21

Cov Khana‑as ua rog rau cov Yixayee

¹Thaum cov Khana‑as tus vajntxwv uas kav lub moos Alaj uas nyob hauv Neke⚓ hnov tias cov Yixayee tabtom taug txojkev Athali los, nws txawm ua rog rau cov Yixayee thiab ntes tau qee leej coj mus lawm. ²Mas cov Yixayee cog lus rau Yawmsaub tias, “Yog koj muab cov neeg no rau hauv peb txhais tes mas peb yuav muab lawv tej moos ua kom puam tsuaj huvsi li.” ³Yawmsaub kuj mloog cov Yixayee lub suab thov, nws thiaj muab cov Khana‑as rau hauv lawv txhais tes. Lawv thiaj muab cov Khana‑as thiab lawv tej moos ua puam tsuaj tag huvsi, mas thiaj hu thaj chaw ntawd hu ua Hauma.⚓

Tus nab tooj

⁴Lawv tawm ntawm roob Hau taug txojkev uas mus rau Hiavtxwv Liab kom thiaj lug dhau Edoo tebchaws mus. Thaum lawv tabtom taug kev cov pejxeem ua tsis tau siab ntev. ⁵Cov pejxeem thiaj thuam yws Vajtswv thiab Mauxe hais tias, “Ua li cas neb yuav coj peb tawm hauv Iyi tebchaws los tuag rau hauv tebchaws moj sab qhua no? Vim tsis muaj mov noj tsis muaj dej haus, thiab peb dhuav tej zaub mov uas tsis muaj qabhau no hwv lawm.” ⁶Yawmsaub thiaj tso nab muaj taug heev los rau hauv cov Yixayee mas cov nab tom lawv, cov Yixayee thiaj tuag coob heev. ⁷Cov pejxeem thiaj tuaj cuag Mauxe thiab hais tias, “Peb tau ua txhaum vim peb tau thuam yws Yawmsaub thiab koj. Thov koj thov Yawmsaub muab cov nab no coj tawm ntawm peb mus.” Mauxe thiaj thov Yawmsaub pab cov pejxeem. ⁸Yawmsaub hais rau Mauxe tias, “Koj cia li ua ib tug nab muaj taug muab teem rau saum ib tug ncej. Txhua tus uas raug nab tom thaum lawv tsa muag ntsia tug nab ntawd mas lawv yuav ciaj sia nyob.” ⁹Ces Mauxe txawm muab tooj liab ua ib tug nab teem rau saum ib tug ncej. Yog leejtwg raug nab tom es nws tsa muag ntsia tug nab tooj ntawd nws thiaj muaj txojsia nyob.

Cov Yixayee mus txog Mau‑a

¹⁰Cov Yixayee sawv kev mus tsuam chaw nyob rau ntawm Aunpau. ¹¹Lawv ho sawv kev ntawm Aunpau mus tsuam chaw nyob rau ntawm Iye‑anpali hauv tebchaws moj sab qhua uas ncaj Mau‑a sab hnub tuaj. ¹²Lawv ho sawv kev qhov ntawd mus tsuam chaw nyob rau hauv lub hav Xelej. ¹³Lawv ho sawv kev qhov ntawd mus tsuam chaw nyob rau ntawm tus dej Anoo sab tid uas yog nyob hauv tebchaws moj sab qhua hauv cov Amaulai lub tebchaws, rau qhov tus dej Anoo yog Mau‑a tus ciam teb, yog nyob Mau‑a thiab Amaulai ntu nruab nrab. ¹⁴Vim li no hauv phau ntawv uas hais txog Yawmsaub ua rog thiaj muaj hais tias,
“Vahe hauv Xufa,
thiab tej kwj hav ntawm Anoo,
¹⁵thiab tej hauv hav
mus txog ntua lub moos A
thiab nthuav mus txog Mau‑a ciam teb.”
¹⁶Lawv tawm qhov ntawd mus txog Npe‑aw uas yog lub qhov dej uas Yawmsaub hais rau Mauxe tias, “Cia li sau cov pejxeem los ua ke, kuv yuav pub dej rau lawv.” ¹⁷Cov Yixayee thiaj hu zaj nkauj no hais tias,
“Lub qhov dej cia li txhawv dej los,
cia peb hu nkauj,
¹⁸yog lub qhov dej uas cov thawj khawb cia,
yog lub uas cov uas ua hlob khawb tseg,
lawv siv tej cwj nres thiab tej pas nrig.”
Lawv ho tawm ntawm tebchaws moj sab qhua mus txog Mathana, ¹⁹thiab tawm ntawm Mathana mus txog Nahali‑ee, thiab tawm ntawm Nahali‑ee mus txog Npamauj, ²⁰thiab tawm ntawm Npamauj mus txog lub hav hauv Mau‑a tebchaws ze hauv roob Pixaka uas ntsia ntsoov rau ntuj nrag teb do.⚓

