1Tug kws kuv nyam, koj zoo nkauj kawg,
koj zoo nkauj tag tag le.
Koj ob lub qhov muag
kws nyob huv qaab daim ntaub kauv
zoo taam tug nquab taug.
Koj plaubhau nplwg quas loo
yaam le paab tshws
kws nqeg peg ntaav roob Kile‑a lug.
2Koj cov nav zoo taam paab yaaj
kws nyav muab plaub txav taag
hab muab ntxuav taag.
Txhua tug muaj mivnyuas ntxaib
hab tsw muaj ib tug kws sem mivnyuas le.
3Koj daim tawv ncauj lab ploog le xuv lab,
koj lub qhov ncauj zoo nkauj kawg,
koj ob saab plhu
kws nyob huv qaab ntaub kauv,
zoo yaam nkaus le lub txwv ntsab pobkws
phua ob saab.
4Koj lub cej daab
zoo taam Tavi lub tsev zuv khuav
kws ua lug khaws tej cuab yeej ua rog,
saab nrau dai ib txheeb daim hlau thaiv,
txhua daim hov yog cov tub rog sab tuab le.
5Koj ob lub mig zoo yaam nkaus le
ob tug mivnyuas kauv seb ntxaib,
kws noj zaub huv tej paaj lilij.
6Kuv yuav moog peg roob roj tsw qaab
hab moog peg pov roob roj ntoos tsw qaab
moog txug thaus cua ntsawj sawv ntxuv
hab duab tsaus ntuj pluj lawm.
7Tug kws kuv nyam,
koj lub cev ntaaj ntsug zoo nkauj kawg,
tsw muaj ib qho phem le.
8Kuv tug nkauj nyaab,
ca le tawm huv Lenpanoo nrug kuv moog,
ca le tawm huv Lenpanoo nrug kuv moog ov,
ca le nqeg sau hauv roob Amana,
hab sau hauv roob Xeni hab roob Hawmoo,
hab tawm huv lub qhov tsuv ntxhuav,
hab lub roob tsuv pom txwv.
9Kuv tug muam npawg, kuv tug nkauj nyaab,
koj lws hlo kuv nplooj sab lawm,
hab koj ib laaj muag rua kuv xwb
nqug hlo kuv lub sab,
koj tuab txuj saws xwb nqug tau kuv lawm.
10Kuv tug muam npawg, kuv tug nkauj nyaab,
ua caag koj txujkev hlub qaab zwb ua luaj?
Koj txujkev nyam qaab dua cawv txwv maab,
hab tej tshuaj kws koj pleev tsw qaab dua le
tej moov tshuaj tsw qaab huvsw.
11Kuv tug nkauj nyaab,
koj daim tawv ncauj nrug zwb ntaab,
zwb ntaab hab kua mig
nyob huv qaab koj tug nplaig.
Koj cev tsoog tsho tsw qaab ntxag
yaam le Lenpanoo.
12Kuv tug muam npawg, kuv tug nkauj nyaab
yog lub vaaj kws muab kaw ca,
yog lub vaaj kws muab txwv ca,
yog lub qhov dej txhawv
kws muab kaw ca lawm.
13Koj yog lub vaaj txwv ntsab pobkws
hab muaj lwm yaam txwv ntoo
kws zoo zoo puv nkaus,
muaj tej paaj ntoo tsw qaab
hab ntoo roj tsw qaab,
14Muaj ntoo roj tsw qaab,
hab qhav daaj, tauj qab, ntoo tuv,
hab lwm yaam ntoo kws ua tshuaj tsw qaab,
roj tsw qaab hab roj ntoo alau‑es
hab txhua yaam txum lom.
15Koj yog lub qhov dej kws txhawv huv vaaj,
yog lub hauv dej cag,
hab yog tej dej ndwg peg Lenpanoo lug.
16Tej cua ntsawj saab peg tuaj 'e,
ca le sawv tseeg,
tej cua ntsawj saab nraag 'e,
ca le ntsawj tuaj.
Ca le ntsawj rua kuv lub vaaj
sub tej paa tsw qaab huv lub vaaj
txhad le tsw thoob plawg moog.
Thov ca tug kws kuv ntxwm sab
nkaag lug rua huv nwg lub vaaj
hab noj tej txwv ntoo kws zoo tshaaj plawg.
4
1Tus uas kuv hlub, ua li cas koj
yuav zoo nkauj ua luaj!
