17

Eliya hab ntuj qhuav

¹Eliya kws yog tuabneeg Thinpi nyob huv lub moos Thinpi huv Kile‑a tebchaws has rua Ahaj tas, “Muaj cov Yixayee tug Vaajtswv Yawmsaub kws kuv ua koom rua muaj txujsa nyob pum, ob peb xyoos tom ntej nuav yeej yuav tsw muaj lwg tsw muaj naag lug le tsuas yog kuv has kuas muaj tes txhad muaj xwb.” ²Tes Yawmsaub has lug tuaj rua Eliya tas, ³“Ca le tawm ntawm nuav moog rua saab nub tuaj, moog nraim cev rua ntawm ntug dej Kheli kws nyob ntawm tug dej Yalatee saab nub tuaj. ⁴Koj yuav haus tug dej hov hab kuv tub has kuas cov uab voj tuaj yug koj hov ntawd.” ⁵Tes Eliya txawm moog hab ua lawv le Yawmsaub has. Nwg moog nyob ntawm ntug dej Kheli kws nyob ntawm tug dej Yalatee saab nub tuaj. ⁶Tes thaus taagkig hab thaus tsaus ntuj uab voj txawm kwv ncuav hab nqaj tuaj rua nwg noj, hab nwg haus tug dej ntawd. ⁷Tes tsw ntev tug dej hov txawm qhuav vem yog naag tsw lug rua huv lub tebchaws le.

Eliya hab tug puj ntsuag huv Xalefa

⁸Mas Yawmsaub has lug tuaj rua Eliya tas, ⁹“Ca le sawv tseeg moog rua lub moos Xalefa kws zwm rua lub moos Xaintoo hab nyob hov ntawd. Kuv tub has kuas ib tug puj ntsuag kws nyob hov ntawd yug koj lawm.” ¹⁰Nwg txawm sawv tseeg moog rua lub moos Xalefa. Thaus nwg moog txug ntawm rooj loog na cav ib tug puj ntsuag saamswm khaws tawg. Nwg txawm has rua tug puj hov tas, “Thov koj nqaa ib taig dej tuaj rua kuv, kuv txhad le tau haus.” ¹¹Thaus tug puj hov yuav moog nqaa dej tuaj, nwg txawm hu tug puj hov tas, “Thov coj ib qho ncuav huv txhais teg tuaj rua kuv hab.” ¹²Tug puj hov teb tas, “Muaj Yawmsaub kws yog koj tug Vaajtswv muaj txujsa nyob pum, kuv tsw muaj ib lub ncuav daabtsw kws cub lawm, tsuas muaj ib taus teg moov huv lub taig hab mivntswv roj huv lub laam fwj xwb. Nwgnuav kuv saamswm khaws mivntswv tawg nuav coj moog npaaj rua kuv hab kuv tug tub ib noj taag es yuav tuag.” ¹³Eliya txawm has rua nwg tas, “Koj tsw xob ntshai, ca le moog ua lawv le koj has. Tassws koj ca le ua ib lub nyuas ncuav miv miv coj tuaj rua kuv tsaiv, le maav ua rua koj hab koj tug tub. ¹⁴Tsua qhov Yawmsaub kws yog cov Yixayee tug Vaajtswv has le nuav tas, ‘Cov moov huv lub taig yuav tsw taag, cov roj huv lub laam fwj yuav tsw tu moog txug nub kws Yawmsaub tso naag lug rua huv lub tebchaws.’ ” ¹⁵Tug puj hov txawm moog ua lawv le Eliya has. Mas Eliya hab tug puj hov hab nwg tsev tuabneeg kuj noj tau ntau nub. ¹⁶Cov moov huv lub taig kuj tsw taag, cov roj huv lub laam fwj kuj tsw tu, lawv le Yawmsaub tej lug kws nwg has rua Eliya.
¹⁷Dhau ntawd lug tug puj kws yog tswv tsev hov tug tub txawm mob mas mob nyaav heev tsw muaj sa lawm. ¹⁸Nwg txawm has rua Eliya tas, “Au Vaajtswv tug tuabneeg, kuv thaab txug koj daabtsw? Koj tuaj rua ntawm kuv ua kuas ncu txug kuv tej kev txhum es ua rua kuv tug tub tuag.” ¹⁹Eliya has rua nwg tas, “Muab koj tug tub lug rua kuv.” Nwg txawm muab tug tub hov huv tug puj xubndag puag nkaus nce moog rua txheej tsev sau huv lub txaaj kws nwg nyob, hab muab tso pw rua sau nwg lub txaaj. ²⁰Eliya thov hu Yawmsaub has tas, “Au Yawmsaub kws yog kuv tug Vaajtswv, koj coj tej xwm txheej phem lug raug tug puj ntsuag kws kuv nrug nwg nyob nuav es muab nwg tug tub tua pov tseg lov?” ²¹Tes nwg txawm pw tsuam tug mivnyuas hov peb zag, hab quaj thov Yawmsaub tas, “Au Yawmsaub kws yog kuv tug Vaajtswv, thov tug mivnyuas nuav tug ntsuj plig rov lug rua huv nwg.”
²²Yawmsaub noog Eliya tej lug thov, mas tug mivnyuas tug ntsug plig txhad rov lug rua huv nwg, nwg txhad rov caj sa. ²³Tes Eliya txawm puag tug mivnyuas nqeg txheej sau lug rua huv lub tsev hab muab tug mivnyuas rua leej nam. Eliya has tas, “Saib nawj, koj tug tub tseed muaj txujsa nyob.” ²⁴Tug puj hov has rua Eliya tas, “Nwgnuav kuv paub tseeb tas koj yog Vaajtswv tug tuabneeg, hab Yawmsaub tej lug kws nyob huv koj lub qhov ncauj muaj tseeb.”

