁵Lawv hais tias, ‘Koj khiav mus deb deb,
tsis txhob txav los ze kuv,
vim kuv dawb huv dua koj.’
Cov no yog tej pa hauv kuv qhov ntswg
thiab yog tej hluavtaws uas kub
ib hnub tsaus ntuj.
⁶Saib maj, twb sau tab meeg ntawm kuv
hais tias, kuv yuav tsis nyob twjywm,
kuv yuav ua pauj,
kuv yeej yuav ua pauj
rau hauv lawv xubntiag,
⁷yog pauj rau tej kev txhaum uas nej
thiab nej tej poj koob yawm txwv tau ua huvsi.”
Yawmsaub hais li no ntag.
“Vim lawv hlawv xyab saum tej roob
thiab rhuav kuv ntsej muag
rau saum tej pov roob,
kuv yuav them tus nqe txwm nkaus
rau hauv lawv xubntiag
ua pauj tej uas lawv ua thaum ub los lawd.”

⁸Yawmsaub hais li no tias, “Kua txiv
tseem tshuav nyob hauv tauv txiv hmab li cas
mas lawv hais tias, ‘Tsis txhob
muab pov tseg vim tias tseem tshuav
yam uas zoo nyob hauv,’
ib yam li ntawd, vim yog saib rau kuv tus qhev,
kuv yuav tsis muab lawv
ua kom puam tsuaj tag huvsi.
⁹Kuv yuav pub Yakhauj muaj caj ces,
thiab pub Yuda muaj
cov uas tau kuv tej roob ua lawv tug.
Cov uas kuv xaiv cia lawd
yuav tau tej ntawd ua qub txeeg qub teg,
thiab kuv cov tub qhe
yuav tau nyob qhov ntawd.
¹⁰Kuv haiv neeg uas nrhiav kuv
yuav muaj lub nras tiaj Saloo
ua tshav zaub yug yaj yug tshis,
thiab yuav muaj lub hav Akhauj
ua tshav rau tej nyuj pw.
¹¹Tiamsis nej cov uas tso Yawmsaub tseg
thiab tsis nco qab kuv lub roob dawb huv,
nej tau npaj rooj mov
teev tus dab saib hmoov,
thiab muab cawv tov ntim khob xyeem
rau tus dab uas npaj lub khuab rau nej.
¹²Kuv yuav muab nej lub khuab
cob rau hniav ntaj,
mas nej sawvdaws yuav khoov ntshis
pe txojkev tua neeg,
rau qhov thaum kuv hu, nej tsis teb,
thaum kuv hais nej tsis mloog,
tiamsis nej tau ua tej uas kuv pom tias
phem kawg thiab xaiv yuav yam
uas kuv tsis zoo siab.”
¹³Vim li no Yawmsaub thiaj hais li no tias,
“Saib maj, kuv cov tub qhe yuav tau noj
tiamsis nej yuav tshaib,
kuv cov tub qhe yuav tau haus,
tiamsis nej yuav nqhis,
kuv cov tub qhe yuav zoo siab xyiv fab
tiamsis nej yuav raug txaj muag.
¹⁴Saib maj, kuv cov tub qhe yuav hu nkauj
vim yog zoo siab
tiamsis nej yuav quaj qw vim yog tu siab
thiab yuav quaj nyiav vim yog lwj siab.
¹⁵Nej yuav tso nej lub npe tseg cia
rau cov uas kuv xaiv cia lawd siv
ua lo lus tsawm foom.
Thiab Vajtswv Yawmsaub yuav muab nej
tua pov tseg,
tiamsis nws yuav tis dua lub npe tshiab
rau nws cov tub qhe.
¹⁶Leejtwg thov koob hmoov rau nws tus kheej
hauv lub tebchaws yuav tuav nws tus Vajtswv
uas muaj tseeb lub npe thov xwb.
Thiab leejtwg hais lus twv dabtsi
hauv lub tebchaws yuav tuav Vajtswv
uas muaj tseeb lub npe twv,
rau qhov tej kev txom nyem ceeblaj
yav thaum ub kuj tsis nco qab tag lawm
thiab ploj tag ntawm kuv lub qhov muag.”

