1

Sim Yauj txojkev ntseeg

¹Muaj ib tug yawg nyob hauv Us tebchaws npe hu ua Yauj. Nws yog ib tug neeg zoo tsis muaj chaw thuam li thiab ua ncaj ncees, yog ib tug uas hwm thiab paub ntshai Vajtswv thiab tseg tsis ua txojkev phem kiag li. ²Nws muaj xya leej tub thiab peb leeg ntxhais. ³Nws muaj xya txhiab tus yaj, peb txhiab tus ntxhuav, tsib puas nkawm nyuj thiab tsib puas tus maum nees luav thiab muaj tub qhe coob heev. Tus yawg no thiaj yog tus loj kawg nkaus hauv cov neeg sawvdaws uas nyob sab hnub tuaj. ⁴Nws cov tub pheej npaj ib pluag noj rau hauv nyias lub tsev raws li hnub uas nyias teem tseg. Lawv kuj hu peb tug muam tuaj nrog lawv noj lawv haus thiab. ⁵Thaum lawv noj haus puv ib ncig lawm, Yauj yuav kom lawv ua kevcai tu lawv tus kheej kom dawb huv, thiab nws yuav sawv ntxov ntxov tua tsiaj hlawv xyeem ua cov menyuam feem ib leeg ib tug, rau qhov Yauj hais tias, “Tej zaum kuv cov menyuam tau ua txhaum thiab tsawm foom Vajtswv hauv lawv lub siab.” Yauj thiaj ua li no tsis tu ncua li.
⁶Muaj ib hnub Vajtswv cov tubtxib saum ntuj⚓ los cuag Yawmsaub, Xatas⚓ kuj nrog lawv los thiab. ⁷Yawmsaub hais rau Xatas tias, “Koj mus dabtsi los?” Xatas teb Yawmsaub tias, “Mus mus los los saum lub ntiajteb thiab ncig thoob lub ntiajteb los.” ⁸Mas Yawmsaub hais rau Xatas tias, “Koj twb tshuaj saib Yauj uas yog kuv tus qhev los tsis tau? Tag nrho lub ntiajteb tsis muaj leejtwg zoo cuag li nws, nws yog tus neeg zoo tsis muaj chaw thuam li thiab ua ncaj ncees, nws hwm thiab paub ntshai Vajtswv thiab tseg tsis ua txojkev phem.” ⁹Xatas thiaj teb Yawmsaub tias, “Yauj hwm thiab paub ntshai koj dawb dawb xwb lov? ¹⁰Koj tsis tau xov laj kab puag ncig nws thiab nws tsev neeg thiab txhua yam uas nws muaj lov? Koj twb foom koob hmoov rau tej haujlwm uas nws txhais tes ua thiab nws tej tsiaj txhu huaj vam coob kawg rau hauv lub tebchaws. ¹¹Nimno cia li cev kiag koj txhais tes thiab kov txhua yam uas nws muaj, mas nws yeej yuav tsawm foom koj tab meeg koj.” ¹²Yawmsaub hais rau Xatas tias, “Saib nawj, txhua yam uas nws muaj nyob hauv koj lub hwjchim, tiamsis tsis txhob cev tes kov Yauj.” Xatas txawm tawm ntawm Yawmsaub xubntiag mus lawm.
¹³Muaj ib hnub thaum Yauj tej tub tej ntxhais tabtom noj mov thiab haus cawv txiv hmab hauv lawv tus tijlaug hlob lub tsev, ¹⁴txawm muaj ib tug xa xov los hais rau Yauj tias, “Cov nyuj tabtom laij teb thiab cov nees luav tabtom noj zaub ntawm ib sab, ¹⁵mas cov neeg Xenpa txawm tuaj ntaus raws cov tsiaj ntawd mus thiab xuas ntaj tua cov tub qhe tuag tag, kuv tib leeg khiav dim los hais rau koj xwb.” ¹⁶Thaum nws tabtom hais txawm muaj dua ib tug los hais tias, “Vajtswv li hluavtaws poob saum ntuj los kub cov yaj thiab cov tub qhe puam tsuaj tag huvsi lawm, kuv tib leeg khiav dim los hais rau koj xwb.” ¹⁷Thaum tus ntawd tabtom hais txawm muaj dua ib tug los hais tias, “Cov neeg Kheedia ua peb pab tuaj lws kiag cov ntxhuav mus thiab xuas ntaj tua cov tub qhe tuag tag, kuv tib leeg khiav dim los hais rau koj xwb.” ¹⁸Thaum tus ntawd tabtom hais txawm muaj dua ib tug los hais tias, “Koj cov tub ntxhais tabtom noj mov thiab haus cawv txiv hmab hauv lawv tus tijlaug hlob lub tsev, ¹⁹txawm muaj cua daj cua dub hlob kawg ntsawj hauv tebchaws moj sab qhua tuaj nplawm lub tsev plaub fab ua rau lub tsev vau tsuam tej tub ntxhais mas lawv tuag tag, kuv tib leeg khiav dim los hais rau koj xwb.”
²⁰Ces Yauj txawm sawv tsees dua rhe nws lub tsho ntev chais plaubhau thiab khwb nkaus rau hauv av pe hawm, ²¹thiab nws hais tias, “Kuv tawm hauv kuv niam lub plab los liab qab tsuas, ces kuv yuav rov qab mus liab qab tsuas. Yawmsaub pub thiab Yawmsaub coj mus lawm. Cia li qhuas Yawmsaub lub npe.” ²²Tej xwm txheej no huvsi Yauj tsis ua txhaum lossis hais tias Vajtswv ua txhaum.

