57
1Tus uas ncaj ncees puam tsuaj,
thiab tsis muaj leejtwg quav ntsej,
cov uas xyaum zoo raug muab ntes coj mus lawm
thiab tsis muaj leejtwg txawj nkag siab.
Rau qhov tus uas ncaj ncees tuag
mas nws raug muab coj tawm
hauv qhov uas txom nyem lawm.
2Nws nkag mus rau hauv qhov uas kaj siab lug lawm.
Cov uas ua lub neej ncaj ncees
kuj tau so hauv nws lub chaw pw.
3“Nej cov uas yog pojniam txawj ua neeb tej tub
thiab cov uas yog tus ua nkauj ua nraug
thiab tus poj muag cev tej tub ki
cia li txav los ze ntawm no.
4Nej thuam luag leejtwg?
Nej rua ncauj luag thiab hlev nplaig rau leejtwg?
Nej tsis yog cov neeg fav xeeb
thiab cov neeg dag li menyuam lov?
5Nej kub siab lug mus sib deev
hauv tej qab ntoo xeeb
thiab hauv txhua tsob qab ntoo ntsuab,
nej muab nej tej menyuam tua⚓
rau hauv tej kwj ha thiab hauv tej qab tsuas.
6Nej li feem mas yog tej dab
ntawm tej pob zeb du du hauv hav dej,
tej dab ntawd yog nej li feem ntag.
Nej hliv cawv txiv hmab haiv laig
thiab coj qoob loo mus xyeem rau tej dab ntawd.
Twb muaj tej no, kuv tseem yuav hloov siab
tsis rau txim rau nej lov?
7Saum ib lub roob loj thiab siab
nej mus ua chaw pw
thiab nej coj qhov txhia chaw
nce mus xyeem rau dab qhov ntawd.
8Nej twb rhais ntxais rau nraum nej qhov rooj
thiab ntawm nej tus npuab rooj,
vim nej tso kuv tseg nej thiaj tshem
nej daim pam vov saum nej lub txaj pw,
nej nce mus pw rau saud
thiab kho chaw dav dav li.
Nej nrog lawv hais hum
thiab nej nyiam nrog lawv pw
thiab nej saib qhov uas lawv liab qab.
9Nej pleev roj tsw qab thiab tshuaj
tsw qab ntxiag mus nrhiav dab Maulej.
Nej tso neeg mus nrhiav deb deb li,
txawm yog hauv tub tuag teb
los nej tseem txib neeg nqes mus thiab.
10Txawm yog kev deb deb
ua rau nej txog siav kawg,
los nej twb tsis hais tias, ‘Tag kev vam lawm.’
Nej tseem muaj kev txhawb
kom nej rov muaj zog nej thiaj tsis tsaug leeg.
11“Nej ua siab puas tsus ntshai leejtwg
nej thiaj dag kuv tsis nco txog kuv
thiab tsis xav txog kuv mentsis li?
Yog kuv qos ncauj ntev los lawm
nej thiaj tsis ntshai kuv lov?
12Kuv yuav hais txog nej tej kev ncaj ncees
thiab tej uas nej ua,
tiamsis tej ntawd pab tsis tau nej.
13Thaum nej thov hu,
kuj cia nej tej dab mlom coob ntawd l
os cawm nej los maj!
Cua yuav muab tej dab mlom ntawd
ntsawj mus, ib nyuag nthwv cua xwb
yuav nqa kiag tej ntawd mus.
Tiamsis tus uas cawm siav rau hauv kuv
yuav tau lub tebchaws ua nws tug,
thiab yuav tau kuv lub roob uas dawb huv
ua qub txeeg qub teg.”
Yawmsaub yuav pab thiab kho nws haiv neeg tej mob
14Yuav muaj lus hais tias, “Tsub av,
tsub av kom siab, thiab npaj txojkev,
cia li tshem tej uas tsuam kuv haiv neeg txojkev.”
