35

Yakhauj rov mus rau Npe‑ee

¹Vajtswv hais rau Yakhauj hais tias, “Cia li sawv tsees tsiv mus rau nram Npe‑ee mus nyob nrad es tib ib lub thaj rau tus Vajtswv uas thaum koj khiav koj tus tijlaug Exau es los tshwm rau koj pom.” ²Vim li ntawd Yakhauj thiaj hais rau nws tsev neeg thiab cov neeg uas nrog nws nyob ua ke sawvdaws hais tias, “Cia li muab lwm tebchaws tej dab uas nej coj tso pov tseg huvsi thiab ua kevcai ntxuav lub cev lub siab kom kaj kom huv thiab hloov tsoos tsho huvsi. ³Peb cia li mus lawm nram Npe‑ee mas kuv yuav tib ib lub thaj rau ntawd rau tus Vajtswv uas thaum kuv raug kev txom nyem es nws teb kuv thiab nrog nraim kuv nyob rau txhua qhov chaw uas kuv tau mus.” ⁴Lawv txawm muab lwm haiv neeg tej dab qhuas uas lawv coj thiab muab lawv tej kauj co⚓ uas lawv coj ntawm qhov ntsej huvsi rau Yakhauj, ces Yakhauj txawm muab faus rau hauv tsob qab ntoo xeeb uas nyob ze lub moos Sekhee.
⁵Thaum lawv tsiv mus ntawd mas Vajtswv ua rau tej zej zog thoob plaws hauv tebchaws ntawd ntshai kawg li, lawv thiaj tsis caum Yakhauj cov tub qab. ⁶Yakhauj thiab nws cov neeg sawvdaws los txog ntawm Lu (uas yog Npe‑ee) uas nyob hauv Khana‑as tebchaws. ⁷Yakhauj txawm tib ib lub thaj rau ntawd mas hu qhov chaw ntawd ua Eenpe‑ee,⚓ vim yog qhov chaw uas thaum Yakhauj khiav nws tus tijlaug es Vajtswv los tshwm rau nws pom. ⁸Tus nkauj qhev Denpaula uas tu Lenpekha hlob txawm tuag mas lawv muab nws log rau hauv tsob qab ntoo xeeb nram qab Npe‑ee, mas thiaj hu tsob ntoo ntawd ua Aloo Npakhu.⚓
⁹Thaum Yakhauj tsiv ntawm Pada Alas rov los Vajtswv los tshwm rau Yakhauj dua ib zaug thiab foom koob hmoov rau nws. ¹⁰Vajtswv hais rau nws tias, “Koj npe hu ua Yakhauj⚓ tiamsis yuav tsis hu koj ua Yakhauj dua li lawm, yuav hu koj ua Yixayee.”⚓ Yog li no thiaj hu nws ua Yixayee. ¹¹Thiab Vajtswv hais rau Yakhauj tias, “Kuv yog Vajtswv uas muaj hwjchim loj kawg nkaus.⚓ Koj cia li muaj tub ki huaj vam coob coob. Muaj ib haiv neeg yuav tshwm ntawm koj los thiab yuav muaj ntau haiv neeg tshwm ntawm koj los, yuav muaj tej vajntxwv tshwm ntawm koj los. ¹²Lub tebchaws uas kuv muab pub rau Aplahas thiab Yiha lawd kuv yeej yuav pub rau koj thiab pub rau koj caj ces mus li.” ¹³Vajtswv txawm tawm ntawm qhov chaw uas nrog Yakhauj tham mus lawm. ¹⁴Yakhauj txawm txhos ib tug ncej zeb cia rau ntawm qhov chaw uas Vajtswv nrog nws hais lus thiab nws muab cawv txiv hmab hliv ywg ua kevcai hliv xyeem rau saum tus ncej thiab muab roj hliv ywg tus ncej ntawd. ¹⁵Yakhauj hu qhov chaw uas Vajtswv nrog nws hais lus ntawd ua Npe‑ee.⚓

