2

Lub pob zeb muaj txojsia thiab haiv neeg dawb huv

¹Vim li no, cia li muab txhua yam kev phem thiab txhua yam kev dag ntxias, kev zais siab, kev sib khib thiab kev xyav luag moo txhua yam tso tseg. ²Ib yam li cov menyuam mos uas nyuam qhuav yug, nej cia li ntshaw cov kua mis dawb huv sab ntsuj plig, xwv cov kua mis ntawd thiaj pab nej kheev hlob mus tau txojkev dim, ³rau qhov nej twb sim tias tus Tswv zoo kawg nkaus.
⁴Cia li los cuag nws, yog lub pob zeb uas muaj txojsia uas neeg tsis lees yuav tiamsis twb raug Vajtswv xaiv lawm thiab tsim txiaj kawg. ⁵Nej zoo yam li tej pob zeb muaj sia cia li yeem muab ua lub tsev⚓ rau sab ntsuj plig, kom thiaj ua tau pov thawj dawb huv xyeem qhov txhia chaw sab ntsuj plig uas hum Vajtswv lub siab hauv Yexus Khetos. ⁶Vim muaj lus sau cia rau hauv Vajtswv txojlus hais tias,
“Saib maj, kuv teeb ib lub pob zeb
rau hauv Xi‑oo,
yog ua lub thawj pob zeb uas xaiv cia
thiab tsim txiaj kawg ntawm kaum tsev.
Tus uas ntseeg nws
yuav tsis raug txaj muag.”⚓
⁷Vim li no tus Tswv muaj nqes kawg nkaus rau nej cov uas ntseeg, tiamsis hais txog cov uas tsis ntseeg mas
“Lub pob zeb uas cov Kws ua tsev
muab xyeeb tseg lawm
twb rov muab los teeb ua thawj lub
rau ntawm kaum tsev lawm.”⚓
⁸thiab
“ua lub pob zeb uas ua rau neeg dawm,
thiab ua txhib zeb uas ua rau neeg ntog.”⚓
Lawv dawm vim lawv tsis mloog Vajtswv txojlus raws li uas tu tseg rau lawv.
⁹Tiamsis nej yog haiv neeg uas xaiv cia lawm, yog Vajntxwv⚓ cov pov thawj⚓ thiab ua neeg dawb huv, yog cov neeg uas ua Vajtswv tug, kom nej thiaj qhia nws tes haujlwm tseem ceeb,⚓ yog tus uas hu nej tawm hauv qhov tsaus ntuj los nyob rau hauv nws qhov kaj uas phimhwj kawg. ¹⁰Yav tag los nej tsis yog nws haiv neeg tiamsis nimno nej yog Vajtswv haiv neeg lawm. Yav tag los nej tsis tau txais kev khuvleej tiamsis nimno nej tau txais kev khuvleej lawm.⚓

Vajtswv cov qhev

¹¹Cov uas kuv hlub, kuv thov kom nej cov uas zoo li lwm haiv neeg tuaj ua qhua nyob hauv lub ntiajteb no tseg tej uas lub cev nqaij tawv ntshaw uas tawm tsam nej tus ntsuj plig. ¹²Cia li ua zoo kawg nkaus rau hauv lwm haiv neeg xwv yog lawv hais tias nej ua txhaum, lawv thiaj pom tej uas nej ua zoo thiab yuav qhuas Vajtswv rau hnub uas nws los xyuas.
¹³Nej yuav tsum nyob hauv txhua tus uas muaj hwjchim qab kev tswjhwm vim saib rau tus Tswv, tsis hais tus ntawd yuav yog huabtais uas muaj hwjchim ¹⁴lossis cov tswv xeev uas vajntxwv txib mus txiav txim rau cov uas ua txhaum thiab qhuas cov uas ua zoo. ¹⁵Vajtswv xav kom nej xyaum zoo kom thiaj ua rau cov neeg ruam uas hais lus tsis muaj qabhau tseg tsis hais lawm. ¹⁶Nej cia li ua lub neej yam li uas nyob ywj pheej tiamsis tsis txhob muab qhov uas nyob ywj pheej ntawd los mus ua txhaum. Tiamsis nej yuav tsum ua nej lub neej yam li yog Vajtswv cov tub qhe. ¹⁷Cia li hwm txhua tus, hlub cov kwvtij, paub ntshai Vajtswv, thiab hwm huabtais.