17

Eliyas thiab Ntuj Qhuav

¹Muaj ib tug cev Vajtswv lus hu ua Eliyas, nyob hauv lub nroog Tisenpes hauv cheebtsam Nkile-as, hais rau Vajntxwv Ahaj hais tias, “Kuv tuav tus TSWV uas yog cov Yixalayees tus Vajtswv uas muaj sia nyob, tus uas kuv niaj hnub ua nws tes haujlwm lub npe hais rau koj hais tias ob lossis peb xyoo tom ntej no yuav tsis muaj ib ncos lwg lossis ib kob nag los mus txog thaum kuv hais kom muaj thiaj li yuav rov muaj.”
²Ces tus TSWV hais rau Eliyas hais tias, ³“Koj cia li tawm ntawm qhov chaw no mus rau sab hnubtuaj, mus nkaum ze rau ntawm tus dej Khelis uas nyob ntawm tus dej Yauladees sab hnubtuaj. ⁴Koj yuav tau tus dej ntawd haus, thiab kuv twb hais kom uablag nqa mov los rau koj noj nyob qhov ntawd lawm.”
⁵Eliyas thiaj ua raws li tus TSWV hais. Nws txawm mus nyob ntawm tus dej Khelis. ⁶Nws haus tus dej ntawd thiab uablag pheej nqa mov thiab nqaij los rau nws noj txhua tagkis thiab txhua hmo. ⁷Tiamsis tsis ntev tom qab ntawd, tus dej kuj qhuav tas vim tsis muaj nag los.