Cov Yixayee kov yeej Xihoo

²¹Cov Yixayee txib neeg mus cuag Xihoo uas yog cov Amaulai tus vajntxwv mas hais tias, ²²“Thov cia peb hla koj lub tebchaws mus. Peb yuav tsis nkag rau hauv koj tej liaj teb koj tej vaj txiv hmab, peb yuav tsis haus koj tej qhov dej. Peb yuav taug Vajntxwv Txoj niag Kev Loj mus kom dhau plaws koj lub tebchaws.” ²³Tiamsis Xihoo tsis kheev cov Yixayee hla nws lub tebchaws. Nws txhij tub rog tuaj tawm tsam cov Yixayee hauv tebchaws moj sab qhua, nws tuaj nrog cov Yixayee ntaus rog ntawm Yahaj. ²⁴Cov Yixayee xuas ntaj tua nws tuag thiab txeeb tau nws lub tebchaws txij ntua tus dej Anoo mus txog ntua dej Yanpo mus ti nkaus Asmoo ciam teb, vim Asmoo ciam teb ruaj khov. ²⁵Cov Yixayee txeeb tau tej moos no huvsi thiab cov Yixayee mus nyob hauv cov Amaulai txhua lub moos thiab nyob hauv lub nroog Hesanpoo thiab nyob thoob plaws tej zej zog. ²⁶Hesanpoo yog cov Amaulai tus vajntxwv Xihoo lub nroog loj. Nws yog tus uas ua rog rau cov Mau‑a tus vajntxwv uas kav ua nws ntej thiab nws txeeb tau Mau‑a tebchaws huvsi mus txog ntua tus dej Anoo. ²⁷Vim li no cov uas txawj phim lus txiaj thiaj hais tias,
“Cia li tuaj rau Hesanpoo,
tuaj rhawv tuaj tsim kho Xihoo lub nroog,
²⁸vim yog muaj hluavtaws
tawm hauv Hesanpoo,
muaj nplaim taws tawm hauv Xihoo lub nroog
mus kub Mau‑a lub moos A
thiab cov uas ua hlob
hauv tej roob Anoo puam tsuaj tag.
²⁹Mau‑a 'e, koj yuav raug txom nyem lauj,
Khemauj cov neeg 'e,
nej yuav raug puam tsuaj lauj!
Khemauj tau ua rau nws tej tub
khiav poob tebchaws tag,
thiab ua rau nws tej ntxhais poob
rau hauv Amaulai tus vajntxwv Xihoo tes.
³⁰Peb twb tua lawv pov tseg huvsi.
Hesanpoo puam tsuaj
mus txog ntua Dinpoo.
Peb rhuav tshem lawv
mus txog ntua Naufa
thiab txog ntua Medenpa.⚓”

Cov Yixayee kov yeej Npasas tus vajntxwv Aus

³¹Yog li no cov Yixayee thiaj tau nyob hauv cov Amaulai lub tebchaws. ³²Mas Mauxe txib neeg mus tshuaj lub moos Yaxaw, thiab lawv kuj txeeb tau tej zej zog ib ncig ntawd thiab muab cov Amaulai uas nyob hauv ntiab khiav mus.
³³Lawv tig hlo taug txojkev uas mus pem Npasas mas Npasas tus vajntxwv Aus thiab nws cov pejxeem sawvdaws kuj tawm tuaj ua rog rau ntawm Ede‑i. ³⁴Tiamsis Yawmsaub hais rau Mauxe tias, “Tsis txhob ntshai nws rau qhov kuv twb muab nws rau hauv koj txhais tes, muab kiag nws cov pejxeem thiab nws lub tebchaws huvsi, mas koj yuav ua rau nws ib yam nkaus li koj twb ua rau cov Amaulai tus vajntxwv Xihoo uas nyob hauv Hesanpoo.” ³⁵Lawv thiaj li tua Aus thiab nws cov tub thiab nws cov pejxeem sawvdaws tsis tshuav ib tug li. Lawv thiaj txeeb kiag nws lub tebchaws.

21

Cov Yixalayees Yeej Cov Kana-as

¹Thaum cov Kana-as tus vajntxwv uas kav lub nroog Alas hauv tebchaws Kana-as sab qabteb hnov hais tias cov Yixalayees tabtom taug txojkev Athalis los lawm, nws txawm txhij tubrog mus tua lawv thiab ntes tau cov Yixalayees qee leej coj mus ua qhev. ²Ces cov Yixalayees thiaj coglus rau tus TSWV hais tias, “Yog koj pub peb tua yeej cov neeg no, peb yuav muab lawv thiab lawv tej nroog fij hlo rau koj, thiab peb yuav muab lawv ua kom puastsuaj tas huv tibsi.” ³Tus TSWV hnov lawv tej lus thov, thiab nws pab lawv tua yeej cov Kana-as. Vim li no cov Yixalayees thiaj muab cov Kana-as thiab lawv tej nroog ua puastsuaj tas, thiab muab qhov chaw ntawd tis npe hu ua Haulemas.