Khetos ua yam ntxwv thev kev txom nyem

¹⁸Nej cov uas yog tub qhe, nej yuav tsum nyob hauv nej tus lospav qab kev tswjhwm thiab paub ntshai lawv txhua yam, tsis yog hwm tus uas siab zoo thiab hlub nej xwb tiamsis hwm tus uas ua nruj ua tsiv thiab. ¹⁹Vim qhov no hum Vajtswv lub siab, yog thaum ib tug twg xam pom Vajtswv nws thiaj thev kev mob rau thaum nws raug tej kev tsim txom uas tsis raug cai. ²⁰Yog nej ua txhaum thiaj raug nplawm txawm yog nej ua siab ntev thev los nej yuav tau koob meej li cas? Tiamsis yog nej ua zoo thiaj raug kev tsim txom thiab ua siab ntev thev, thiaj yog ua hum Vajtswv lub siab. ²¹Vim Vajtswv hu nej los thev kev tsim txom li no, rau qhov Khetos twb raug kev tsim txom this nej, ua yam ntxwv tseg rau nej xwv nej thiaj tau taug raws nws tus neev taw. ²²Nws tsis tau ua txhaum dabtsi li thiab
“tsis pom muaj lus dag ntxias
nyob hauv nws lub qhov ncauj li.”⚓
²³Thaum lawv hais lus phem rau nws, nws tsis hais phem pauj. Thaum nws raug tsim txom nws tsis hem lawv, tiamsis nws muab nws tus kheej cob rau tus uas txiav txim ncaj ncees. ²⁴Nws ris peb lub txim rau hauv nws lub cev saum tus khaublig ntoo kom peb thiaj tuag ntawm lub txim thiab muaj txojsia nyob rau txojkev ncaj ncees. “Yog muaj nws tej kiav txhab thiaj kho tau peb kom zoo.”⚓ ²⁵Rau qhov nej yuam kev yam li tej yaj, tiamsis nimno nej twb rov los cuag tus Tswv yug yaj thiab tus uas tsom kwm nej tus ntsuj plig lawm.

2

Lub pob zeb muaj txujsa hab haiv tuabneeg dawb huv

¹Vem le nuav, ca le muab txhua yaam kev phem hab txhua yaam kev daag ntxag, kev zais sab, kev sws khib hab kev xyaav luas moo txhua yaam tso tseg. ²Ib yaam le cov mivnyuas mog kws nyav yug, mej ca le ntshaw cov kua mig dawb huv saab ntsuj plig, sub cov kua mig hov txhad paab mej kheev hlub moog tau txujkev dim, ³tsua qhov mej tub swm tas tug Tswv zoo kawg nkaus.
⁴Ca le lug cuag nwg, yog lub pob zeb kws muaj txujsa kws tuabneeg tsw leeg yuav tassws tub raug Vaajtswv xaiv lawm hab tswm txaj kawg. ⁵Mej zoo yaam le tej pob zeb muaj sa ca le yeem muab ua lub tsev⚓ rua saab ntsuj plig, sub txhad ua tau pov thawj dawb huv xyeem hov txhua chaw saab ntsuj plig kws hum Vaajtswv lub sab huv Yexu Kheto. ⁶Vem muaj lug sau ca rua huv Vaajtswv txujlug has tas,
“Saib maj, kuv teeb ib lub pob zeb rua huv Xi‑oo,
yog ua lub thawj pob zeb kws xaiv ca
hab tswm txaj kawg ntawm kaum tsev.
Tug kws ntseeg nwg
yuav tsw raug txaaj muag.”⚓
⁷Vem le nuav tug Tswv muaj nqes kawg nkaus rua mej cov kws ntseeg, tassws has txug cov kws tsw ntseeg mas
“Lub pob zeb kws cov Kws ua tsev
muab xyeeb tseg lawm
tub rov muab lug teeb ua lub thawj
rua ntawm kaum tsev lawm.”⚓
⁸hab
“ua lub pob zeb kws ua rua tuabneeg dawm,
hab ua txhwb zeb kws ua rua tuabneeg qaug.”⚓
Puab dawm vem puab tsw noog Vaajtswv txujlug lawv le kws tu tseg rua puab.
⁹Tassws mej yog haiv tuabneeg kws xaiv ca lawm, yog Vaajntxwv⚓ cov pov thawj⚓ hab ua tuabneeg dawb huv, yog cov tuabneeg kws ua Vaajtswv tug, sub mej txhad qha nwg teg num tseem ceeb,⚓ yog tug kws hu mej tawm huv qhov tsaus ntuj lug nyob rua huv nwg qhov kaaj kws phemfwj kawg. ¹⁰Yaav taag lug mej tsw yog nwg haiv tuabneeg tassws nwgnuav mej yog Vaajtswv haiv tuabneeg lawm. Yaav taag lug mej tsw tau txais kev khuvleej tassws nwgnuav mej tau txais kev khuvleej lawm.⚓