Lub ntuj tshiab thiab lub ntiajteb tshiab

¹⁷“Saib maj, kuv yuav tsim lub ntuj tshiab
thiab lub ntiajteb tshiab,
rau qhov tej uas muaj nyob yav thaum ub los
yuav tsis nco thiab tsis xav txog dua li lawm.
¹⁸Cia li zoo siab thiab xyiv fab mus ib txhis
rau yam uas kuv tsim los,
rau qhov kuv tsim Yeluxalees
ua lub chaw xyiv fab
thiab tsim nws cov neeg
kom zoo siab xyiv fab.
¹⁹Kuv yuav zoo siab xyiv fab rau Yeluxalees
thiab zoo siab rau kuv haiv neeg.
Yuav tsis hnov lub suab quaj
thiab lub suab quaj txom nyem nyuaj siab
rau hauv lub nroog ntawd dua li lawm.
²⁰Hauv lub nroog ntawd yuav tsis muaj
ib tug menyuam mos uas muaj txojsia
nyob ob peb hnub xwb dua li lawm,
thiab yuav tsis muaj ib tug laus
nyob tsis puv sijhawm.
Tus uas hnub nyoog muaj ib puas xyoo li tuag
yuav suav tias tseem hluas,
tus neeg uas nyob tsis puv ib puas xyoo⚓
yuav suav tias raug tsawm foom.
²¹Lawv yuav ua vaj tse
thiab tau nyob rau hauv,
lawv yuav cog vaj txiv hmab
thiab tau noj tej txiv ntawd.
²²Lawv yuav tsis ua vaj tse
rau lwm tus los nyob,
lawv yuav tsis cog rau lwm tus noj,
rau qhov kuv haiv neeg li hnub nyoog
yuav zoo yam li tej ntoo,
thiab cov uas kuv xaiv cia lawd
yuav tau siv tej uas
lawv txhais tes ua ntev kawg li.
²³Lawv yuav tsis khwv do do xwb,
lossis yug menyuam los raug vij sub vij sw,
rau qhov lawv yuav ua cov uas tau
Yawmsaub koob hmoov li tub ki,
tsis hais lawv thiab lawv tej menyuam.
²⁴Ua ntej uas lawv tsis tau thov, kuv yuav teb,
thaum lawv tseem tabtom hais,
kuv yuav mloog.
²⁵Hma thiab menyuam yaj
yuav noj zaub ua ke,
tsov ntxhuav yuav noj quav nyab
ib yam li nyuj,
thiab nab yuav noj hmoov av.
Tej tsiaj ntawd yuav tsis ua kom mob
thiab tsis ua kom puam tsuaj
thoob plaws hauv kuv lub roob uas dawb huv.”
Yawmsaub hais li no ntag.

65

Vajtswv Rau Txim Rau Cov Neeg Ntxeev Siab

¹Tus TSWV hais tias, “Kuv tos rawv yuav teb kuv haivneeg tej lus thov, tiamsis lawv tsis thov kuv li. Kuv tos rawv lawv los cuag kuv, tiamsis lawv tsis kam los li thiab. Txawm yog kuv hais tias, ‘Kuv nyob ntawm no yuav pab nej los lawv tsis kam thov kuv li.’ ²Kuv niaj hnub tos ntsoov kuv cov neeg uas muaj lub siab tawv, tiamsis lawv pheej mus ua txhaum raws li lawv lub siab nyiam. ³Lawv tsis paub txajmuag, lawv thiaj ua kom kuv chim. Lawv muab khoom mus fij rau dab hauv lawv tej vaj tseemceeb thiab hlawv tej hmoov tshuaj tsw qab rau saum tej thaj txi dab. ⁴Hmo ntuj lawv nkag mus rau hauv tej qhov tsua thiab hauv tej qhov ntxa, mus sablaj nrog cov neeg tuag lawm tej plig. Lawv noj nqaij npuas thiab haus tej kua nqaij uas muab fij rau dab lawm. ⁵Thiab lawv tseem hais rau luag tias, ‘Txav deb ntawm peb, vim peb huv dua nej!’ Cov uas hais li no, kuv ntxub kawg li, kuv txojkev chim rau lawv, mas zoo ib yam li lub cubtawg uas cig tsis paub tuag.
⁶“Twb muaj lus sau tseg lawm hais tias, kuv yuav tsis zam txim rau lawv li, tiamsis kuv yuav ua pauj rau lawv, ⁷kuv yuav rau txim rau lawv tej kev txhaum thiab lawv cov yawgkoob tej kev txhaum huv tibsi. Rau qhov lawv tau mus hlawv hmoov tshuaj tsw qab rau saum tej roob rhuav kuv ntsejmuag. Yog li ntawd, kuv yuav rau txim kom txaus nkaus rau tej kev phem uas lawv ua los lawm.”
⁸Tus TSWV hais tias, “Tsis muaj ib tug twg muab tej txiv hmab zoo ua kom puastsuaj li; tiamsis tsuas muab tej txiv hmab ntawd los ua cawv haus xwb. Ib yam li ntawd, kuv yuav tsis ua rau lawv raug kev puastsuaj, vim lawv yog kuv cov tubtxib uas ua kuv tes haujlwm. ⁹Kuv yuav foom hmoov zoo rau cov Yixalayees uas yog xeem Yudas, mas lawv cajces yuav tau kuv lub tebchaws uas muaj roob muaj hav los ua lawv tug; cov neeg uas kuv xaiv los ua kuv cov tubtxib yuav tau nyob hauv lub tebchaws ntawd. ¹⁰Lawv yuav pehawm kuv thiab yuav coj lawv tej yaj tej nyuj mus noj zaub hauv lub Tiaj Saloos uas nyob sab hnubpoob thiab hauv lub Hav Covnyom uas nyob sab hnubtuaj.
¹¹“Tiamsis nej cov uas tau tso kuv tseg, nej tsis nco txog kuv lub roob Xi-oos uas dawbhuv; nej teeb thaj teev tus mlom Nkas thiab tus mlom Menis uas yog cov vajtswv ntawm txoj hmoov zoo thiab hmoov phem. ¹²Nej yuav tau qhov phem; nej yuav tuag rau hniav ntaj hniav riam, vim thaum kuv hu nej tsis teb, thiab thaum kuv hais nej tsis mloog. Nej too hau ntsoov mus ua kev phem, vim nej tsis mloog kuv lus. ¹³Kuv hais rau nej hais tias, cov tubtxib uas hwm kuv thiab mloog kuv lus yuav muaj noj muaj haus nplua mias, tiamsis nej yuav tshaib nqhis. Kuv cov tubtxib yuav zoo siab heev, tiamsis nej yuav poob ntsejmuag. ¹⁴Kuv cov tubtxib yuav hu nkauj zoo siab, tiamsis nej yuav quaj lwj siab ntsuav. ¹⁵Cov neeg uas kuv xaiv tseg lawm, yuav tuav nej lub npe foom tsis zoo; kuv yog tus TSWV uas kav txhua tsav yam, kuv yuav muab nej tua povtseg, tiamsis kuv yuav muab cov neeg uas mloog kuv lus tis dua npe tshiab. ¹⁶Cov neeg uas nyob hauv lub tebchaws no thov koob hmoov, yuav tsum thov ntawm Vajtswv tus uas muaj kev ncaj ncees. Yog leejtwg yuav coglus, yuav tsum tuav Vajtswv tus uas muaj kev ncaj ncees lub npe, mas nej thiaj tsis nco txog tej kev txomnyem uas nej raug los lawm.”