Eliyas thiab Tus Pojntsuam Hauv Xalefas

⁸Ces tus TSWV hais rau Eliyas hais tias, ⁹“Koj cia li sawv kev mus rau pem lub nroog Xalefas uas nyob ze lub nroog Xidoos thiab mus nyob qhov ntawd. Kuv twb hais rau ib tug pojntsuam uas nyob hauv lub nroog ntawd kom nws pub zaub pub mov rau koj noj lawm.” ¹⁰Yog li ntawd, Eliyas thiaj mus rau pem lub nroog Xalefas. Thaum nws mus txog ntawm lub roojvag nroog, nws pom ib tug pojntsuam tabtom tuaj khaws taws. Eliyas txawm hais rau tus pojntsuam ntawd hais tias, “Thov koj nqa mentsis dej tuaj pub rau kuv haus.” ¹¹Thaum tus pojntsuam tabtom rov mus nqa dej, Eliyas txawm hu hais tias, “Thov nqa mentsis mov tuaj pub kuv noj thiab.”
¹²Nws teb hais tias, “Kuv thov coglus rau tus TSWV, koj tus Vajtswv uas muaj sia nyob hais tias, kuv tsis muaj mov lawm. Kuv tsuas tshuav ib nyuag taus hmoov nplej nyob hauv tais thiab ib qho nyuag roj txiv ntoo nyob hauv qab hub lawm xwb. Kuv tuaj khaws taws coj mus rauv ua qhov nyuag hmoov nplej ntawd rau kuv thiab kuv tus tub noj. Pluas mov no yog pluas mov kawg, ces wb tos tuag lawm xwb.”
¹³Eliyas txawm hais rau tus pojntsuam ntawd hais tias, “Koj tsis txhob txhawj, cia li mus ua koj pluas hmo. Tiamsis xub ua ib qho me me nqa tuaj rau kuv noj tso, koj mam li rov mus muab qhov seem ua rau koj thiab koj tus tub noj. ¹⁴Vim tus TSWV uas yog cov Yixalayees tus Vajtswv hais li no: ‘Cov hmoov nplej hauv lub tais yuav tsis paub tas thiab cov roj hauv lub hub yuav tsis paub qhuav ua ntej uas tus TSWV tso nag los.’ ”
¹⁵Tus pojntsuam ntawd thiaj mus ua raws li Eliyas hais rau nws, lawv thiaj muaj mov txaus noj ntau hnub. ¹⁶Raws li tus TSWV tau coglus tseg rau Eliyas lawm hais tias cov hmoov nplej hauv lub tais yuav tsis paub tas thiab cov roj hauv lub hub yuav tsis paub qhuav.
¹⁷Tsis ntev tom qab no, muaj ib hnub tus pojntsuam ntawd tus tub txawm mob; nws mob hnyav heev zuj zus, thaum kawg nws txawm tuag lawm. ¹⁸Tus pojntsuam ntawd hais rau Eliyas hais tias, “Koj twb yog Vajtswv tus neeg, ua li cas koj thiaj ua li no rau kuv? Koj tuaj ntawm no, yog koj tuaj ua kom Vajtswv nco txog kuv tej kev txhaum uas kuv tau ua tas los lawm kom kuv tus tub tuag xwb los?”
¹⁹Eliyas hais tias, “Cia li puag koj tus tub los rau kuv.” Eliyas tsaws hlo tus metub ntawm leej niam xubntiag, puag mus rau saum chav uas Eliyas nyob, thiab muab tus tub ntawd tso pw rau saum Eliyas lub txaj. ²⁰Ces Eliyas tsa ncauj thov Vajtswv hais tias, “Tus TSWV uas yog kuv tus Vajtswv, vim li cas koj ua rau tus pojntsuam no tau kev txomnyem ua luaj no? Nws yog tus uas muaj lub siab dawb pub zaub pub mov rau kuv noj, vim li cas koj ua rau nws tus tub tuag lawm!” ²¹Ces Eliyas txawm qhau cev hlo pw tsuam tus tub ntawd lub cev peb zaug thiab thov Vajtswv hais tias, “Tus TSWV uas yog kuv tus Vajtswv, thov koj rau siav rau pa rau tus tub no kom rov muaj sia lauj!” ²²Tus TSWV teb Eliyas tej lus thov, ces tus tub ntawd txawm ua pa thiab rov muaj sia lawm.
²³Eliyas thiaj puag tus tub ntawd nqis los rau txheej tsev hauv qab no, muab rau leej niam thiab hais rau nws hais tias, “Koj saib, koj tus tub rov muaj sia lawm!”
²⁴Tus pojntsuam ntawd teb hais tias, “Nimno kuv paub lawm hais tias koj yog Vajtswv tus neeg thiab yog tus cev Vajtswv lus tiag.”