1

Vajntxwv Xailab tso cov Yuda rov mus

(2VKk. 36:22-23)

¹Thawj xyoo uas vajntxwv Xailab kav Pawxia tebchaws, mas Yawmsaub tshoov Pawxia tus vajntxwv Xailab lub siab, xwv thiaj ua kom tiav raws li tej lus uas Yawmsaub kom Yelemi lub qhov ncauj hais, Xailab thiaj tshaj tawm thoob plaws nws lub tebchaws thiab muab sau cia hais tias, ²“Pawxia tus vajntxwv Xailab hais li no. Yawmsaub uas yog Vajtswv ntuj tau pub ib tsoom tebchaws huvsi hauv lub ntiajteb rau kuv, thiab nws hais kom kuv ua lub tuam tsev rau nws rau hauv lub nroog Yeluxalees uas nyob hauv Yuda tebchaws. ³Nej cov muaj leejtwg yog nws haiv neeg, thov nws tus Vajtswv nrog nraim tus ntawd nyob. Nws cia li rov mus rau Yeluxalees uas nyob hauv Yuda tebchaws thiab rov tsim kho Yawmsaub uas yog cov Yixayee tus Vajtswv lub tuam tsev dua tshiab, Yawmsaub yog tus Vajtswv uas nyob hauv Yeluxalees. ⁴Thiab txhua tus uas tshuav nyob tsis hais nyob rau qhovtwg los cia cov neeg uas lawv nrog nyob ntawd pab nyiaj thiab kub thiab qhov txhia chaw thiab tsiaj txhu, muab tshaj tej uas zoo siab pub xyeem rau Vajtswv lub tuam tsev uas nyob hauv Yeluxalee.”
⁵Ces xeem Yuda thiab xeem Npeeyamee cov thawj hauv txhua cum thiab cov pov thawj thiab cov Levi, yog txhua tus uas Vajtswv tus Ntsuj Plig tau tshoov lub siab, thiaj npaj yuav mus ua Yawmsaub lub tuam tsev rau hauv Yeluxalees dua tshiab. ⁶Mas txhua tus uas nrog lawv nyob ua ke pab tej twj siv nyiaj thiab kub thiab qhov txhia chaw thiab tsiaj txhu thiab tej yam muaj nqes, tshaj tej uas zoo siab muab xyeem pub. ⁷Tej twj siv hauv Yawmsaub lub tuam tsev uas Nenpukhanexa twb coj hauv Yeluxalees mus cia rau hauv nws lub tsev uas teev dab, mas vajntxwv Xailab muab rho tawm los. ⁸Pawxia tus vajntxwv muab tej ntawd rho los cob rau Mileda uas yog tus ceev nyiaj, mas Mileda thiaj muab suav rau Senpaxa uas yog Yuda ib tug thawj. ⁹Tej ntawd muaj npaum li no. Peb caug lub tais kub, ib txhiab lub tais nyiaj, nees nkaum cuaj lub phaj,⚓ ¹⁰peb caug lub phaj kub, plaub puas kaum lub phaj nyiaj thiab lwm yam tais phaj ib txhiab lub. ¹¹Tej twj taig uas muab kub muab nyiaj ua huvsi muaj tsib txhiab plaub puas lub. Tej no huvsi Senpaxa coj los rau thaum uas coj cov uas poob tebchaws hauv Npanpiloo rov los txog hauv Yeluxalees.

1

Xailas Samhwm Kom Cov Yixalayees Rov Qab

¹Thawj xyoo uas Xailas ua huabtais kav tebchaws Pawxias, tus TSWV thiaj ua kom muaj raws li nws tau hais rau Yelemis uas yog tus cev Vajtswv lus lawm. Tus Tswv tshoov Xailas siab kom ua raws li tej lus samhwm nram qab no, thiab muab sau xa mus nyeem nrov nrov rau cov pejxeem thoob plaws hauv lub tebchaws uas Xailas kav mloog.
²“Ntawm no yog Xailas tus uas yog tus huabtais kav tebchaws Pawxias tej lus samhwm. Tus TSWV uas yog Vajtswv, tus nyob saum ntuj, tau tso kuv los kav tagnrho lub qab ntuj no thiab kom kuv txhim kho lub Tuamtsev rau nws nyob hauv lub nroog Yeluxalees hauv xeev Yudas. ³Thov Vajtswv nrog nraim nej txhua tus uas yog nws haivneeg nyob. Nej cia li rov qab mus rau tim lub nroog Yeluxalees thiab rov mus txhim kho tus TSWV uas yog cov Yixalayees tus Vajtswv lub Tuamtsev dua tshiab. Nws yog tus Vajtswv tus uas nej pehawm nyob hauv lub nroog Yeluxalees. ⁴Yog nws haivneeg ib leeg tus twg uas raug luag ntes coj mus lawm, xav rov qab los mas nws cov neeg zejzog nruab ze yuav pab tau nws. Lawv yuav tau muab nyiaj muab kub, zaub mov noj thiab nees rau nws thauj nws tej nra coj los fij rau Vajtswv hauv lub Tuamtsev uas nyob hauv lub nroog Yeluxalees.”
⁵Ces cov thawjcoj ntawm tej cuab kwvtij ntawm xeem Yudas thiab xeem Npeenyamees, cov povthawj thiab cov Levis, thiab txhua tus uas Vajtswv tau tshoov kom muaj lub siab kub lug npaj nroos rov qab mus txhim kho tus TSWV lub Tuamtsev hauv lub nroog Yeluxalees dua tshiab. ⁶Tagnrho lawv cov neeg zejzog txawm nqis tes nroos pab ntau yam khoom rau lawv raws li nram qab no: tej tais nyiaj, tais kub, zaub mov noj, nyuj thiab nees thauj nra, lwm yam khoom siv uas muaj nqis thiab tej khoom fij hauv lub Tuamtsev.
⁷Huabtais Xailas muab tej tais thiab khob uas Vajntxwv Nenpukajnexales tau coj hauv lub Tuamtsev hauv lub nroog Yeluxalees los tso rau hauv lub tsev uas nws teev nws tej mlom rau lawv nqa huv tibsi rov qab. ⁸Huabtais muab tej ntawd cob rau Miledas uas yog vajntxwv tus tub ceev nyiaj txiag, Miledas muab tshuaj saib tag thiab muab teev tseg cia rau hauv ntaub ntawv thiab nws muab cob rau Senpaxas uas yog ib tug tswvxeev kav lub xeev Yudas, ^9-10muaj raws li no: