1Yausuas hu tagnrho xeem Lunpees, xeem Khas thiab xeem Manaxes sab Hnubtuaj los cuag nws. 2Yausuas hais rau lawv hais tias, “Nej tau ua txhua yam uas tus TSWV tus tubtxib Mauxes hais rau nej ua, thiab nej twb ua raws li kuv hais lawm. 3Txij thaum pib los txog nimno, nej tsis tso nej cov kwvtij Yixalayees tseg li. Nej ua tib zoo mloog thiab ua raws li tus TSWV uas yog nej tus Vajtswv tej lus samhwm. 4Nimno nej cov kwvtij Yixalayees twb nyob thajyeeb lug raws li tus TSWV uas yog nej tus Vajtswv tau coglus tseg lawm. Nej cia li rov mus tsev, mus rau nej lub tebchaws ntawm tus Dej Yauladees sab hnubtuaj uas tus TSWV tus tubtxib Mauxes twb muab rau nej lawm. 5Nej yuav tsum nco ntsoov ua raws li tej kevcai uas Mauxes twb qhia rau nej lawm hais tias, hlub tus TSWV uas yog nej tus Vajtswv, ua raws li nws siab nyiam, mloog nws lus, muab siab npuab nws thiab ua nws tes haujlwm kawg nej lub siab lub ntsws.” 6-8Yausuas foom koob hmoov rau lawv, tso lawv mus tsev thiab hais tias: “Nej rov mus tsev, thov Vajtswv pub nej muaj txiag npluanuj, muaj tsiaj txhu coob, muaj nyiaj muaj kub, muaj tooj muaj hlau thiab muaj tsoos tsho hnav. Muab tej uas nej mus txeeb tau ntawm yeebncuab los faib rau nej tej kwvtij.” Ces lawv txawm rov mus tsev lawm. Mauxes twb muab lub tebchaws ntawm tus Dej Yauladees sab hnubtuaj faib rau ib nrab xeem Manaxes lawm, tiamsis Yausuas muab lub tebchaws ntawm tus Dej Yauladees sab hnubpoob faib rau ib nrab xeem Manaxes thiab lwm xeem. 9Yog li ntawd, xeem Lunpees, xeem Khas thiab xeem Manaxes sab Hnubtuaj thiaj rov mus tsev, lawv tso lawv cov kwvtij Yixalayees rau ntawm lub nroog Silaus hauv tebchaws Kana-as, thiab lawv rov mus rau tebchaws Nkile-as uas lawv txeeb tau los raws li tus TSWV tau hais rau Mauxes kom hais rau lawv lawm.
Lub Thaj Ntawm Ntug Dej Yauladees
10Thaum xeem Lunpees, xeem Khas thiab xeem Manaxes sab Hnubtuaj rov los txog hauv Nkelilaus uas nyob ntawm ntug Dej Yauladees sab hnubpoob, lawv teeb tau ib lub thaj loj thiab zoo heev rau ntawm ntug dej. 11Muaj neeg mus qhia rau cov kwvtij Yixalayees hais tias, “Nej mloog kuv hais! Xeem Lunpees, xeem Khas thiab xeem Manaxes sab Hnubtuaj teeb tau ib lub thaj rau ntawm Nkelilaus uas nyob ntawm ntug Dej Yauladees uas yog peb sab!” 12Thaum cov kwvtij Yixalayees hnov zaj no, lawv txawm tuaj sib sau rau hauv Silaus thiab npaj mus tua cov xeem uas nyob sab hnubtuaj. 13Cov kwvtij Yixalayees thiaj tso tus povthawj Finehas uas yog Ele-axas tus tub mus cuag xeem Lunpees, xeem Khas thiab xeem Manaxes sab Hnubtuaj uas nyob hauv tebchaws Nkile-as. 14Muaj kaum leej thawjcoj, ib xeem ib leeg ntawm cov xeem uas nyob sab hnubpoob nrog Finehas mus, lawv puavleej yog tus thawj ntawm tej tsevneeg thiab tej cuab. 15Lawv mus cuag xeem Lunpees, xeem Khas thiab xeem Manaxes sab Hnubtuaj hauv tebchaws Nkile-as, 16thiab hais rau tus TSWV haivneeg