Muab Tooj Nchuav ua Ib Tug Nab

⁴Cov Yixalayees sawv kev ntawm lub Roob Haules mus rau nram Hiavtxwv Akanpas, lawv yuav lug kev ncig lub tebchaws Edoos. Tiamsis thaum lawv tseem tabtom taug kev mus ntawd, lawv ua tsis taus siab ntev nyiaj kev txomnyem, ⁵lawv txawm cem Vajtswv thiab Mauxes. Lawv yws hais tias, “Vim li cas neb thiaj coj peb tawm nram tebchaws Iziv los kom peb tuag tas rau hauv tiaj suabpuam, qhov chaw uas tsis muaj mov noj thiab tsis muaj dej haus no? Peb noj tsis taus tej zaub mov zoo li no lawm!” ⁶Ces tus TSWV thiaj tso cov nab muaj taug los rau hauv cov Yixalayees, cov Yixalayees coob leej thiaj raug nab tom tuag lawm. ⁷Cov pejxeem thiaj tuaj cuag Mauxes thiab hais tias, “Thaum peb cem tus TSWV thiab cem koj twb yog peb ua txhaum ntag. Nimno thov koj thov tus TSWV muab cov nab no tshem tawm mus.” Yog li ntawd, Mauxes thiaj thov tus TSWV pab cov pejxeem. ⁸Tus TSWV kom Mauxes muab tooj nchuav ua ib tug nab thiab muab mus ntsia rau ntawm ib tug ncej, yog nab tom leejtwg, kom tus ntawd tsa qhovmuag ntsia tus nab tooj ntawd nws thiaj tsis tuag. ⁹Mauxes txawm nchuav tau ib tug nab tooj thiab muab ntsia rau saum ib tug ncej. Thaum nab tom leejtwg yog nws tsa qhovmuag ntsia tus nab tooj ntawd nws txawm tsis tuag.

Cov Yixalayees Los Tom Roob Haules Los Txog Hauv Lub Hav Mau-am

¹⁰Cov Yixalayees mus tsuam yeej rau ntawm Aunpaus. ¹¹Ces lawv sawv kev ntawm Aunpaus mus tsuam yeej rau ntawm Anpalees uas nyob hauv lub tiaj suabpuam ntawm tebchaws Mau-am sab hnubtuaj. ¹²Lawv sawv kev ntawm qhov chaw ntawd mus tsuam yeej rau hauv lub Hav Zeles. ¹³Lawv sawv kev qhov ntawd, thiab mus tsuam yeej rau ntawm tus Dej Alenoos sab qaumteb ntawm lub tiaj suabpuam uas mus tshuam rau tebchaws Amaules. (Tus dej Alenoos yog tus ciam rau lub tebchaws Mau-am thiab lub tebchaws Amaules.) ¹⁴Twb yog li no phau Ntawv uas teev tus TSWV tej kev ua Rog thiaj li hais txog: “… lub zos Vahes uas nyob hauv cheebtsam Xufas thiab hauv tej hav ntawm tus Dej Alenoos, ¹⁵thiab tej kwjha uas nqis mus rau nram lub zos Ales, thiab ntws mus tshuam rau nram ciamteb Mau-am.”
¹⁶Lawv sawv kev qhov ntawd mus txog rau ntawm ib qhov chaw hu ua tej Qhovtshij, yog qhov chaw uas tus TSWV hais rau Mauxes hais tias, “Coj cov pejxeem tuaj ua ke, thiab kuv yuav muab dej rau lawv haus.” ¹⁷Lub sijhawm ntawd, cov Yixalayees zoo siab heev thiab hu zaj nkauj no:
“Tej qhovtshij, nej cia li txhawv dej laub lug tawm los;
Thiab peb yuav zoo siab hu nkauj tos cov dej ntawd.
¹⁸Lub qhovtshij no yog cov nomtswv,
Thiab cov pejxeem tej thawjcoj khawb,
Yog siv vajntxwv tus cwj thiab lawv tej pas nrig khawb ntag.”

Ces lawv thiaj sawv kev ntawm tiaj suabpuam mus rau ntawm Matanas, ¹⁹thiab sawv kev ntawm Matanas mus rau ntawm Nahaliyees, thiab sawv kev ntawm Nahaliyees mus rau ntawm Npamaus, ²⁰thiab sawv kev ntawm Npamaus mus rau ntawm lub hav uas nyob hauv tebchaws Mau-am. Qhov chaw ntawd nyob saum lub ncov roob Pinkas, xyuam yaj lug saib ntsoov rau tim tiaj suabpuam.

