29
1Tus uas pheej raug qhuab ntuas
los tseem tawv ncauj cov nyom tsis mloog,
mas ib pliag ntshis xwb
yuav raug kev puas ntsoog kho tsis tau.
2Thaum cov ncaj ncees tau hwjchim
tej pejxeem xyiv fab,
tiamsis thaum cov neeg limhiam tau kav,
tej pejxeem kuj ntsaj laws.
3Tus uas nyiam tswvyim
kuj ua rau leej txiv zoo siab,
tiamsis tus uas pheej ntiav poj muag cev
kuj yog muab nws tej nyiaj txiag
nchuav pov tseg xwb.
4Tus vajntxwv uas kav ncaj
coj lub tebchaws nyob ruaj,
tus uas quab yuam sau nyiaj txiag
kuj ua rau lub tebchaws puam tsuaj.
5Tus uas ncauj qab zib nplaig qab ntse
rau kwvtij zej zog
kuj yog nws cuab hlua rov mag nws kotaw.
6Tus neeg phem
nws mag nws li kev txhaum txoj hlua,
tiamsis tus ncaj ncees hu nkauj xyiv fab hlo.
7Tus ncaj ncees paub tus pluag txojcai,
tiamsis tus limhiam tsis nkag siab tej no.
8Cov uas pheej thuam lwm tus
ua rau lub nroog kub hnyiab,
tiamsis cov uas txawj ntse
tswj kom tej kev npau taws ploj mus.
9Yog tus ntse nrog tus ruam sib cav sib ceg,
tus ruam tsuas muaj uas npau taws
thiab luag xwb, thiab tsis muaj kev tus li.
10Cov uas noj nyoog
kuj ntxub tus uas dawb huv,
thiab nrhiav ntshi txov
cov ncaj ncees txojsia.
11Tus uas ruam yeej ua nws kev chim
tshwm tag nrho los,
tiamsis tus txawj ntse
tswj tau nws txojkev npau cia twjywm.
12Yog tus thawj ntseeg tej lus dag,
mas nws cov tub teg tub taws
yuav limhiam tag huvsi.
13Tus uas pluag thiab tus uas quab yuam
qhov uas sib thooj yog qhov uas
Yawmsaub pub qhov kaj
rau ob tug qhov muag ib yam nkaus.
14Yog vajntxwv tu plaub ncaj rau cov pluag,
mas nws lub zwm txwv
yuav nyob ruaj khov ib txhis.
15Rab nplawm thiab lo lus qhuab ntuas
pub tswvyim,
tiamsis tus menyuam uas muab tso ywj siab
coj kev txaj muag rau leej niam.
16Thaum cov neeg limhiam tau hwjchim
tuav haujlwm,
muaj tej kev fav xeeb loj zuj zus,
tiamsis cov ncaj ncees yuav pom ntsoov
lawv raug kev puam tsuaj.
17Cia li nplawm qhuab qhia koj tus tub
nws thiaj ua rau koj nyob siab tus yees
thiab ua rau koj zoo siab.
18Qhovtwg tsis muaj kev qhia Vajtswv tej lus,
mas tej pejxeem kuj tseg tsis tswj lub siab,
tiamsis tus uas tuav rawv txoj kevcai
mas tau nyob kaj siab lug.
19Yog tsuas xuas ncauj hais xwb
mas cob qhia tsis tau tus tub qhe,
txawm yog nws nkag siab
los nws kuj tsis quav ntsej.
20Koj pom tus ncauj sai los tsis pom?
Tseem muaj vam tus uas ruam
heev dua li tus ntawd.
21Tus uas hlub nws tus tub qhe heev
txij thaum yau los,
mas thaum kawg yuav pom tias tus tub qhe
yuav tau nws tej qub txeeg qub teg.⚓
22Tus uas npau taws pheej tshum
kom muaj lus sib cav sib ceg,
thiab tus uas chim taus
kuj ua hauv paus fav xeeb loj.
23Kev khav theeb yuav ua rau
tus khav theeb poob qes,
tiamsis tus uas txo hwjchim
yuav tau koob meej.
24Tus uas nrog tub sab koom tes
kuj yog nws ntxub nws txojsia,
nws tau hnov tej lus twv tsawm
los nws tsis hais dabtsi li.
25Qhov uas ntshai neeg
yuav ua rooj hlua rov cuab yus,
tiamsis tus uas tso siab rau Yawmsaub
kuj nyob tso siab plhuav.
26Neeg coob nrhiav kev
ua kom tus thawj coj hlub lawv,
tiamsis Yawmsaub yog tus uas
txiav txim ncaj rau neeg.
27Tus tsis ncaj mas cov ncaj ncees
kuj ntxub kawg li,
tiamsis tus ua ncaj mas cov limhiam
kuj ntxub kawg li.