1

Yauj thiab Nws Tsevneeg

¹Muaj ib tug txivneej npe hu ua Yauj nyob hauv lub tebchaws Uxes, nws hwm thiab muab siab npuab Vajtswv. Nws yog neeg zoo thiab tsis ua kev phem kev qias. ²Nws muaj xya tus tub thiab peb tug ntxhais, ³muaj xya txhiab tus yaj, peb txhiab tus ntxhuav, ib txhiab tus nyuj, tsib puas tus neesluav thiab muaj tubtxib coob heev. Nws yog tug uas npluanuj tshaj plaws nyob sab Hnubtuaj.
⁴Yauj cov tub sib hloo nto ua rooj noj rooj haus; ib tug ua ces sawvdaws tuaj koom thiab caw lawv cov muam tuaj nrog lawv noj lawv haus. ⁵Txhua zaus uas lawv noj haus tas, tagkis tom qab Yauj sawv ntxov muab tsiaj mus tua hlawv fij ua kevcai daws nws cov menyuam tej kev txhaum. Nws niaj zaus ua kevcai daws kev txhaum li ntawd rau nws cov menyuam, rau qhov nws ntshai nyob tsam nws cov menyuam ua txhaum rau Vajtswv.

Ntxwgnyoog Tawmtsam Yauj

⁶Muaj ib hnub cov timtswv ceebtsheej tuaj cuag tus TSWV, Ntxwgnyoog los kuj tuaj nrog lawv nyob ntawd thiab. ⁷Tus TSWV nug Ntxwgnyoog hais tias, “Koj mus dabtsi los?”
Ntxwgnyoog teb hais tias, “Kuv mus ncig ntuj ncig teb los xwb.”
⁸Tus TSWV nug hais tias, “Koj puas pom Yauj uas yog kuv tus tubtxib? Tej neeg uas nyob hauv ntiajteb tsis muaj ib tug ua zoo thiab muab siab npuab kuv li nws. Nws hwm kuv thiab tsis ua kev phem kev qias li.”
⁹Ntxwgnyoog teb hais tias, “Yog koj tsis pub nws muaj ib yam dabtsi li, nws puas tseem yuav hwm koj?” ¹⁰Koj yeej ibtxwm tsomkwm nws, nws tsevneeg thiab txhua yam uas nws muaj. Koj foom koob hmoov rau txhua yam uas nws ua thiab pub rau nws muaj tsiaj txhu coob ua npoj ntws puv toj puv pes. ¹¹Tiamsis nimno yog koj muab txhua yam uas nws muaj tshem huv tibsi mus, nws yuav cem nkaug tes nkuav rau koj ntag!
¹²Tus TSWV hais rau Ntxwgnyoog hais tias, “Koj yuav ua li cas rau txhua yam uas nws muaj los tau, tiamsis koj tsis txhob kov nws li.” Ces Ntxwgnyoog txawm mus lawm.

Yauj Cov Menyuam thiab Tej Tsiaj Puastsuaj Tas

¹³Muaj ib hnub thaum Yauj cov menyuam tabtom noj haus nyob hauv tus tijlaug hlob lub tsev, ¹⁴txawm muaj ib tug tubtxib khiav los qhia rau Yauj hais tias, “Thaum peb tabtom muab nyuj laij teb, thiab tej neesluav tseem noj zaub zom zaws ibncig ntawm peb, ¹⁵ces tamsim ntawd cov neeg Xanpees txawm tuaj tua thiab txeeb tagnrho tej nyuj thiab tej neesluav huv tibsi cab mus lawm. Lawv muab koj cov tubtxib tua tuag tas, tsuas tshuav kuv tib leeg khiav dim los qhia koj xwb.”
¹⁶Thaum tus ntawd tseem hais tsis tau tas, txawmsiv muaj dua ib tug tubtxib khiav los qhia hais tias, “Xob tua koj tej yaj thiab cov tub yug yaj tuag tas, tsuas tshuav kuv tib leeg dim los qhia koj xwb.”
¹⁷Thaum tus ntawd tseem hais tsis tau tas, ho muaj dua ib tug tubtxib khiav los qhia hais tias, “Muaj peb pab neeg Khadees tuaj tua peb, lawv txeeb tagnrho tej ntxhuav thiab tua koj cov tubtxib tuag tas, tsuas tshuav kuv tib leeg dim los qhia koj paub xwb.”
¹⁸Thaum tus ntawd tseem hais tsis tau tas, rov muaj dua ib tug tubtxib khiav los qhia hais tias, “Koj cov menyuam tseem tabtom noj haus hauv koj tus tub hlob lub tsev, ¹⁹muaj cua daj cua dub ntsawj tom tiaj suabpuam tuaj ua rau lub tsev vau los ntaus koj cov menyuam tuag tas, tsuas tshuav kuv tib leeg dim los qhia koj paub xwb.”
²⁰Thaum Yauj hnov li ntawd, nws sawv tsees dua rhe nws lub tsho thiab tu siab heev. Yauj muab nws cov plaubhau chais thiab pw nthi rau hauv av. ²¹Yauj hais tias, “Kuv niam yug kuv los liabqab li cas, ces kuv yuav rov mus liabqab ib yam li ntawd. Tus TSWV muab txhua yam rau kuv, nimno tus TSWV coj rov qab. Thov kom sawvdaws qhuas nws lub npe.”
²²Txawm yog muaj tej xwm no los raug Yauj los nws tsis tau ua txhaum lossis liam txim rau Vajtswv li.