Vaajtswv cov qhev

¹¹Cov kws kuv hlub, kuv thov kuas mej cov kws zoo le lwm haiv tuabneeg tuaj ua qhua nyob huv lub nplajteb nuav tseg tej kws lub cev nqaj tawv ntshaw kws tawm tsaam mej tug ntsuj plig. ¹²Ca le ua zoo kawg nkaus rua huv lwm haiv tuabneeg sub yog puab has tas mej ua txhum, puab txhad pum tej kws mej ua zoo hab yuav qhuas Vaajtswv rua nub kws nwg lug saib.
¹³Mej yuav tsum nyob huv qaab txhua tug kws muaj fwjchim kev tswjfwm vem saib rua tug Tswv, tsw has tug hov yuav yog fuabtais kws muaj fwjchim ¹⁴lossws cov tswv xeev kws vaajntxwv khaiv moog txav txem rua cov kws ua txhum hab qhuas cov kws ua zoo. ¹⁵Vaajtswv xaav kuas mej xyum zoo sub txhad ua rua cov tuabneeg ruag kws has lug tsw muaj qaabhau tseg tsw has lawm. ¹⁶Mej ca le ua lub neej yaam le kws nyob ywj pheej tassws tsw xob muab qhov kws nyob ywj pheej hov lug moog ua txhum. Tassws mej yuav tsum ua mej lub neej yaam le yog Vaajtswv cov tub qhe. ¹⁷Ca le fwm txhua tug, hlub cov kwvtij, paub ntshai Vaajtswv, hab fwm fuabtais.

Kheto ua yaam ntxwv thev kev txom nyem

¹⁸Mej cov kws yog tub qhe, mej yuav tsum nyob huv qaab mej tug lospaav kev tswjfwm hab paub ntshai puab txhua yaam, tsw yog fwm tug kws sab zoo hab hlub mej xwb tassws fwm tug kws ua nruj ua tswv hab. ¹⁹Vem qhov nuav hum Vaajtswv lub sab, yog thaus ib tug twg xaam pum Vaajtswv nwg txhad thev kev mob rua thaus nwg raug tej kev tswm txom kws tsw raug cai. ²⁰Yog mej ua txhum txhad raug nplawm txawm yog mej ua sab ntev thev los mej yuav tau koob meej le caag? Tassws yog mej ua zoo txhad raug kev tswm txom hab ua sab ntev thev, txhad yog ua hum Vaajtswv lub sab. ²¹Vem Vaajtswv hu mej lug thev kev tswm txom le nuav, tsua qhov Kheto tub raug kev tswm txom thij mej, ua yaam ntxwv tseg rua mej sub mej txhad tau taug lawv nwg tug neev taw. ²²Nwg tsw tau ua txhum daabtsw le hab
“tsw pum muaj lug daag ntxag
nyob huv nwg lub qhov ncauj le.”⚓
²³Thaus puab has lug phem rua nwg, nwg tsw has phem pauj. Thaus nwg raug tswm txom nwg tsw hem puab, tassws nwg muab nwg tug kheej cob rua tug kws txav txem ncaaj nceeg. ²⁴Nwg rws peb lub txem rua huv nwg lub cev sau tug khaublig ntoo sub peb txhad tuag ntawm lub txem hab muaj txujsa nyob rua txujkev ncaaj nceeg. “Yog muaj nwg tej kav txhaab txhad khu tau peb kuas zoo.”⚓ ²⁵Tsua qhov mej yuam kev yaam le tej yaaj, tassws nwgnuav mej tub rov lug cuag tug Tswv yug yaaj hab tug kws tsom kwm mej tug ntsuj plig lawm.