Lachee thiab Yiha tuag

¹⁶Lawv tsiv ntawm Npe‑ee mus tsis tau txog Efatha ces Lachee txawm mob plab heev thiab yug menyuam nyuaj heev. ¹⁷Thaum nws tabtom mob heev tus pojniam uas pab yug menyuam hais rau Lachee tias, “Koj tsis txhob ntshai, koj twb tau dua ib tug metub lawm.” ¹⁸Thaum nws yuav tu siav yuav tuag ntawd nws tis tus metub ntawd npe hu ua Npee‑auni⚓ tiamsis nws txiv tis npe hu ua Npeeyamee.⚓ ¹⁹Ces Lachee txawm tuag lawm, mas lawv muab nws log rau ntawm ntug kev uas mus rau nram lub zos Efatha (uas yog Npelehee). ²⁰Yakhauj muab ib tug ncej zeb txhos rau ntawm lub ntxa. Tus ncej ntawm Lachee lub ntxa mas nyob los txog niaj hnub nimno.
²¹Yixayee kuj tsiv rau tom ntej, mus tsa tsev ntaub nyob dhau plaws lub chaw tsom faj Edaw. ²²Thaum Yixayee nyob rau hauv lub tebchaws ntawd Lunpee txawm mus nrog nws txiv tus niam yau Npiha pw. Yixayee kuj hnov txog qhov ntawd thiab.
Yakhauj muaj kaum ob tug tub. ²³Le‑a cov tub yog Lunpee uas yog Yakhauj tus tub hlob, thiab Xime‑oo, Levi, Yuda, Ixakha, thiab Xenpuloo. ²⁴Lachee cov tub yog Yauxej thiab Npeeyamee. ²⁵Lachee tus nkauj qhev Npiha cov tub yog Daj thiab Nathali. ²⁶Le‑a tus nkauj qhev Xilapa cov tub yog Kas thiab Asaw. Cov no yog Yakhauj cov tub uas yug ntawm Pada Alas.
²⁷Yakhauj rov los cuag nws txiv Yiha ntawm Male uas ze lub moos Khiliya Anpa (uas yog Heploo) yog lub chaw uas thaum ub Aplahas thiab Yiha txeev ua qhua nyob. ²⁸Yiha hnub nyoog muaj ib puas yim caum xyoo, ²⁹nws txojsia li tu. Nws nyob laus nkoos txog caij txog nyoog li tuag mus nrog nws tej poj koob yawm txwv nyob. Nws ob tug tub Exau thiab Yakhauj thiaj coj nws mus log.

35

Yakhauj rov moog rua Npe‑ee

¹Vaajtswv has rua Yakhauj has tas, “Ca le sawv tseeg tswv moog rua nraag Npe‑ee moog nyob nraag es tib ib lub thaaj rua tug Vaajtswv kws thau koj tswv koj tug tijlaug Exau es lug tshwm rua koj pum.” ²Vem le hov Yakhauj txhad has rua nwg tsev tuabneeg hab cov tuabneeg kws nrug nwg nyob ua ke suavdawg has tas, “Ca le muab lwm tebchaws tej daab kws mej coj tso pov tseg huvsw hab ua kevcai ntxuav lub cev lub sab kuas kaaj kuas huv hab hloov tsoog tsho huvsw. ³Peb ca le moog lawm nraag Npe‑ee mas kuv yuav tib ib lub thaaj rua ntawd rua tug Vaajtswv kws thau kuv raug kev txom nyem es nwg teb kuv hab nrug nraim kuv nyob rua txhua qhov chaw kws kuv tau moog.” ⁴Puab txawm muab lwm haiv tuabneeg tej daab qhuas kws puab coj hab muab puab tej puj cu⚓ kws puab coj ntawm qhov ntsej huvsw rua Yakhauj, tes Yakhauj txawm muab faus rua huv qaab tsob ntoo xeeb kws nyob ze lub moos Sekhee.
⁵Thaus puab tswv moog hov mas Vaajtswv ua rua tej zej zog thoob plawg huv tebchaws hov ntshai kawg le, puab txhad tsw caum Yakhauj cov tub qaab. ⁶Yakhauj hab nwg cov tuabneeg suavdawg lug txug ntawm Lu (kws yog Npe‑ee) kws nyob huv Khana‑aa tebchaws. ⁷Yakhauj txawm tib ib lub thaaj rua ntawd mas hu lub chaw hov ua Eenpe‑ee,⚓ vem yog lub chaw kws thau Yakhauj tswv nwg tug tijlaug es Vaajtswv lug tshwm rua nwg pum. ⁸Tug nkauj qhev Ntenpaula kws tu Lenpekha hlub txawm tuag mas puab muab nwg log rua huv qaab tsob ntoo xeeb nraag qaab Npe‑ee, mas txhad hu tsob ntoo hov ua Aaloo Npakhu.⚓
⁹Thaus Yakhauj tswv ntawm Panta Alaa rov lug Vaajtswv lug tshwm rua Yakhauj dua ib zag hab foom koob moov rua nwg. ¹⁰Vaajtswv has rua nwg tas, “Koj npe hu ua Yakhauj⚓ tassws yuav tsw hu koj ua Yakhauj dua le lawm, yuav hu koj ua Yixayee.”⚓ Yog le nuav txhad hu nwg ua Yixayee. ¹¹Hab Vaajtswv has rua Yakhauj tas, “Kuv yog Vaajtswv kws muaj fwjchim luj kawg nkaus.⚓ Koj ca le muaj tub ki fuam vaam coob coob. Muaj ib haiv tuabneeg yuav tshwm ntawm koj lug hab yuav muaj ntau haiv tuabneeg tshwm ntawm koj lug, yuav muaj tej vaajntxwv tshwm ntawm koj lug. ¹²Lub tebchaws kws kuv muab pub rua Aplahaa hab Yiha lawd kuv yeej yuav pub rua koj hab pub rua koj caaj ceg moog le.” ¹³Vaajtswv txawm tawm ntawm lub chaw kws nrug Yakhauj thaam moog lawm. ¹⁴Yakhauj txawm txhus ib tug ncej zeb ca rua ntawm lub chaw kws Vaajtswv nrug nwg has lug hab nwg muab cawv txwv maab laub ywg ua kevcai laub xyeem rua sau tug ncej hab muab roj laub ywg tug ncej hov. ¹⁵Yakhauj hu lub chaw kws Vaajtswv nrug nwg has lug ntawd ua Npe‑ee.⚓