hais tias, “Vim li cas nej ua tej kev phem no tawmtsam cov Yixalayees tus Vajtswv? Qhov uas nej teeb lub thaj no rau nej, yog nej ntxeev siab rau tus TSWV! Tsis yog nej ua los pehawm nws! 17Nej puas tseem nco tau tej kev txhaum uas peb ua nyob ntawm Pe-aus uas tus TSWV tso sub tawg sub ntsha rau txim rau peb? Nimno peb raug txomnyem twb vim tej ntawd ntag. Peb ua txhaum loj li ntawd tseem tsis tau txaus thiab los? 18Nej yuav tso tus TSWV tseg los? Yog hnub no nej ntxeev siab rau tus TSWV, tagkis nws yuav chim rau peb cov Yixalayees txhua tus. 19Yog nej lub tebchaws no tsis huv, nej cia li tuaj rau tim tus TSWV lub tebchaws uas teeb tus TSWV lub Tsevntaub. Tuaj thov peb muab av rau nej. Tiamsis nej tsis txhob ntxeev siab rau tus TSWV lossis ntxeev siab rau peb thiab mus teeb dua lwm lub thaj ntxiv rau tus TSWV uas yog peb tus Vajtswv lub. 20Nej nco ntsoov hais tias, Zelas tus tub Akhas tsis ua raws li tus TSWV tej lus, nws tsis muab tej khoom hlawv kom tas huv tibsi; cov Yixalayees thiaj raug txim vim tej ntawd. Muaj ntau leej tuag nrog Akhas vim nws tej kev txhaum.” 21Xeem Lunpees, xeem Khas thiab xeem Manaxes sab Hnubtuaj teb rau cov thawjcoj ntawm tej tsevneeg ntawm cov xeem uas nyob sab hnubpoob hais tias, 22“Tus muaj Hwjchim Loj yog Vajtswv! Nws yog tus TSWV! Tus muaj Hwjchim Loj yog Vajtswv! Nws yog tus TSWV! Nws paub tej uas peb ua no, thiab peb xav kom nej paub! Yog hais tias peb ntxeev siab thiab tsis muab siab npuab tus TSWV, thov tsis txhob pub kom peb muaj sia nyob! 23Yog hais tias peb tsis mloog tus TSWV lus, peb teeb lub thaj no hlawv peb tej khoom theej txhoj, tej nplej lossis tej khoom fij ua kev sib raug zoo, ces cia tus TSWV rau txim rau peb. 24Tsis yog peb ntxeev siab! Qhov uas peb teeb lub thaj no yog peb ntshai nyob tsam yav tom ntej nej cov xeebntxwv yuav hais rau peb cov xeebntxwv hais tias, ‘Nej tau ua dabtsi rau tus TSWV uas yog cov Yixalayees tus Vajtswv? 25Tus TSWV muab tus Dej Yauladees ua tus ciamteb quas nruab nrab ntawm peb thiab nej, nej cov uas yog xeem Lunpees thiab xeem Khas, tsis tau ua dabtsi rau tus TSWV li.’ Ces nej cov xeebntxwv yuav ua rau peb cov xeebntxwv tso txojkev pehawm tus TSWV tseg. 26Peb teeb lub thaj no, tsis yog teeb los hlawv tsiaj fij lossis hlawv khoom fij, 27tiamsis yog peb teeb los ua lub cim qhia rau peb thiab rau nej thiab rau peb tej xeebntxwv ntau tiam tom qab paub hais tias, peb yeej pehawm tus TSWV, hlawv khoom theej txhoj thiab fij khoom ua kev sib raug zoo tabmeeg tus TSWV lub Tsevntaub. Tej no yog peb ua tseg kom nej cov xeebntxwv tsis txhob hais tias, ‘Nej tsis tau ua dabtsi rau tus TSWV li.’ 28Tej no yog tej uas peb txhawj txog. Yog muaj tseeb li peb xav ntawd tiag, peb cov xeebntxwv thiaj muaj lus hais tias, ‘Nej sim saib saib! Peb cov yawgkoob muaj lub thaj zoo ib yam li tus TSWV lub thiab. Tsis yog peb teeb los hlawv