Koj ob lub qhovmuag nyob sab hauv daim ntaub
uas npog koj lub ntsejmuag ci hob ntxim hlub kawg li.
Koj cov plaubhau ntxhee yees ib yam li pab tshis
uas khiav pem tej pov roob Nkile-as los.
2Koj cov hniav dawb ib yam li pab yaj
uas luag nyuam qhuav muab txiav plaub thiab ntxuav tas.
Txhua tus puavleej yug menyuam
ntxaib tsis muaj ib tug tshob li.
3Koj ob daim dincauj zoo ib yam li
pluaj ntaub liab;
thaum koj hais lus ua cas koj ob daim dincauj
ntxim hlub ua luaj.
Koj ob sab plhu zoo ib yam li ob sab txiv ntsiavkws
nyob sab hauv daim ntaub uas npog koj lub ntsejmuag.
4Koj lub cajdab zoo ib yam li Daviv
lub chaw tsomfaj uas kheej du ntaug lees,
muab ib txoj saw dai ib txhiab tus
ncais rau koj coj puagncig cajdab.
5Koj ob lub mis zoo ib yam li ob tug
menyuam kauv,
ob tug menyuam kauv ntxaib uas
tabtom noj zaub hauv lub hav paj lilis.
6Kuv yuav nyob saum lub pov roob
uas muaj tshuaj tsw qab mules,
yog lub pov roob uas muaj tshuaj tsw qab mus txog
thaum sawv ntxov uas muaj cua ntsawj laj ntxiag tuaj
thiab qhov tsaus ntuj ploj mus lawm.
7Tus uas kuv hlub, ua li cas koj zoo nkauj ua luaj;
ua cas koj yuav zoo ua luaj tsis muaj
ib qho phem li!
8Kuv tus nkauj nyab, koj cia li
nqis saum Roob Lenpanoos los nrog
kuv mus;
koj cia li nqis saum roob Lenpanoos los cuag kuv.
Koj cia li nqis saum Roob Amanas los,
cia li nqis saum Roob Xenis thiab saum Roob Helemoos,
qhov chaw uas tej tsov ntxhuav thiab
tsov txaij nyob los.
9Kuv nplooj siab, kuv tus nkauj nyab,
koj ob lub qhovmuag uas saib ntsoov kuv
thiab tej saw uas koj coj ntawm
cajdab twb nyiag kuv nplooj siab lawm.
10Koj txojkev hlub ua rau kuv txaus siab kawg nkaus li.
Kuv nplooj siab thiab kuv tus nkauj nyab,
koj txojkev hlub zoo tshaj tej cawv
txiv hmab;
koj tej tshuaj tsw qab tseem tsw qab
tshaj tej txujlom lawm thiab.
11Tus uas kuv hlub, koj ob daim di
ncauj qab zib npaum li zib ntab;
koj tus nplaig yog kua mis thiab zib ntab rau kuv.
Koj cev ris tsho tsw qab ntxiag li tus
ntxhiab pem Lenpanoos.
12Kuv nplooj siab, kuv tus nkauj nyab,
koj yog lub vaj uas nyob nraim nkoos,
lub vaj uas xov lajkab thaiv,
thiab lub qhovdej uas twb muaj tswv lawm;
13nyob hauv lub vaj ntawd tej txiv ntoo hlob zoo heev.
Tej txiv ntoo ntawd hlob mos nyoos ib yam li
tej txiv ntsiavkws thiab txi txiv zoo kawg nkaus li.
Nyob qhov ntawd tsw qab ntxiag li henas thiab naj,
14xafiloos, kalamus thiab kinamoos,
lossis tsw qab ntxiag li txhua yam tshuaj tsw qab.
Muaj tej nroj mules thiab alaus tuaj hauv lub vaj ntawd
nrog txhua yam ntoo tsw qab uas siv
ua tej tshuaj tsw qab tshaj plaws.
15Yog lub vaj uas muaj qhovdej txhawv,
yog tus dej uas ntws ntshiab si,
yog tus dej uas txhawv thiab ntws pem roob Lenpanoos los.
16Cov cua sab qaumteb, cia li sawv.
Cov cua sab qabteb, cia li ntsawj
tuaj rau hauv kuv lub vaj
kom tej pa tsw qab ntxiag mus rau txhua qhov.
Cia tus uas kuv hlub tuaj rau hauv nws lub vaj,
thiab cia nws los noj tej txiv ntoo
uas qab tshaj plaws.