15Rau qhov tus uas siab kawg,
tus uas nyob ib txhis tsis kawg,
tus uas lub npe hu ua Dawb Huv
hais li no tias, “Kuv nyob qhov chaw
uas siab thiab dawb huv,
thiab nrog tus uas lees nws qhov txhaum
thiab txo nws lub hwjchim nyob,
yuav txhawb tus uas txo hwjchim tus ntsuj plig
thiab txhawb tus uas lees
nws qhov txhaum lub siab.
16Kuv yuav tsis tawm tsam mus ib txhis,
thiab kuv yuav tsis chim mus li,
rau qhov neeg tus ntsuj plig
yuav qaug zog ntawm kuv xubntiag,
yog cov neeg uas kuv pub muaj txojsia nyob.
17Kuv chim vim yog lawv txojkev siab hlob
ua txhaum muaj txim,
kuv thiaj ntaus lawv thiab fee plhu
thiab chim lawm.
Tiamsis lawv tseem tig rov qab mus
ua raws li lawv lub siab nyiam.
18Kuv twb pom tej uas lawv ua tag lawm,
mas kuv yuav kho kom lawv zoo.
Kuv yuav coj lawv thiab yuav nplij lawv lub siab,
thiab kuv yuav ua rau cov uas quaj ntsuag
muaj lus qhuas ntawm lub qhov ncauj.”
19Yawmsaub hais tias,
“Muaj kev thaj yeeb,
kev thaj yeeb rau cov uas nyob deb
thiab cov uas nyob ze.
Kuv yuav kho kom lawv zoo.”
20Tiamsis cov neeg limhiam
zoo yam nkaus li dej hiavtxwv
ntas mus ntas los, tsis txawj tus li,
thiab tej dej ntawd do kom
tej txo thiab tej tog khaub tog tsuag sawv tuaj.
21Kuv tus Vajtswv hais tias,
“Cov neeg limhiam
yuav tsis muaj lub siab tus li.”
57
1Tug kws ncaaj nceeg puam tsuaj,
hab tsw muaj leejtwg quav ntsej,
cov kws xyum zoo raug muab nteg coj moog lawm
hab tsw muaj leejtwg txawj nkaag sab.
Tsua qhov tug kws ncaaj nceeg tuag
mas nwg raug muab coj tawm
huv qhov kws txom nyem lawm.
2Nwg nkaag moog rua huv qhov kws kaaj sab lug lawm.
Cov kws ua lub neej ncaaj nceeg
kuj tau su huv nwg lub chaw pw.
3“Mej cov kws yog puj ua neeb tej tub hab cov kws yog
tug ua nkauj ua nraug hab tug puj muag cev tej tub ki
ca le txaav lug ze ntawm nuav.
4Mej thuaj luag leejtwg?
Mej rua ncauj luag hab hlauv nplaig rua leejtwg?
Mej tsw yog cov tuabneeg faav xeeb
hab cov tuabneeg daag le mivnyuas lov?
5Mej kub sab quas lug moog sws deev huv qaab tej ntoo xeeb
hab huv qaab txhua tsob ntoo ntsuab,
mej muab mej tej mivnyuas tua⚓
rua huv tej kwj haa hab huv tej qaab tsuas.
6Mej le feem mas yog tej daab ntawm tej pob zeb du du huv haav dej,
tej daab hov yog mej le feem ntaag.
Mej laub cawv txwv maab haiv laig hab
coj qoob loos moog xyeem rua tej daab ntawd.
Tub muaj tej nuav, kuv tseed yuav hloov sab
tsw rau txem rua mej lov?
7Sau ib lub roob luj hab sab mej moog ua chaw pw
hab mej coj hov txhua chaw nce moog xyeem rua daab hov ntawd.