tsiaj lossis hlawv khoom fij, tiamsis yog teeb los ua lub cim tseg rau nej thiab rau peb xwb.’ 29Tsis yog peb ntxeev siab lossis tso tus TSWV tseg, peb yuav cia li teeb dua ib lub thaj hlawv tsiaj, hlawv nplej lossis lwm yam khoom fij. Peb yeej tsis teeb dua lwm lub thaj kom zoo li tus TSWV uas yog peb tus Vajtswv lub uas nyob ntawm tus TSWV lub Tsevntaub hauv ntej.” 30Tus povthawj Finehas thiab kaum leej thawjcoj uas sawvcev tsoom pejxeem uas yog cov thawj ntawm tej tsevneeg ntawm cov xeem nyob sab hnubpoob uas nrog Finehas mus ntawd hnov tej lus uas xeem Lunpees, xeem Khas thiab xeem Manaxes sab Hnubtuaj hais, lawv thiaj txaus siab. 31Tus povthawj Finehas uas yog Ele-axas tus tub hais rau lawv peb xeem ntawd hais tias, “Nimno peb paub hais tias tus TSWV nrog peb nyob. Tsis yog nej ntxeev siab rau tus TSWV, tiamsis yog nej ua kom cov Yixalayees dim tus TSWV txoj kev rau txim xwb.” 32Finehas thiab cov thawjcoj uas nrog nws mus tso xeem Lunpees, xeem Khas thiab xeem Manaxes sab Hnubtuaj rau hauv tebchaws Nkile-as thiab rov los cuag cov Yixalayees rau hauv tebchaws Kana-as, thiab piav txhua yam rau lawv. 33Cov kwvtij Yixalayees txaus siab thiab ua Vajtswv tsaug. Lawv tsis hais txog qhov uas yuav tua thiab rhuav lub tebchaws uas xeem Lunpees thiab xeem Khas nyob lawm. 34Xeem Lunpees thiab xeem Khas hais tias, “Lub thaj no ua timkhawv rau peb sawvdaws hais tias tus TSWV yog Vajtswv!” Yog li ntawd, lawv thiaj tis npe rau lub thaj ntawd hu ua “Timkhawv.”
22
Lub thaaj ntawm ntug dej Yalatee
1Thaus ntawd Yausua hu xeem Lunpee hab xeem Kas hab ib nraab xeem Manaxe tuaj 2mas has rua puab tas, “Mej tub ua lawv le Yawmsaub tug tub qhe Mauxe has rua mej lawm hab mej noog kuv lug hab ua txhua yaam kws kuv has kuas mej ua. 3Ntev lug txug naj nub nwgnuav mej tsw tso mej cov kwvtij tseg, mej tub ceev faaj ua lawv le kws Yawmsaub kws yog mej tug Vaajtswv has rua mej. 4Nwgnuav Yawmsaub kws yog mej tug Vaajtswv tub pub mej cov kwvtij tau su lawm, lawv le nwg tau cog lug tseg rua puab. Tes mej ca le rov qaab moog tsev huv lub tebchaws kws Yawmsaub tug tub qhe Mauxe muab pub rua mej ua mej teej mej tug saab dej Yalatee nub tuaj. 5Mej yuav tsum ceev faaj ua lawv le tej lug nkaw hab txuj kevcai kws Yawmsaub tug tub qhe Mauxe has rua mej lawd. Mej yuav hlub Yawmsaub kws yog mej tug Vaajtswv hab ua mej lub neej lawv le nwg txhua txujkev huvsw, hab tuav rawv nwg tej lug nkaw hab nrug nwg tsheej xeeb, hab ua koom rua nwg kawg mej lub sab lub ntsws.” 