Lub Ntuj Tshiab thiab lub Ntiajteb Tshiab

¹⁷Tus TSWV hais tias, “Kuv yuav tsim dua lub ntuj tshiab thiab lub ntiajteb tshiab. Nej yuav tsis nco txog tej uas twb muaj tas los lawm. ¹⁸Nej cia li zoo siab rau tej uas kuv tsim dua tshiab ntawd mus ibtxhis. Cov neeg uas nyob hauv lub nroog Yeluxalees tshiab uas kuv tsim yuav muaj kev zoo siab thiab nyob kaj siab lug. ¹⁹Kuv yuav zoo siab rau lub nroog Yeluxalees thiab txaus siab kawg nkaus rau kuv haivneeg; yuav tsis hnov suab quaj suab nyiav nyob hauv lub nroog ntawd ib zaug ntxiv li lawm. ²⁰Nyob hauv lub nroog ntawd cov menyuam mos yuav tsis muaj kev ploj kev tuag, thiab txhua tus neeg yuav muaj sia nyob ntev. Cov neeg uas muaj hnubnyoog ib puas xyoo los tseem zoo li tus hluas. Yog leejtwg tuag ua ntej ntawd, ces yog kuv rau txim rau nws xwb. ^21-22Cov neeg ua tsev yuav tau nyob hauv tej tsev ntawd, tsis yog lwm tus yuav tau nyob. Lawv yuav cog txiv hmab thiab yuav tau haus tej cawv txiv hmab ntawd, tsis yog lwm tus yuav tau haus. Kuv haivneeg yuav muaj hnubnyoog nyob ntev ib yam li tej ntoo. Lawv yuav zoo siab rau txhua yam uas lawv txhais tes ua tau los. ²³Txhua yam uas lawv ua yeej yuav tiav, thiab lawv tej menyuam yuav tsis raug kev puastsuaj. Kuv yuav foom koob hmoov rau lawv thiab lawv cov xeebntxwv ib tiam dhau ib tiam mus ibtxhis li. ²⁴Thaum lawv tseem thov kuv tsis tau xaus, kuv twb teb lawv lawm. ²⁵Hma thiab menyuam yaj yuav nrhiav noj ua ke; tsov ntxhuav yuav noj quavnyab ib yam li nyuj noj; neeg thiab tsiaj yuav tsis ntshai nab ntxiv lawm. Saum kuv lub roob Xi-oos uas dawbhuv, yuav tsis muaj tej xwm phem dabtsi lawm.”