Lachee hab Yiha tuag

¹⁶Puab tswv ntawm Npe‑ee moog tsw tau txug Efatha tes Lachee txawm ua mob teb heev yug mivnyuas nyuaj heev. ¹⁷Thaus nwg saamswm mob heev tug quaspuj kws paab yug mivnyuas has rua Lachee tas, “Koj tsw xob ntshai, koj tub tau dua ib tug mivtub lawm.” ¹⁸Thaus nwg yuav tu sav yuav tuag hov nwg tis tug mivtub hov npe hu ua Npee‑auni⚓ kuas nwg txwv tis npe hu ua Npeeyamee.⚓ ¹⁹Tes Lachee txawm tuag lawm, mas puab muab nwg log rua ntawm ntug kev kws moog rua nraag lub zog Efatha (kws yog Npelehee). ²⁰Yakhauj muab ib tug ncej zeb txhus rua ntawm lub ntxaa. Tug ncej ntawm Lachee lub ntxaa mas nyob lug txug naj nub nwgnuav.
²¹Yixayee kuj tswv rua tom ntej, moog tsaa tsev ntaub nyob dhau plhawv lub chaw tsom faaj Entaw. ²²Thaus Yixayee nyob rua huv lub tebchaws hov Lunpee txawm moog nrug nwg txwv tug nam yau Npiha pw. Yixayee kuj nov txug qhov hov hab.
Yakhauj muaj kaum ob tug tub. ²³Le‑a cov tub yog Lunpee kws yog Yakhauj tug tub hlub, hab Xime‑oo, Levi, Yuta, Ixakha, hab Xenpuloo. ²⁴Lachee cov tub yog Yauxej hab Npeeyamee. ²⁵Lachee tug nkauj qhev Npiha cov tub yog Ntaaj hab Nathali. ²⁶Le‑a tug nkauj qhev Xilapa cov tub yog Kas hab Asaw. Cov nuav yog Yakhauj cov tub kws yug ntawm Panta Alaa.
²⁷Yakhauj rov lug cuag nwg txwv Yiha ntawm Maale kws ze lub moos Khiliya Anpa (kws yog Heploo) yog lub chaw kws thau u Aplahaa hab Yiha txeev ua qhua nyob. ²⁸Yiha noob nyoog muaj ib puas yim caum xyoo, ²⁹nwg txujsa le tu. Nwg nyob laug quas nkoog txug caij txug nyoog le tuag moog nrug nwg tej laug nyob. Nwg ob tug tub Exau hab Yakhauj txhad coj nwg moog log.