29
1Tug kws pheej raug qhuab ntuag
los tseed kwv cov kwv tawv tsw noog,
mas ib plag ntshws xwb
yuav raug kev puag ntsoog khu tsw tau.
2Thaus cov ncaaj nceeg tau fwjchim
tej pejxeem xyiv faab,
tassws thaus cov tuabneeg limham tau kaav,
tej pejxeem kuj ntsaaj quas lawg.
3Tug kws nyam tswvyim
kuj ua rua leej txwv zoo sab,
tassws tug kws pheej ndav puj muag cev
kuj yog muab nwg tej nyaj txag
nchuav pov tseg xwb.
4Tug vaajntxwv kws kaav ncaaj
coj lub tebchaws nyob ruaj,
tug kws quab yuam sau nyaj txag
kuj ua rua lub tebchaws puam tsuaj.
5Tug kws ncauj qaab zwb nplaig qaab ntse
rua kwvtij zej zog
kuj yog nwg cuab hlua rov maag nwg kwtaw.
6Tug tuabneeg phem
nwg maag nwg le kev txhum txuj hlua,
tassws tug ncaaj nceeg
hu nkauj xyiv faab hlo.
7Tug ncaaj nceeg paub tug pluag txujcai,
tassws tug limham tsw nkaag sab tej nuav.
8Cov kws pheej thuaj lwm tug
ua rua lub nroog kub nyab,
tassws cov kws txawj ntse
tswj kuas tej kev npau tawg pluj moog.
9Yog tug ntse nrug tug ruag sws caav sws tshe,
tug ruag tsuas muaj kws npau tawg
hab luag xwb, hab tsw muaj kev tug le.
10Cov kws noj nyoog
kuj ntxub tug kws dawb huv,
hab nrhav quas ntshw txuv
cov ncaaj nceeg txujsa.
11Tug kws ruag yeej ua nwg kev chim
tshwm taag nrho lug,
tassws tug txawj ntse
tswj tau nwg txujkev npau ca tuabywv.
12Yog tug thawj ntseeg tej lug daag,
mas nwg cov tub teg tub taw
yuav limham taag huvsw.
13Tug kws pluag hab tug kws quab yuam
qhov kws sws thooj yog qhov kws
Yawmsaub pub qhov kaaj
rua ob tug qhov muag ib yaam nkaus.
14Yog vaajntxwv tu plaub ncaaj rua cov pluag,
mas nwg lub zwm txwv
yuav nyob ruaj khov ib txhws.
15Raab nplawm hab lu lug qhuab ntuag
pub tswvyim,
tassws tug mivnyuas kws muab tso ywj sab
coj kev txaaj muag rua leej nam.
16Thaus cov tuabneeg limham tau fwjchim
tuav daag num,
muaj tej kev faav xeeb luj quas zug,
tassws cov ncaaj nceeg yuav pum ntsoov
puab raug kev puam tsuaj.
17Ca le nplawm qhuab qha koj tug tub
nwg txhad ua rua koj nyob sab tug yeeg
hab ua rua koj zoo sab.
18Qhovtwg tsw muaj kev qha Vaajtswv tej lug,
mas tej pejxeem kuj tseg tsw tswj lub sab,
tassws tug kws tuav rawv txuj kevcai
mas tau nyob kaaj sab lug.
19Yog tsuas xuas ncauj has xwb
mas cob qha tsw tau tug tub qhe,
txawm yog nwg nkaag sab
los nwg kuj tsw quav ntsej.
20Koj pum tug ncauj sai los tsw pum?
Tseed muaj vaam tug kws ruag
heev dua le tug ntawd.
21Tug kws hlub nwg tug tub qhe heev
txwj thaus yau lug,
mas thaus kawg yuav pum tas tug tub qhe
yuav tau nwg tej qub txeeg qub teg.⚓
22Tug kws npau tawg pheej tshaum
kuas muaj lug sws caav sws tshe,
hab tug kws chim taug
kuj ua hauv paug faav xeeb luj.
23Kev khaav theeb yuav ua rua
tug khaav theeb poob qeg,
tassws tug kws txu fwjchim
yuav tau koob meej.
24Tug kws nrug tub saab koom teg
kuj yog nwg ntxub nwg txujsa,
nwg tau nov tej lug twv tsawm
los nwg tsw has daabtsw le.
25Qhov kws ntshai tuabneeg
yuav ua rooj hlua rov cuab yug,
tassws tug kws tso sab rua Yawmsaub
kuj nyob tso sab plhuav.
26Tuabneeg coob nrhav kev
ua kuas tug thawj coj hlub puab,
tassws Yawmsaub
yog tug kws txav txem ncaaj rua tuabneeg.
27Tug tsw ncaaj
mas cov ncaaj nceeg kuj ntxub kawg le,
tassws tug ua ncaaj
mas cov limham kuj ntxub kawg le.