Cov Yixalayees Yeej Vajntxwv Xihoos thiab Vajntxwv Aunkas

(2 Kevcai 2.26–3.11)

²¹Cov Yixalayees tso neeg mus thov cov Amaules tus vajntxwv Xihoos hais tias: ²²“Thov pub peb hla nej lub tebchaws mus. Peb thiab peb tej tsiaj yuav tsis pla mus tsuj hauv nej tej teb lossis nej tej vaj txiv hmab, thiab peb yuav tsis haus tej dej hauv nej tej qhovtshij; peb yuav taug txojkev loj ncaj nraim mus kom dhau plaws nej cheebtsam.” ²³Tiamsis Xihoos tsis pub cov Yixalayees hla nws lub tebchaws mus. Nws thiaj txhij nws cov tubrog mus rau ntawm Yahas uas nyob tom tiaj suabpuam thiab mus puav tua cov Yixalayees. ²⁴Tiamsis cov Yixalayees tua cov yeebncuab tuag coob heev rau hauv tshavrog thiab txeeb tau lawv lub tebchaws txij kiag ntawm tus Dej Alenoos sab qaumteb mus txog ntua rau tim Yanpaus, thiab dhau plaws mus rau tim tebchaws Amoos, rau qhov cov tubrog Amoos uas zov ntawm ciamteb siab tawv thiab zov nruj heev. ²⁵Yog li ntawd, cov Yixalayees thiaj txeeb tau tagnrho cov Amaules tej nroog, thiab tseem txeeb tau lub tuamceeb nroog Hesenpoos thiab tej nroog me uas nyob ibncig ntawd huv tibsi. Lawv thiaj mus nyob puv nkaus rau hauv tej nroog ntawd. ²⁶Hesenpoos yog lub tuamceeb nroog uas yog cov Amaules tus vajntxwv Xihoos nyob ntag, thiab nws yog tus uas ntxeev siab ua rog tawmtsam cov Mau-am tus vajntxwv qub thaum ub thiab txeeb tau tagnrho Mau-am lub tebchaws mus txog ntua ntawm tus Dej Alenoos. ²⁷Twb yog vim li ntawd, cov hu nkauj thiaj li hu zaj nkauj no:

“Cia li los rau hauv lub nroog
Hesenpoos uas yog vajntxwv Xihoos lub nroog!
Peb xav pom lub nroog ntawd rov txhim kho dua tshiab.
²⁸Xihoos cov tubrog tawm hauv lub nroog
Hesenpoos tuaj mus ib yam li cov nplaim taws;
Mas nws rhuav lub nroog Ales hauv lub tebchaws Mau-am
thiab nqos tagnrho tej hauv roob pem Alenoos.
²⁹Cov Mau-am, nej yuav raug kev txomnyem lauj!
Nej pe tus mlom Khemaus uas tabtom coj
kev puastsuaj los!
Nej tus vajtswv yuav coj cov txivneej
mus poob kev txomnyem,
thiab cov pojniam yuav raug cov Amaules tus vajntxwv
Xihoos ntes coj mus.
³⁰Tiamsis tamsim no peb twb muab lawv cov xeebntxwv
tua puastsuaj tag,
Txij ntua tom Hesenpoos los txog ntua rau ntawm Dinpoos,
Thiab pib kiag tom Nasees mus ti nkaus rau tim Naufas
uas ze rau ntawm Medenpas.”
³¹Yog li ntawd, cov Yixalayees thiaj li mus nyob puv nkaus rau hauv tebchaws Amaules. ³²Mauxes tso neeg mus soj thiab tua lub nroog Yaxes. Cov Yixalayees txeeb tau lub nroog ntawd nrog tej zos uas nyob ibncig thiab muab cov Amaules uas nyob hauv tej zos ntawd raws tawm khiav huv tibsi lawm.
³³Cov Yixalayees tig rov los thiab taug kev mus rau tom lub zos Npasas. Tus vajntxwv uas kav lub tebchaws Npasas thiaj txhij nws cov tubrog nrog nws mus tua cov Yixalayees rau tom Edele-is. ³⁴Tus TSWV hais rau Mauxes hais tias, “Nej tsis txhob ntshai Aunkas. Kuv yuav pub kom nej tua yeej nws, yeej tagnrho nws cov neeg thiab nws lub tebchaws huv tibsi. Nej yuav ua rau nws ib yam li ua rau Xihoos uas yog tus vajntxwv kav lub nroog Hesenpoos thiab ntag.” ³⁵Yog li ntawd, cov Yixalayees thiaj muab Aunkas, nws cov tub thiab tagnrho nws cov neeg tua tuag tas tsis tshuav ib tug seem li, thiab cov Yixalayees tau los nyob nws lub tebchaws.