8Mej tub rhais ntxaij rua nrau mej qhov rooj
hab ntawm mej tug puab rooj,
vem mej tso kuv tseg mej txhad cem
mej daim choj vuv sau mej lub txaaj pw,
mej nce moog pw rua sau
hab khu chaw daav daav le.
Mej nrug puab has hum hab mej nyam nrug puab pw
hab mej saib qhov kws puab lab qaab.
9Mej pleev roj tsw qaab hab tshuaj tsw qaab quas ntxag
moog nrhav daab Maulej.
Mej tso tuabneeg moog nrhav deb deb le,
txawm yog huv tub tuag teb los mej tseed khaiv tuabneeg nqeg moog hab.
10Txawm yog kev deb deb ua rua mej txug sav kawg,
los mej tub tsw has tas, ‘Taag kev vaam lawm.’
Mej tseed muaj kev txhawb kuas mej rov muaj zug
mej txhad tsw tsaug leeg.
11“Mej ua sab puag tsug ntshai leejtwg mej txhad daag kuv
tsw ncu txug kuv hab tsw xaav txug kuv mivntswv le?
Yog kuv qus ncauj ntev lug lawm
mej txhad tsw ntshai kuv lov?
12Kuv yuav has txug mej tej kev ncaaj nceeg
hab tej kws mej ua,
tassws tej hov paab tsw tau mej.
13Thaus mej thov hu,
kuj ca mej tej txoov daab coob hov
lug cawm mej los maj!
Cua yuav muab tej txoov daab ntawd ntsawj moog,
ib nyuas nthwv cua xwb yuav nqaa hlo tej ntawd moog.
Tassws tug kws cawm sav rua huv kuv
yuav tau lub tebchaws ua nwg tug,
hab yuav tau kuv lub roob kws dawb huv
ua qub txeeg qub teg.”
Yawmsaub yuav paab hab khu nwg haiv tuabneeg tej mob
14Yuav muaj lug has tas, “Tsub aav,
tsub aav kuas sab, hab npaaj txujkev,
ca le tshem tej kws tsuam kuv haiv tuabneeg txujkev.”
15Tsua qhov tug kws sab kawg,
tug kws nyob ib txhws tsw kawg,
tug kws lub npe hu ua Dawb Huv has le nuav tas,
“Kuv nyob qhov chaw kws sab hab dawb huv,
hab nrug tug kws leeg nwg qhov txhum
hab txu nwg tug fwjchim nyob,
yuav txhawb tug kws txu fwjchim tug ntsuj plig
hab txhawb tug kws leeg nwg qhov txhum lub sab.
16Kuv yuav tsw tawm tsaam moog ib txhws,
hab kuv yuav tsw chim moog le,
tsua qhov tuabneeg tug ntsuj plig
yuav qaug zug ntawm kuv xubndag,
yog cov tuabneeg kws kuv pub muaj txujsa nyob.
17Kuv chim vem yog puab txujkev sab hlub ua txhum muaj txem,
kuv txhad ntaus puab hab fee plhu hab chim lawm.
Tassws puab tseed tig rov qaab moog
ua lawv le puab lub sab nyam.
18Kuv tub pum tej kws puab ua taag lawm,
mas kuv yuav khu kuas puab zoo.
Kuv yuav coj puab hab yuav nplig puab lub sab,
hab kuv yuav ua rua cov kws quaj ntsuag
muaj lug qhuas ntawm lub qhov ncauj.”
19Yawmsaub has tas, “Muaj kev thaaj yeeb,
kev thaaj yeeb rua cov kws nyob deb hab cov kws nyob ze.
Kuv yuav khu kuas puab zoo.”
20Tassws cov tuabneeg limham zoo yaam nkaus le
dej havtxwv ndaas moog ndaas lug, tsw txawj tug le,
hab tej dej ntawd du kuas tej txo hab tej xub tsuag sawv tuaj.
21Kuv tug Vaajtswv has tas,
“Cov tuabneeg limham yuav tsw muaj lub sab tug le.”