6Yausua txhad foom koob moov rua puab hab xaa puab moog tes puab txawm rov moog puab vaaj puab tsev. 7Ib nraab xeem Manaxe hov, Mauxe tub muab Npasaa tebchaws rua puab yuav ua puab tug, tshuav ib nraab xeem hov mas Yausua pub puab nrug puab cov kwvtij tau teej tug saab dej Yalatee nub poob. Thaus Yausua xaa puab moog tsev nwg foom koob moov rua puab, 8hab has rua puab tas, “Ca le rov qaab moog nyag vaaj nyag tsev, coj tej cuab txhaj cuab taam muaj nplua quas mag, tej nam paab tsaj tej nyaj hab tej kub tej tooj lab tej hlau hab tej tsoog tsho ntau ntau moog. Muab tej kws mej txeeb yeeb ncuab le lug hov faib rua mej cov kwvtij neej tsaa.” 9Cov Lunpee hab cov Kas hab ib nraab xeem Manaxe tau ncaim cov Yixayee ntawm Silau huv Khana‑aa tebchaws rov qaab moog tsev rua huv Kile‑a tebchaws, yog lub tebchaws kws puab txeeb tau ua puab tug lawv le Yawmsaub kuas Mauxe has rua puab lawd. 10Thaus puab lug txug ntawm ntug dej Yalatee kws nyob Khana‑aa saab tebchaws, cov Lunpee hab cov Kas hab ib nraab xeem Manaxe txawm tib ib lub thaaj xyeem rua ntawm dej Yalatee, yog ib lub thaaj kws luj kawg le. 11Mas cov Yixayee nov luas has tas, “Saib maj, cov Lunpee hab cov Kas hab ib nraab xeem Manaxe ua tau ib lub thaaj rua ntawm Khana‑aa nrwm teb kws ze ntug dej Yalatee saab kws yog Yixayee tebchaws.” 12Mas thaus cov Yixayee tau nov le hov ib tsoom pejxeem Yixayee suavdawg txawm sau zog ua ke rua ntawm Silau yuav moog ua rog rua puab. 13Mas cov Yixayee txhad khaiv pov thawj Ele‑axa tug tub Fineha moog cuag cov Lunpee hab cov Kas hab ib nraab xeem Manaxe huv Kile‑a tebchaws, 14hab kaum tug kws ua hlub, ib xeem ib tug kws puavleej yog tug thawj huv txhua cum Yixayee nrug nwg moog. 15Thaus puab tuaj txug cov Lunpee hab cov Kas hab ib nraab xeem Manaxe huv Kile‑a tebchaws puab kuj has rua cov hov tas, 16“Yawmsaub cov tuabneeg suavdawg has le nuav tas, ‘Mej ua daabtsw le nuav? Mej faav xeeb rua cov Yixayee tug Vaajtswv, es nub nua mej tso Yawmsaub tseg moog ua ib lub thaaj rua mej xwb, yog nub nua mej tau sawv twv Yawmsaub lawm. 17Tej kev txhum kws peb ua ntawm Pe‑au tseed tsw txaus hab lov? Lug txug naj nub nwgnuav peb tseed ntxuav tsw tau kuas peb huv huv le hab tej kev txhum hov ua kuas vej sub vej sw poob rua Yawmsaub cov tuabneeg xwb. 18Mas nub nua mej tseed yuav tso Yawmsaub tseg hab lov? Nub nua yog mej sawv twv Yawmsaub mas pigkig nwg yuav chim rua ib tsoom Yixayee suavdawg. 19Yog mej lub tebchaws qas tsw huv mej ca le hlaa moog rua huv Yawmsaub lub tebchaws kws muaj Yawmsaub lub tsev ntaub, lug nrug peb tuav lub tebchaws ua teej ua tug. Tsw xob sawv twv Yawmsaub hab tsw xob coj peb twv Yawmsaub es moog ua ib lub thaaj rua mej kws tsw yog peb tug Vaajtswv Yawmsaub lub thaaj. 20Xelag tug tub Akhaa tub ua tsw ncaaj rua tej kws muab cais pub rua Yawmsaub los tsw yog? Mas Yawmsaub txujkev chim txhad le poob rua sau cov Yixayee suavdawg. Tsw yog nwg tuab leeg puam tsuaj rua nwg lub txem xwb.’ ” 21Xeem Lunpee hab xeem Kas hab ib nraab xeem Manaxe txawm teb cov thawj huv txhua cum Yixayee tas, 22“Tug kws muaj fwjchim luj kawg nkaus pum, yog Vaajtswv kws yog Yawmsaub. Tug kws muaj fwjchim luj kawg nkaus pum, yog Vaajtswv kws yog Yawmsaub ntaag. Nwg yeej paub hab ca cov Yixayee paub hab. Yog tas peb sawv twv hab ua tsw ncaaj rua Yawmsaub mas nub nua tsw xob tseg peb txujsa le. 23Qhov kws peb ua lub thaaj hov, mas yog peb tso Yawmsaub tseg hab swv ua kevcai hlawv huvsw xyeem hab ua kevcai xyeem qoob loos hab ua kevcai xyeem sws raug zoo rua sau lub thaaj hov, mas ca Yawmsaub rau txem ntaag. 24Tsw yog le hov. Qhov kws peb ua le hov tub yog ntshai tsaam tuab maav mej tej tub ki yuav has rua peb tej tub ki tas, ‘Mej muaj feem koom Yawmsaub kws yog cov Yixayee tug Vaajtswv daabtsw? 25Tsua qhov Yawmsaub tub muab tug dej Yalatee ua nrwm teb quas peb hab mej cov Lunpee hab cov Kas lawm nev. Mej tsw muaj feem huv Yawmsaub.’ Yog le hov peb ntshai tsaam mej tej tub ki yuav ua rua peb tej tub ki tseg tsw pe hawm Yawmsaub. 26Vem le nuav peb txhad has tas, ‘Ca peb ua lub thaaj nuav, tsw yog ua lug swv ua tej kevcai hlawv huvsw xyeem lossws tua tsaj xyeem.’ 27Tassws yog peb ua lug ua tsoob zeej timkhawv rua peb hab mej, hab rua lwm tam kws dua peb lawm tas peb yeej yuav pe hawm Yawmsaub hab ua tej kevcai hlawv huvsw xyeem hab tua tsaj xyeem hab xyeem sws raug zoo rua ntawm Yawmsaub xubndag,⚓ sub mej tej tub ki txhad has tsw tau rua peb tej tub ki tom qaab tas, ‘Mej tsw muaj feem huv Yawmsaub.’ 28Peb xaav tas yog muaj leejtwg has le nuav rua peb lossws has rua peb caaj ceg tom qaab, peb kuj yuav has tau tas, ‘Saib lub thaaj nuav kws zoo yaam le Yawmsaub lub thaaj kws peb tej laug ua ca, tsw yog ua lug swv ua kevcai hlawv huvsw xyeem lossws tua tsaj xyeem, tassws yog ua lug ua tsoob zeej timkhawv rua peb hab mej xwb.’ 29Peb yeej tsw yog yuav sawv twv Yawmsaub tso Yawmsaub tseg nub nua es ua dua ib lub thaaj lug ua tej kevcai hlawv huvsw xyeem hab xyeem qoob loos hab tua tsaj xyeem, kws tsw yog peb tug Vaajtswv Yawmsaub lub thaaj kws nyob ntawm Yawmsaub lub tsev ntaub.” 30Thaus pov thawj Fineha hab cov ua hlub kws yog cov thawj huv txhua cum Yixayee kws nrug nwg nyob ua ke hov nov tej lug kws cov Lunpee hab cov Kas hab cov Manaxe has hov mas puab kuj txaus sab heev. 31Pov thawj Ele‑axa tug tub Fineha has rua cov Lunpee hab cov Kas hab cov Manaxe tas, “Nub nua peb paub tseeb tas Yawmsaub nyob huv plawv peb, vem yog mej kuj tsw faav xeeb rua Yawmsaub. Nwgnuav mej tau paab cov Yixayee dim qhov kws Yawmsaub rau txem.” 32Pov thawj Ele‑axa tug tub Fineha hab cov kws ua hlub kuj tawm ntawm cov Lunpee hab cov Kas huv Kile‑a tebchaws rov qaab moog cuag cov Yixayee huv Khana‑aa tebchaws hab qha puab paub. 33Tej lug kws puab moog qha hov txaus cov Yixayee sab hab cov Yixayee kuj qhuas Vaajtswv. Tsw muaj leejtwg yuav has txug ua rog rua puab hab ua rua lub tebchaws kws cov Lunpee hab cov Kas nyob lawd puam tsuaj le lawm. 34Cov Lunpee hab cov Kas hu lub thaaj hov tas “Lub thaaj tsoob zeej timkhawv.” Puab has tas “Lub thaaj ua tsoob zeej timkhawv rua peb ob tog tas Yawmsaub yog Vaajtswv.”